Read Achang LVGYO 12 Bible Online

LVGYO 12 - Achang bible

LVGYO 12

¹Hauh yoq lyis hwankti Herod gas, phung dius dvyhamh lyis shoeuhshih das ge loqyom tyonh nyeis.

²Housoeh Yohan dah vmang Yaku lyis moengsa yah sat.

³Hauh cho Yuda jens yoeuh gaus zis lyis nyvng las, Petru lyis eq nyhik das zis yomkat nyeis. Hauh shishenh gas bicheih ma kat ohlhyoq zo dah pwe nghuot.

⁴Petru lyis yoh nyhik lyis thung mas kat toh. Herod gas Lhuiq Kat Pwe lai thang lhyi dius jens jyank mas phank kat dyei das ge, jeslo nyei yuk yuk bos dah jesphung nyei phung loq mas Petru lyis kyauh toh.

⁵Housoeh Petru gas thung mha lungh joq. Nghuot laus eq phung ka nyah xiklyis Mangso jyank mas shvmanh khyoeuq dung nyeis.

⁶Herod gas Petru lyis shwih thuq yoeus das dah xik lyis nyensyo, Petru gas shamjvng aiq jvng twih las jeslo aiq yuk dah vjo mas yhet joq. Pyada jens eq thung khomh mas zungh nyeis.

⁷Hauh uhlyis yoeuh aq, Yhensain dah loeuswons soeu dvyuk gyoh yap las hauh yvpkhau mas bvng joq. Nyang gas Petru dah nunghkhung mas bat las, Lvnyap toq aq, ge nhauh. Hauh uhlyis shamjvng eq nyah loq masyah gyuot loh.

⁸Loeuswons soeu nyang lyis taiq zis gas, Dyichih chih las thyvkoq koq aq, ge. Nyang eq kuot goeus. Tsai, Nah dyi lyet chi las ngah thang mas chank los aq, ge doms taiq.

⁹Nyang eq thuq las chank loh nyeis. Nghuot laus eq loeuswons soeu bweh nhang dah muh hauh zis jyoengh nghuot zis nyang ma seq las, nyoqnyvng nghuot, ge nghamh nyeis.

¹⁰Nyah aiq yuk zungh joqyos aiq deh lai las, wus shot pheh wvng dah thyeq khomh mas jweh lyis, hauh khomh eq nyang pheh yah phank los. Nyah aiq yuk thuq las wus cho dvkoeuq mas chank los lho las, loeuswons soeu ka houjang nyang yah gang loh.

¹¹Petru yoh nghamh soh lyis, Yhensain gas nyah loeuswons soeu nhang lha Herod dah loq masyah eq, Yuda jens nghamh toh cho dvnganh masyah eq ngos lyis khyuot yoeus goeus zis gas gvshih ngos jyoengh seq goeus, ge.

¹²Nyang hauh cho nghamh soh lyis, dius nyo nyo lo huom las shvmanh dung nyeis joqyos, Makho ge dah Yohan dah ungwes Mari yhen pheh loh.

¹³Petru gas, yhen nghe pheh yah khomh loh koq yoeuh lyis, Roda ge dah jyeidwis nyelo dvyuk khomh phank dyei das ge loh.

¹⁴Nyang gas Petru thwe nghuot yvlyis seq las khomh ma phank phank yvpkhau mas wuih tauh loh las taiq zis gas, Petru gas khomh nghe mas yap joq, ge.

¹⁵Nyamoq nyang lyis taiq zis gas, Nvng koh, ge. Nyang gas jyoengh nghuot ge kyingh taiq nyeis. Tsai nyamoq taiq zis gas, Nyah loeuswons soeu nghuot das, ge.

¹⁶Nghuot laus eq Petru gas khomh mas kyingh koq nyeis yvmvyah, nyamoq khomh phank lyis nyang lyis nyvng las tsain mauh.

¹⁷Petru gas tsoeklo nyeis das xiklyis loq toeuq las, nyang lyis thung masyah Yhensain khasoeh shwih thuq los cho nyamoq lyis taiq kyoh las, Haih cho Yaku yahge boekyis lyis taiq kyoh kat geh, ge. Nyang gas gohjoqyos pheh doms thuq loh.

¹⁸Nyoqnyvng los lyis jeslo jens gas Petru mas cha bweh zis ma seq yvmvyah, svsoh nhunk loh.

¹⁹Herod gas Petru lyis xo ma nyvng goeus ya, zungh bang lyis yen yoeuh las nyamoq lyis sat das zis vmingh dyei. Hauh thang lhyi nyang gas Yuda mau masyah Kesare wus pheh gyoh loh las houmha nyeis.

²⁰Hauh yoq lyis Herod gas Taire yahge Sidon dius jens lyis svsoh nhaiqyo goeus. Housoeh las nyamoq gas ehnyet dvlom yah nyah jyank mas e. Cangxeih lyis hwankti yhen zom soeu Blastu lyis nyamoq lyis pangh das xiklyis lhung las hwankti lyis nyenstap das xiklyis dung: Khasoeh ge lyis nyamoq mau gas hauh hwankti mau mas dah zonoms shukphoh lyis nges nyeis.

²¹Housoeh buisnyeis doengs nyeih lyis, Herod gas hwankti gungs shunk las hwankti tank mas tsung las dang taiq.

²²Hauh uhlyis dius jens kaiq zis gas, Dius dah thwe ma nghuot, gywes dah thwe dvnghuot, ge.

²³Nyang gas Mangso dah phunk lyis ma chungh yvmvyah, houjang Yhensain dah loeuswons soeu nyang lyis dvm dyei las, luk luk zis yah shei loh.

²⁴Mangso dah dang gas tsoq las kuhxing jebais los.

²⁵Barnaba yahge Saulo ka, nyah aiq yuk kuot dyei chah muh dye las Makho ge dah Yohan lyis eq shwih las Yerusalem masyah tauh loh.