Read Achang LVGYO 13 Bible Online

LVGYO 13 - Achang bible

LVGYO 13

¹Gvshih Antiok wus mas dah phung mha, lvpe jens, svra moq bos. Hauh moq mas Barnaba, Niger ge dah Simon, Kureni dius Luki, Herod yah zomh bes los dah Manaen yahge Saulo moq nghuot.

²Nyamoq gas Yhensain lhyi chungh paiq las womkyi nyeis lyis Gyingshang Dyos taiq zis gas, Ngos toeuq toh dah muh lyis wons wuq das xiklyis Barnaba yahge Saulo lyis khyen toeuq toh geh, ge.

³Houyah dvyhangteh, nyamoq gas womkyi, shvmanh dung las, nyah aiq yuk thoq mas loq dye kih dyei las nhang kat.

⁴Housoeh Gyingshang Dyos nyah aiq yuk lyis nhang kat zis yah dvyhangteh, Selukia mas gyoh e las, hou mhayah Kupru pheh goeu loh.

⁵Salami wus mas jweh lyis Yuda jens dah lyi jungs mas Mangso dang lyis taiq kyoh. Nyah aiq yuk lyis pangh das xiklyis Yohan eq bos.

⁶Nyamoq gas hauh goeujo suh lai loh las, Papho wus mas jweh lyis, Bar-yesu ge dah Yuda hweq seq soeu lvpe hwah dvyuk yah xauhgoh.

⁷Hauh soeu ka Segiu Paulu ge dah mungh zau jyank mas nyeis soeu nghuot. Mungh zau gas yik soeu nghuot. Nyang gas Mangso dah dang gyo mes las, Barnaba Yahge Saulo lyis khi yoeus.

⁸Hauh uhlyis (hweq seq soeu ge dah vjyuk khyvlyis nyhink dah) Elima gas hau mungh zau dah lomsjingh yvlyis lhoeu thyoq mes las, nyamoq lyis zan.

⁹Hauh uhlyis Paulo eq ge dah Saulo ka Gyingshang Dyos dyingh zis yah nyang lyis yoeuh tsuk toh las taiq zis gas,

¹⁰Ung lhung cho yahge phanh cho dvnganh dyingh joq, yius dah lo, dan cho khanghmuh dah jes phoq eh, Yhensain dah dan cho lhyi taiq thyoq masyah nvng khanhamp no das lah?

¹¹Yoeuh aq, gvshih Yhensain nvng lyis yobos dyei las buis dvyoq ma xauh nyvng nyoqjet nyeis das, ge. Houjang nyang nyoq gos tyamp las, soeng soeng noq tyamp. Housoeh nyang lyis she das dius xo uhjyangh suh lhain nyeis.

¹²Hauh cho lhyi mungh zau nyvng lyis Yhensain dah jyauh cho lhyi mauh zis yah lomsjingh nyeis.

¹³Hauh thang lhyi Paulo yahge nyah dyenschangh jens gas, Papho masyah goeu las Pamphilia mau Perga wus mas jweh e. Nghuot laus eq Yohan gas nyamoq yah gang las Yerusalem pheh tauh loh.

¹⁴Nghuot laus eq nyamoq gas, Perga masyah toq lyis, Pisidia mau Antiok wus mas jweh loh. Yuda No Buisnyeis lyis nyamoq lyi jungs mas wvng tsung toh.

¹⁵Hauh uhlyis lyi maussauh buk yahge lvpe maussauh buk dye nghap lyis hauh lyi jungs guon bang gas nyamoq jyank mas dius nhang las taiq zis gas, Boekyis eh, moqphung lyis taiq kyingh das dang yoh lyis taiq kyingh geh, ge.

¹⁶Hauh uhlyis Paulo toq las loq vsoh yah: Israel jens yahge Mangso lhyi gyukwoms bang eh, gyo yoeus geh.

¹⁷Haih Israel dius dah Mangso ka yah phauh thyeih moq lyis khyen yoeus goeus yvmvyah Egutu mas boengh duot nyeis shih lyis nyamoq lyis dius nyau kuh kuot goeus. Mangso ka nyah yombos dah loqyom yah nyamoq lyis hou mhayah shwih thuq los.

¹⁸Tsai mhanhdyvp mas nyeici zvn ko nyamoq lyis Ehnyet xing xing yah shwih los.

¹⁹Nyang gas Khanan mau mas dah dius nyhet nyau lyis mhont las, hauh maunyeis yhenzis gas Israel jens dah vso vlho kuot dyei. Haih cho dvnganh bweh lai los zis gas 450 zvn ko nyangh.

²⁰Hauh thang lhyi lvpe Samuel caiq jweh shoq nyang nyamoq lyis soetuon bang toh dyei.

²¹Hauh thang lhyi nyamoq hwankti sang las, Mangso ka Benyamin vkoq, Kisha dah lo Saulo lyis dyei. Nyang gas 40 zvn hwankti duot goeus.

²²Nyang hauh soeu lyis khyoq tyamp uhlyis Dawi lyis nyamoq dah hwankti duot nhang. Hauh soeu dah cho, nyang nyang kanghjyoeng kat zis gas, Yese dah lo Dawi gas ngah ehnyet yah phi thank soeu nghuot las nyang ngos o zis dvnganh chank kuot das.

²³Hauh soeu dah vkoq mas Mangso dah dangthoengh toh zis yah dvyhangteh, Israel xiklyis khyuot yoeus soeu Yesu lyis thuq los nhang.

²⁴Hauh soeu ma los shih lyis Yohan eq Israel vnyau dvnganh lyis nhaiqlom thaiq zis yah sen dah jeisnyhop cho taiq kyoh.

²⁵Yohan gas nyah muhzoh tyeh wons wuq nyeis lyis, Ngos lyis hank nghuot oen nghamh nyeis goh lah? Ngos gas hauh soeu ma nghuot, yoeuh aq, ngah thang mas dvyuk jweh los das; ngos gas hauh soeu dah thyvkoq khyuot dyei das zis yangh ma mon, ge.

²⁶Vmang vnoeuh moq eh, haih khyuot yoeus cho ka Abraham dah vnyau vshih, lo jens nghuot dah namoq yahge gohtoeu Mangso lhyi gyukwoms bang dah xiklyis dyei goeus.

²⁷Khasoeh ge lyis Yerusalem mas moq yahge nyamoq dah guon bang gas, nyang lyis ma seq zis yahge Yuda No Buisnyeis khanghmuh nghap dah lvpe jens dah dang lyis ma seqgyo yvmvyah, nyang lyis dang thang thyet zis yah hauh lvpe dang lyis nyuk los nhang.

²⁸Nyang mas shei mon dah yobos ma nyvng laus eq, nyang lyis sat das zis Pilat jyank mas sang.

²⁹Housoeh nyang lyis toeuq las lhaih ya lhaih toh zis dye kuot lyis, nyang lyis saiqzains masyah yoeus khyoq las lop mas kat toh.

³⁰Nghuot laus eq Mangso ka shei masyah nyang lyis toq los nhang.

³¹Galile masyah Yerusalem pheh nyang yah dvgeh doq loh bang lyis, buisnyeis nyangh nyangh lo nyah gungs lyis nyvng xoeuq las nyamoq gas gvshih dius jens dah xikkhonh mas nyah kanghjyoeng jens bweh nyeis.

³²Ngamoq gas ngamoq dah phauh thyeih moq lyis Mangso dyei toh dangthoengh nghuot dah hau gausyis dang lyis namoq jyank mas wons los.

³³Mangso ka Yesu lyis shei masyah dwis toq nhang zis yah nyamoq dah lo jens nghuot bang yamoq mas Nyah dangthoengh lyis tyink dyei goeus. Houka Chungh Dang maussauh aiq mas lhaih toh zis yah dvyhangteh, Nvng ngah Lo nghuot, Khvnyhik ngos nvng lyis ngah gungs masyah yaus kat, ge.

³⁴Nyang lyis shei masyah dwis toq nhang las, dyoqbis zis ma doms xauh nhang lo zis yah sen las, Dawi lyis ngos dyei toh Gyingshang dah dangthoengh jens ngos nvng lyis dyei das, ge.

³⁵Housoeh yvmvyah gohtoeu Chungh Dang mas eq, Nah Gyingshang Soeu lyis nvng dyoqbis xauh nhang das zis ma nghuot, ge nyang taiq.

³⁶Khasoeh ge lyis Dawi gas nyah caiq mas Mangso dah nghamh thyet toh cho lhyi dye kuot thang lhyi shei goeus las nyang lyis nyah phauh thyeih moq dah vyvm mas toh zis yah bop yuq goeus.

³⁷Nghuot laus eq Mangso dwis toqh kat soeu ka bop yuq zis ma xauh.

³⁸Housoeh las boekyis eh, hauh soeu gvng mas, yaunos yoh khyuot dyei dah cho namoq lyis taiq kyoh nyeis zis gas seq geh.

³⁹Moshe lyi chank khyvlyis yah namoq dah yaunos masyah ma yoh luiq. Nghuot laus eq Yesu lyis lomsjingh soeu hank laus eq hau yaunos masyah yoh luiq.

⁴⁰Zaih geh, lvpe pe khoq zis namoq jyank mas ma bweh los bas jungh.

⁴¹Jwangh bang eh, yoeuh aq mauh las dyoqbis geh, khasoeh ge lyis namoq dah buisnyeis lyis ngos muh dvkoeuq kuot nyeis. Dius dvyuk ngos namoq lyis taiq kyoh laus eq hauh muh lyis namoq lomsjingh das zis ma nghuot, ge.

⁴²Paulo yahge Barnaba hau lyi jungs masyah thuq loh nyeis lyis, dius jens gas nyah aiq yuk lyis, Haih cho yah sen lha jweh los das No Buisnyeis lyis doms taiq das xiklyis sang.

⁴³Lyi jungs mas huom masyah dyos loh lyis, Yuda jens nyoshoq moq yahge Yuda lomsjingh cho lhyi bos chank bang nyoshoq Paulo yahge Barnaba thang mas tsain chank loh. Nyah aiq yuk gas nyamoq lyis Mangso dah jyehjuh mas suh e nyeis das xiklyis yomdyei taiq kyingh.

⁴⁴Hauh thang lhyi dah Yuda No Buisnyeis lyis, Mangso dah dang gyo yoeus das zis wus gonh dvgeh tsain huom toh.

⁴⁵Nghuot laus eq Yuda jens gas hauh moqjens lyis nyvng lyis noh ehnyet dyingh joq las Paulo taiq dang lyis jwangh zis yah tyixo khyvlyis goes tsain sang.

⁴⁶Paulo yahge Barnaba eq womh womh taiq zis gas, Mangso dang nyamoq lyis cangxeih taiq kyoh das zis gas yhaugyen. Nghuot laus eq namoq hauh yvlyis he las vcaiq vto kang yah ma mon khyvlyis dang thang thyet yoeus yvmvyah, ngamoq gohnyau bang shot pheh loh das, ge.

⁴⁷Khasoeh ge lyis, Yhensain ngamoq lyis tying toh zis gas, Nyeisjvng gonh khyuot yoeus cho bweh los shoq, Ngos nvng lyis gohnyau bang xiklyis bvng zis kuot, ge.

⁴⁸Gohnyau bang hauh zis xauhgyo lyis gaus zis yah Yhensain dang lyis tsain chungh. Housoeh nyoshoq lyis vcaiq vto kang yoh das xiklyis toeuq toh goeus zis yah dvyhangteh tsain lomsjingh los.

⁴⁹Yhensain dang gas hauh mau gonh goms shoq hoeuh loh.

⁵⁰Yuda jens gas, lomsjingh cho mas wontang las nyoqnho ngelang bos dah vmesbih jens yahge hauh wus mas dah vgyis moq lyis yom taiq bos dyei las, Paulo yahge Barnaba lyis vshoh vjyen shoeuhshih nhang las, nyamoq dah wuxom masyah khat tyamp.

⁵¹Housoeh nyamoq lyis yobos Chixoeuq khyvlyis nyah aiq yuk khyei mas dah phvlhau lyis nyamoq shot pheh ko khyoq khoq las Ikoni wus mas jweh loh.

⁵²Changlo jens gas, gaus zis yah Gyingshang Dyos dyingh joq.