Read Achang LVGYO 14 Bible Online

LVGYO 14 - Achang bible

LVGYO 14

¹Ikoni wus mas eq Paulo yahge Barnaba gas Antiok mas teh Yuda jens dah lyi jungs mas loh wvng las taiq lyis Yuda jens yahge Heleni jens nyoshoq lomsjingh.

²Nghuot laus eq ma loms dah Yuda jens gas, gohnyau bang dah ehnyet lyis lhoqh thyoq las boekyis lyis hoeng dah xiklyis gomloeus kuot.

³Housoeh nyah aiq yuk eq houmha nyangh nyangh lo nyeis las, Yhensain dah cho lhyi womh womh tsain taiq kyoh. Yhensain eq nyamoq lyis vlho yah kuot das yomsoq dyei zis yah nyah aiq yuk taiq kyoh, Yhensain dah nhaiqnyen shohgyo dang gas jyoeng yvlyis nyang kanghjyoeng kat dyei.

⁴Wus mas bang gas ehnyet lvn tyamp yvmvyah, dvyhamh gas Yuda jens shot pheh, dvyhamh gas lvgyo jens shot pheh bweh loh.

⁵Gohnyau bang mas moq eq, Yuda dius yahge nyamoq dah vgyis jens eq, nyah aiq yuk lyis gyvzaiq gyvnang kuot las lukgoq yah doeuh sat das ge sont zis lyis,

⁶Nyah aiq yuk seq las Likaoni wuxom pheh phang loh. Housoeh nyah aiq yuk gas Listra yahge Derbe wus yahge vyvm vwi mas joq dah wus mas,

⁷gausyis dang tsain taiq kyoh.

⁸Listra wus mas nyah ungwes ung masyah khyei dyoq soeu nghuot las khanhamp eq ma suh yoeuh ku soeu dvyuk tsung toh.

⁹Nyang gas Paulo taiq dang gyo nyeis. Hauh soeu lyis Paulo yoeuh kat lho lyis, yoh gis los das shoq lomsjingh ehnyet bos yvlyis nyvng seq las,

¹⁰thwe than yah, Zungh zungh toq yap aq, ge. Nyang eq dyvm toq las suh loh.

¹¹Housoeh Paulo kuot dah muhzoh lyis dius jens nyvng las nyamoq Likaoni nyingh yah kaiq zis gas, mangso jens diusyeis tsungh las yah jyank mas jweh los, ge.

¹²Housoeh nyamoq gas Barnaba lyis Ze-u, Paulo gas dang taiq uhjyung nghuot yvmvyah, nyang lyis Herme ge tsain nyhink.

¹³Hauh wus nghe pheh joq dah Ze-u yhenmuh mas dah phudyei soeu eq wus khomh mas noeujungs lu yahge bankhwank chi lyih las moqjens yah dvgeh nyah aiq yuk lyis lomhxangh lainh das zis tsain cvvq.

¹⁴Nghuot laus eq lvgyo Paulo yahge Barnaba gas, hauh cho lhyi xauhgyo lyis nyah aiq yuk dyimis lang chuiq tyamp lho las, dius phung mas wuih wvng loh las kaiq zis gas,

¹⁵Nhaiqbos moq eh, chamus hauh zis kuot goh lah? Ngah aiq yuk eq namoq yah dvyhangteh seq shei dah dius dvtsain nghuot; hai vjyuk ma bos dah muh toh tyamp las maukhung nyeisjvng, thomh yahge houmha bos ya bos yvlyis gvnkhanh toh, kang dwis dah Mangso jyank mas lhain los bas jungh oen namoq lyis gausyis dang los taiq kyoh zis dvnghuot.

¹⁶Nyang gas gohlhain dah caiq mas dius nyau khanghmuh lyis nyamoq o khyvlyis chank bas jungh, ge kat toh.

¹⁷Nghuot laus eq nyah gungs lyis kanghjyoeng ma bos bos toh tyamp zis ma nghuot; gis zis kuot uhjyangh maukhung masyah mau yahge guk nyau shih nyau, nyah yoq dyei zis yah yang lyis zonoms yah eq, gausyis zis yah eq jo nhang nyeis, ge.

¹⁸Housoeh taiq lyis yangh dius jens gas nyah aiq yuk lyis lomhxangh lainh dyei das zis vluk ma yoh tomp.

¹⁹Hauh thang lhyi Antiok yahge Ikoni wus mas dah Yuda jens jweh los las, dius phung lyis nyamoq shot pheh shwih lho las Paulo lyis lukgoq yah doeuh las, nyang lyis shei goeus jyo yvmvyah wus nghe pheh she thuq tyamp.

²⁰Nghuot laus eq changlo jens khyam nyang yap joq lyis, nyang toq las wus mas wvng loh. Nungs nyeih nyang yahge Barnaba Derbe pheh loh.

²¹Hauh wus mas gausyis dang taiq kyoh las changlo nyoshoq bweh nhang las, nyah aiq yuk gas Listra, Ikoni, Antiok wus cho doms los.

²²Changlo jens dah ehnyet goeng nhang uhjyangh, hauh lomsjingh cho mas goeng das xiklyis taiq kyingh yomdyei zis yahge Mangso munghdan mas wvng das lyis shanghsenh zis nyoshoq xauh chah, ge jyauh toh khoq.

²³Phung khanghmuh mas logis jens khyen yoeus las womkyi zis yahge shvmanh dung thang lhyi, nyamoq lomsjingh nyeis Yhensain dah loq mas kyauh toh khoq.

²⁴Hauh thang lhyi nyah aiq yuk gas Pisidia mau cho suh las, Pamphilia mau mas jweh loh.

²⁵Housoeh Perga wus mas dang taiq kyoh las, Atalia pheh tsain gyoh loh.

²⁶Hou mhayah lhyik yah goeu las, nyah aiq yuk wons wuq goeus muh xiklyis Mangso dah jyehjuh mas kyauh las, nyah aiq yuk lyis nhang kat dah Antiok wus pheh tauh loh.

²⁷Nyah aiq yuk jweh lyis phung lyis huom nhang las, Mangso nyah aiq yuk masyah kuot cho dvnganh eq, gohnyau bang lyis, nyang lyis lomsjingh das xiklyis Mangso cho phank dyei zis eq tsain taiq kyoh.

²⁸Housoeh nyah aiq yuk houmha changlo jens yah nyangh nyangh lo thoeng nyeis.