Read Achang LVGYO 15 Bible Online

LVGYO 15 - Achang bible

LVGYO 15

¹Yuda mau mas bang dvyhamh jweh los las, boekyis lyis Moshe dah thungh yah dvyhangteh vthyoh tyomh cho ma chank lyis gas namoq khyuot yoeus yvmas ma yoh jweh das ge tsain jyauh.

²Housoeh las lvn loh das cho bweh las, Paulo yahge Barnaba gas hauh bang yah taiq phyen-goh lyis, hauh cho huq yoeuh das xiklyis boekyis gas, Paulo, Barnaba yahge nyamoq mas dvyhamh lyis Yerusalem mas nyeis dah lvgyo jens yahge logis jens jyank mas nhang das xiklyis nghamh thyet toh.

³Housoeh phung yah nyamoq lyis los pauq kat las, nyamoq gas Phoenisia yahge Samari mau cho lai uhjyangh, gohnyau bang nhaiqlom thaiq goeus cho taiq kyoh yvmvyah boekyis lyis svsoh gaus nhang.

⁴Yerusalem mas jweh lyis, phung, lvgyo jens yahge logis jens gas nyamoq lyis lhom yoeus las, nyamoq gas Mangso nyamoq lyis yah kuot nhang cho dvnganh lyis taiq kyoh.

⁵Nghuot laus eq Pharishe phung mas dah lomsjingh bang dvyhamh toq las, gohnyau lyis vthyoh tyomh dyei das zis yahge Moshe dah lyi chank das zis chah shih, ge taiq.

⁶Lvgyo jens yahge logis jens haih cho xamgoh das xiklyis tsain huom.

⁷Hauh cho mas nyoshoq taiq phyen-goh thang lhyi Petru toq las nyamoq lyis taiq zis gas, Boekyis eh, gohnyau bang ngah nhuot masyah hau gausyis dang xauhgyo zis yah lomsjingh bas jungh ge, cangxeih lyis yah Mangso ngos lyis namoq masyah khyen yoeus zis gas namoq tsain seq.

⁸Nhaiqlom lyis yoh seq dyei dah Mangso ka, yang lyis dyei yhangteh nyamoq lyis eq Gyingshang Dyos dyei las, nyang nyamoq lyis khyen yoeus cho lhyi chixoeuq goeus.

⁹Housoeh lomsjingh zis yah nyamoq dah nhaiqlom lyis Gyingshang nhang goeus yvmvyah, yang yahge nyamoq jo mas shaih cho cha eq ma bos.

¹⁰Housoeh gvshih phauh thyeih moq eq ma duot, yang eq ma yoh wuq dah yvwons lyis changlo jens dah kvtoq mas wuq nhang goh ge chamus Mangso lhyi shi yoeuh goh lah?

¹¹Housoeh ma nghuot, yang eq nyamoq teh Yhensain Yesu Khristu dah jyehjuh yah kyingh khyuot yoeus xauh das oen yang loms nyeis, ge.

¹²Hauh uhlyis huom joq bang gas samlo nyeis las, Barnaba yahge Paulo nyah aiq yuk loq yah gohnyau bang mas Mangso khasoeh teh dah vlho yahge mauh loqmuh bweh nhang cho taiq kyoh uhlyis tsain gyo nyeis.

¹³Nyah aiq yuk dang thank lyis Yaku taiq zis gas, Boekyis eh, ngah dang gyo yoeus geh.

¹⁴Mangso ka gohnyau bang mas, dius dvnyau lyis nyah dius duot das nyhenshang lui yoeus khyvlyis nyah jyetdap cho nyamoq lyis, cangxeih chixoeuq cho lhyi Petru gvshih phui kyoh goeus.

¹⁵Hauh cho ka lhaih toh, lvpe jens dah dang yah doeusgoh joq: hauh zis gas,

¹⁶Hauh dah thang lhyi ngos tauh los las, dyoq gyoh joq, Dawi dah zvng lyis doms tsuk das. Hau dyoq joq yvlyis ngos doms ci las toeu tsung toh das.

¹⁷Housoeh las gohtoeu dius nyau khanghmuh gas, Yhensain lhyi xo das. Ngah dius nyau kuot das xiklyis lui yoeus zis xauh dah gohnyau bang dvnganh gas ngos lyis xo das ge, hau dvnganh yvlyis kuot toh soeu,

¹⁸cangxeih mauthuq nyeiszvn lyis yah seq nhang goeus, ge.

¹⁹Housoeh yvmvyah, gohnyau bang mas Mangso jyank pheh lhain los bang lyis ma gis lhoqh yau oen nghamh.

²⁰Nghuot laus eq yang nyamoq lyis phvra silho dah vwot v-oeu vyhang, yauxi muh, lainzain lhyent sat shoh yahge suih lyis kyi das cho, maussauh yah gis kyoh kat, oen ngos nghamh.

²¹Khasoeh ge lyis Moshe Lyi gas Yuda No Buisnyeis khanghmuh lyi jungs mas nghap kyoh nyeis yvmvyah, gohnhamp caiq lyis yah, wus khanghmuh mas hauh dang taiq kyoh bang bos, ge.

²²Hauh uhlyis lvgyo jens yahge logis jens gas, phung gonh xam las nyamoq mas dah dius khyen las, Paulo yahge Barnaba yah dvgeh Antiok pheh nhang kat das cho tsain xamxonh. Houyah dvyhangteh boekyis mas uhshe bang Barsaba ge dah Yuda yahge Sila lyis khyen lha,

²³Nyah aiq yuk loq masyah lhaih huon kat dang gas, Ngamoq lvgyo jens yahge logis jens, boekyis gas, Antiok wus yahge Siria mau, Kiliki mau mas nyeis dah gohnyau bang boekyis jyank mas jeshuh kat.

²⁴Ngamoq jyank masyah gyangh thuq loh bang dvyhamh, ngamoq eq ma taiq kat zis, namoq lyis vthyoh tyomh las lyi chank chah ge dang yah taiq nhunk las ehnyet nyo nhang zis lyis ngamoq xauhgyo yvmvyah,

²⁵ngamoq dvgeh huom las, dvxam mha khyen yoeus dah Lvgyo jens lyis namoq jyank mas ngamoq dah jyetdap Barnaba yahge Paulo yah dvgeh nhang kat.

²⁶Hauh bang gas, yah Yhensain Yesu Khristu dah nyhenshang nyamoq dah kang lhyi kyauh toh goeus bang nghuot.

²⁷Housoeh las ngamoq gas Yuda yahge Sila lyis namoq jyank mas nhang kat. Hauh cho yah sen las nyah aiq yuk nhuot yah nyang, namoq lyis taiq kyoh das.

²⁸Khasoeh ge lyis Gyingshang Dyos yah ngamoq gis oen xamxonh zis gas, hai yhaugyen cho mas lai las gohtoeu lyei dah yvwons s lyis ma wons nhang das xiklyis nghuot.

²⁹Phvra lyis phudyei dah vyhang, suih, lainzain lhyent sat shoh yahge yauxi muh lyis jhank nyeis lyis gis. Namoq haih goeu lyis chank nyeis lyis gis. Yanghzan nyeis bas jungh, ge.

³⁰Nyamoq lyis nhang kat las Antiok mas jweh lyis, moqjens kyoh huom lha hau huon kat maussauh lyis tsain dyei.

³¹Hauh zis dye nghap lyis hau taiq kyingh dang gvng mas nyamoq gaus.

³²Yuda yahge Sila gas lvpe jens eq nghuot las, dang nyoshoq yah boekyis lyis taiq kyingh yomdyei.

³³Houmha dvyoq nyeis khoq thang lhyi, houmha dah boekyis gas nyamoq lyis nhang kat bang jyank mas nyenstap zis yah doms pont kat.

³⁴(Sila gas houmha nyeis shih das ge nghamh thyet las nyeis.)[6]

³⁵Paulo yahge Barnaba gas Antiok mas thoeng nyeis shih las, gohtoeu nyoshoq moq lyis Yhensain dah dang jyauh, taiq kyoh nyeis.

³⁶Buisnyeis gvgis lo nyangh los lyis, Paulo Barnaba lyis taiq zis gas, Yhensain dah dang taiq kyoh toh goeus dah wus khanghmuh mas dah boekyis khasoeh bweh nyeis zis lyis e doms komh goh, ge.

³⁷Barnaba gas Makho ge dah Yohan lyis shwih mes.

³⁸Nghuot laus eq Paulo gas nyang lyis nyah aiq yuk yah dvgeh shwih ma gis ge nghamh: khasoeh ge lyis nyang gas yoszoh masyah nyamoq yah ma loh loh, Pamphilia mau masyah nyah aiq yuk lyis toh khoq soeu nghuot, ge.

³⁹Housoeh nyah aiq yuk jo mas xam ma xonh goh yvmvyah Barnaba gas Makho lyis shwih las Kupru pheh lhyik yah goeu e.

⁴⁰Nghuot laus eq Paulo gas Sila lyis khyen toh lho tha, boekyis gas nyang lyis Mangso dah jyehjuh mas kyauh lho lyis nyah aiq yuk toq khoq.

⁴¹Housoeh Paulo gas Siria mau, Kiliki mau cho lai loh las phung lyis yom tsain dyei.