Read Achang LVGYO 16 Bible Online

LVGYO 16 - Achang bible

LVGYO 16

¹Derbe yahge Listra wus mas eq nyang jweh las, yoeuh aq, houmha Timothi ge dah changlo dvyuk nyeis. Nyah ungwes gas lomsjingh dah Yuda vmesbih nghuot las, nyah uwus gas Heleni nghuot.

²Listra yahge Ikoni wus mas nyeis boekyis gas, nyah dah wotwu gis cho lhyi tsain taiq.

³Paulo gas hauh soeu lyis shwih mes las, nyah uwus gas Heleni nghuot zis lyis houmha dah Yuda dius dvnganhmoq tsain seq yvmvyah, nyang lyis vthyoh tyomh dyei.

⁴Housoeh dvwus thang lhyi dvwus suh lai uhjyangh, Yerusalem mas dah lvgyo jens yahge logis jens taiq kat dang lyis tsain chank geh ge, nyamoq lyis dyei.

⁵Phung eq hau lomsjingh cho mas yombos los las lomsjingh bang nyeih khanghmuh je los.

⁶Gvshih Asia mau mas Dang taiq kyoh das zis Gyingshang Dyos nyamoq lyis tomp yvmvyah, nyamoq gas Phrigia yahge Galati mau lai las,

⁷Misia mau jweh bah ge lyis Bithuni mau pheh wvng loh das zis tsain sont. Nghuot laus eq Yesu dah Dyos gas nyamoq lyis vmingh ma dyei yvmvyah,

⁸Misia mau yvm cho lai las Troa wus mas tsain jweh loh.

⁹Hauh yvmas nyenh lyis Paulo nyoqnyvng nyvng zis gas, Makedoni dius dvyuk los yap las, Makedoni mau pheh goeu lyih las ngamoq lyis los bos pangh geh, ge nyang lyis sang.

¹⁰Hauh nyoqnyvng nyvng las Makedoni dius jens lyis gausyis dang taiq kyoh das xiklyis Yhensain yang lyis khi zis nghuot, ge nghamh yoeus las, Makedoni mau pheh goeu das xiklyis ngamoq houjang sont.

¹¹Housoeh yvmvyah ngamoq Troa masyah dan dan Samotrake goeujo pheh sangpho yah goeu loh lyis nungs nyeih Neapoli wus mas jweh loh.

¹²Hou mhayah doms lai lyis, Roma guon dah Makedoni wuxom mas dah wusmuh Philipi mas jweh las, hauh yvmas ngamoq dvyoq nyeis.

¹³Yuda No Buisnyeis jweh lyis, wus khomh nghe mas joq dah jeis yvm mas tsain e. Houmha shvmanh dung joqyos bos das teh mus las e tsung toh. Houmha tsain huom los dah vmesbih jens lyis taiq kyoh.

¹⁴Hauh uhlyis Mangso lhyi paiq soeu Thiatira wus mas dah nesnoq misseh ungh dah Lidia ge soeu ngamoq dah dang gyo yoeus las, Paulo taiq kyoh dang lyis lhom yoeus das xiklyis Yhensain gas nyah nhaiqlom phank dyei.

¹⁵Hauh vmesbih yahge nyah yhenbang jeisnyhop dye kham lyis, Yhensain mas ngos wontang lomsjingh goeus zis namoq suon yoeus goeus lyis gas, ngah yhen mas jenh wvng thoeng geh, ge khyoeuq khi las nyeis nhang. Ngamoq eq nyang yus zis yah dvyhangteh e thoeng.

¹⁶Ngamoq hau shvmanh dung joqyos mas e lyis, yius kuq dah lonyi dvyuk yah xauhgoh. Hauh soeu ka nyah yhensain moq lyis gyuis wvng zis yah ngwis svsoh yoh los nhang soeu nghuot.

¹⁷Hauh nyelo gas Paulo yahge ngamoq thang mas chank kaiq kaiq kuot zis gas, Haih bang gas namoq lyis khyuot yoeus cho taiq kyoh, nyhang thank Mangso dah jyeidwis jens nghuot, ge.

¹⁸Nyoshoq nyeih nyang housoeh mus las, Paulo nhaiqlom phot phot tsoeu las, lhain yoeuh las hauh yius lyis, Yesu Khristu dah nyings masyah ngos nvng lyis taiq, nyah jyank masyah thuq loh aq, ge nyho lho lyis, houjang yius gas nyelo jyank masyah thuq loh.

¹⁹Gvshih nyah yhensain moq gas ngwis wvng cho ma bos lo zis seq lyis, Paulo yahge Sila lyis nyhik las, kaih mas nyeis dah guon bang jyank mas she e.

²⁰Housoeh pyada jens dah xikkhonh mas nyah aiq yuk lyis shwih wvng las taiq zis gas, Haih Yuda jens yamoq dah wus lyis svsoh tsain lhoeu nhunk zis yahge,

²¹Yang Roma dius ma yoh kham yoeus, ma yoh chank lyi ma bos dah thungh los tsain jyauh nyeis, ge.

²²Housoeh las dius phung gas nyah aiq yuk lyis tyixo las jes kuot. Wus guon bang eq nyah aiq yuk dah dyi lyis lang chuiq tyamp dyei las, lvxuk yah xuk das cho taiq.

²³Housoeh nyah aiq yuk lyis nyoshoq lhain xuk thang lhyi thung mas tsain lhunk lho las, nyah aiq yuk lyis goeng goeng zungh das cho, thung vgyis lyis taiq toh.

²⁴Thung vgyis eq housoeh taiq toh dang gvng mas, nyah aiq yuk lyis thung khaulhunk yvp pheh hwank las khyei mas eq kyomh yah kyomh toh.

²⁵Nghuot laus eq gungsgvm ko lhyi Paulo yahge Sila shvmanh dung zis yahge Mangso lhyi tsain chungh nyeis lyis thung lungh bang gas nyah aiq yuk dah dang tsain gyo nyeis.

²⁶Hauh uhlyis maunyeis nyetlos nyettant dwis las, thung yhen-yos nonh los zis yahge khomh bangh tyamp las yuk khanghmuh lyis twih toh dah twih buis tyamp.

²⁷Thung vgyis soh los las thung khomh bangh joq zis nyvng lyis, thung dius jens phang loh goeus jyo yvmvyah nyah moengsa she las nyah gungs nyang sat shei zo das zis sont nyeis.

²⁸Paulo yomkat kaiq zis gas, Nvng nvnyang gungs lyis vgudwvng nhang, ngamoq dvnganh yah heimha nyeis, ge.

²⁹Hauh uhlyis nyang nyibung sang chi las yvpkhau mas wuih wvng loh las, gyuk nvn zoh lyis yah Paulo yahge Sila xikkhonh mas phvluk zomhgyuis toh.

³⁰Tsai, nyah aiq yuk lyis shwih thuq las taiq zis gas, Yhensain nhaiqtang eh, ngos khyuot yoeus zis xauh shoq ngos cha kuot chah lah, ge.

³¹Nyah aiq yuk taiq zis gas, Yhensain Yesu lyis lomsjingh aq; housoeh lyis nvng yahge nah dvyhen gonh khyuot yoeus zis xauh das, ge.

³²Housoeh nyang yahge nyah dvyhen gonh lyis Yhensain dah dang taiq kyoh.

³³Hauh nyenhyo nyang nyah aiq yuk lyis shwih loh las nyah aiq yuk dah dvm cheih dyei. Hauh shishenh lyis nyang yahge nyah dvyhen gonh houjang jeisnyhop tsain kham.

³⁴Tsai, nyang nyah yhen khau mas shwih wvng loh las zonoms yah phuqsoe uhjyangh Mangso lhyi lomsjingh los yvmvyah, nyang yahge nyah yhenbang dvgeh gauslaus nyeis.

³⁵Nyoq nyvng los lyis pyada zau jens gas, hauh vzomh lyis kat kat aq, ge jeslo jens lyis yah taiq nhang kat.

³⁶Thung vgyis gas hauh dang Paulo lyis taiq kyoh las, nyah aiq yuk lyis kat kat das zis zau jens taiq nhang yvmvyah, gvshih nyenstap zis yah thuq loh lo geh, ge.

³⁷Nghuot laus eq Paulo nyamoq lyis taiq zis gas, Ngah aiq yuk Roma dius dvnghuot yvlyis ma nyei yoeuh yoeuh dang thang ma thyet shih lyis svbih xikkhonh mas bat, thung khyoq lho las, gvshih tsoek yah gauh nhang kat das ge cvvq lhyeh? Ma nghuot, nyamoq gungs doeu nyang lyih kat kat bas jungh, ge.

³⁸Jeslo jens hauh dang zau jens lyis loh taiq kyoh lyis, nyah aiq yuk Roma dius nghuot zis xauhgyo lyis tsain gyuk las,

³⁹nyamoq gungs doeu nyang nyah aiq yuk jyank mas e las shangphu shwih thuq las hauh wus masyah jenh thuq loh das zis tsain khyoeuq.

⁴⁰Housoeh nyah aiq yuk gas thung masyah thuq las, Lidia yhen mas wvng loh. Housoeh boekyis lyis nyvng goeus ya nyamoq lyis nhaiqtaink toh khoq las tsain thuq loh.