Read Achang LVGYO 17 Bible Online

LVGYO 17 - Achang bible

LVGYO 17

¹Paulo yahge Sila gas Amphipoli yahge Apoloni wus lai lyis, Thesaloni wus mas jweh loh. Houmha Yuda jens dah lyi jungs dvkoeuq bos.

²Paulo gas nyah thungh yah dvyhangteh, lyi jungs mas wvng las, Yuda No Buisnyeis somh daus top Mangso dah Jyomp maussauh masyah nyamoq yah dvgeh xamgoh zis gas,

³Khristu gas shanghsenh chah zis yahge shei masyah dwis toq chah cho Jyomp maussauh masyah taiq las phui kyoh zis gas, Ngos namoq lyis taiq kyoh dah Yesu gas hauh Khristu nyang nghuot, ge.

⁴Nyamoq mas dvyhamh gas lomsjingh las Paulo yahge Sila yah tsain xonh. Hauh bang mas lomsjingh cho mas wontang dah Heleni nyoshoq yahge nyoqnho ngelang bos dah vmesbih jens eq nyoshoq bos.

⁵Nghuot laus eq Yuda jens gas noh las, kaih jang mas nyeis, lhung bang dvyhamh yah dvgeh moqphung dvkoeuq kuot las wus gonh lyis dius hoeu toq nhang. Nyamoq gas Paulo yahge Sila lyis moqphung mas shwih los das xiklyis xo nyeis lyis nyamoq gas Yason dah yhen lyis los khyang.

⁶Nyah aiq yuk lyis ma nyvng goeus ya, Yason yahge Lomsjingh bang dvyhamh lyis wus logis jens dah xikkhonh mas she los zis yah kaiq zis gas, Mungkvn gonh lyis vtauh vxoeu kuot bang gvshih heimha jweh goeus.

⁷Yason gas nyah aiq yuk lyis boengh lhom toh. Nyamoq dvnganh gas Yesu ge dah gohtoeu hwankti bos shih ge taiq yvmvyah Kesar dah lyi lyis tyixo khyvlyis kuot nyeis.

⁸Wugungs dius jens yahge guon bang hauh dang xauhgyo lyis, nhaiq tsain yo nyeis.

⁹Nghuot laus eq Yason yahge gohyhamh bang jyank masyah kham toh vyhang lhyi nyamoq yoeus toh las nyamoq lyis kat kat.

¹⁰Boekyis gas hauh nyeihyo nyang Paulo yahge Sila lyis Berea wus pheh nhang kat. Nyah aiq yuk houmha jweh lyis Yuda jens dah lyi jungs mas tsain wvng loh.

¹¹Houmha nyeis dah Yuda jens gas Thesaloni dius jens thoq lyis nhaiq zes bos. Khasoeh ge lyis nyamoq gas hauh dang mas nhaiqkank wvng zis yah lhom yoeus las, jus ma jus yoh seq das xiklyis Jyomp maussauh mas nyeih yau nyeih xo nghap yoeuh nyeis.

¹²Housoeh las nyamoq mas nyoshoq tsain lomsjingh. Nyoqnho ngelang bos dah Heleni vmesbih jens yahge vbusbih jens eq nyoshoq bos.

¹³Nghuot laus eq Thesaloni mas dah Yuda jens gas, Paulo Berea wus mas eq Mangso dah dang taiq kyoh nyeis cho xauhgyo lyis, nyamoq houmha eq chank jweh las dius jens lyis jaus jyuonh zis yah Paulo lyis jes mus nhang.

¹⁴Boekyis gas houjang Paulo lyis panglai jyankyvm mas jweh shoq pauq kat. Sila yahge Timothi gas nyeis khoq shih.

¹⁵Nghuot laus eq Paulo lyis e pauq kat bang gas Athen jweh shoq e shwih kat las, Sila yahge Timothi lyis lvnyap chank los das cho, tying kat dang wons las tauh los.

¹⁶Gvshih Paulo gas Athen wus mas nyah aiq yuk lyis langh uhjyangh thoeng nyeis lyis, hauh wus gonh phvra kyingh joq yvlyis nyang nyvng lyis nyah ehnyet ma nyens mus.

¹⁷Housoeh las nyang gas lyi jungs mas Yuda jens yah eq, Yuda lomsjingh cho mas wontang bang yah eq, nyeih yau nyeih kaih mas xauhgoh bang yah eq taiq phyen-goh xamgoh nyeis.

¹⁸Housoeh las, Epikuri cho yahge Stoik cho chank dah joeui kunk bang dvyhamh nyang yah taiq phyen-goh. Dvyhamh gas, haih nhuot thunk soeu cha taiq mes au lhyeh, ge. Gohyhamh gas gohmau phvra cho taiq kyoh soeu nghuot das, ge. Khasoeh ge lyis nyang Yesu dah cho yahge dwis toq dah gausyis loeus cho taiq yvmvyah nghuot.

¹⁹Nyamoq gas Paulo lyis shwih yoeus las Arepagu mas shwih loh las taiq zis gas, Hau nvng jyauh dah cho saiq ngamoq lyis seq nhang aq, ge dung.

²⁰Nvng taiq cho dvkhamh gas ngamoq xiklyis, mauh das teh ge xauhgyo. Housoeh las nvng cha taiq mes yvlyis ngamoq seq mes, ge.

²¹Gvshih Athen dius jens yahge houmha khau nyeis gohmau bang gas, jyauh cho vsaiq lyis tsain taiq nhamgoh zis yah kyingh, shishenh lai nhang nyeis.

²²Paulo Arepagu huom mas yap las taiq zis gas, Athen bang eh, namoq gas cho khat khanghmuh mas svsoh lomsjingh nyeis yvlyis ngos nyvng.

²³Khasoeh ge lyis, ngos namoq dah wus chank suh lai loh las namoq paiq dah vyhang lhyi jeih jeih yoeuh lyis, Ma seq dah Mangso dvkoeuq xiklyis, ge lhaih toh phon dvkoeuq lyis nyvng. Hau namoq ma seq seq paiq soeu dah cho, ngos namoq lyis taiq kyoh bah.

²⁴Mungkvn yahge houmha nyeis ya nyeis yvlyis gvnkhanh toh Soeu nghuot. Maukhung yahge nyeisjvng dah Yhensain nghuot las, dius loq yah kuot dah phvra yhen mas lungh joq zis ma nghuot.

²⁵Khasoeh ge lyis nyang gas dwis dah kang yahge yoh ya yoh yvlyis dyei soeu nghuot yvmvyah, nyang dvja ja chah soeu teh, dius loq yah phuqsoe chah zis ma nghuot.

²⁶Dius dvyuk kyingh masyah dius nyau dvnganh lyis gvnkhanh toh las, nyeisjvng gonh mas nyeis dyos nhang. Nyamoq khamha nyeis dyos das xiklyis maukyo yahge shishenh lyis gvn toeuq toh dyei.

²⁷Nyamoq gas Mangso lhyi xo wu zis yah nyvng lyis nyvng das. Nyang gas yang hank yah eq we nyeis zis ma nghuot.

²⁸Dius dvyuk taiq zis gas, Yang gas nyang mas nyeis las kang dwis nyeis. Namoq dah sodang svra dvyhamh taiq zis yah dvyhangteh, Yang eq nyah lo jens nghuot, ge.

²⁹Housoeh las yang gas Mangso dah vshih tsain nghuot yvmvyah, Mangso lhyi dius dah ehnyet yah nghamh toeuq las kuot dah ngwis, xing, luk yah kuot dah silho yah doeusgoh oen yang ma gis nghamh.

³⁰Ma xauhgyo, ma seq las lai loh goeus caiq lyis Mangso ka yoeuh lhaiq kat dyei las, gvshih gas joqyos khanghmuh mas nyeis bang dvnganh lyis, nhaiqlom thaiq das xiklyis nyang tying toh.

³¹Khasoeh ge lyis nyang khyen yoeus soeu dah loq yah mungkvn gonh lyis dan khyvlyis soetuon das xiklyis nyang buisnyeis dvnyeih toeuq toh. Nyang toeuq toh buisnyeis jyoengh bweh los das yvlyis dius khanghmuh xikkhonh mas kanghjyoeng Chixoeuq khyvlyis yah Yesu lyis shei masyah dwis toq los nhang goeus, ge.

³²Shei goeus bang dwis toq los ge dah cho xauhgyo lyis, dvyhamh bang gas jingh. Dvyhamh gas, Haih cho dvlhain doms gyo mes shih, ge.

³³Housoeh Paulo eq nyamoq jyank masyah thuq loh.

³⁴Nghuot laus eq dius dvyhamh gas nyang yah zomh las lomsjingh. Hauh moq mas Arepagu dius vgyis Dionisi, Damari ge dah vmesbih dvyuk yahge gohtoeu dius jens eq bos.