Read Achang LVGYO 19 Bible Online

LVGYO 19 - Achang bible

LVGYO 19

¹Apolo Korinthu wus mas nyeis nyeis lyis, Paulo gas thoq mau cho suh lai loh las, Ephesu mas jweh e. Houmha changlo dvyhamh yah xauhgoh.

²Nyang nyamoq lyis taiq zis gas, Namoq lomsjingh uhlyis, Gyingshang Dyos vxauh yoeus shih goh lah, ge. Nyamoq, nyang lyis taiq zis gas, Gyingshang Dyos ge zis yangh ngamoq ma xauhgyo ku, ge.

³Paulo nyamoq lyis taiq zis gas, Housoeh lyis namoq khasoeh teh jeisnyhop kham goh lah, ge. Nyamoq taiq zis gas, Yohan dah jeisnyhop kham, ge.

⁴Yohan dah jeisnyhop gas vsainnyang dah yaunos masyah lhain los bang lyis dyei dah jeisnyhop nghuot. Yohan Israel jens lyis taiq zis gas, Ngah thang mas jweh soeu lyis lomsjingh geh, hauh soeu ka Yesu nghuot. ge.

⁵Hauh bang hauh dang xauhgyo lyis, Yhensain Yesu dah nyings mas jeisnyhop tsain kham.

⁶Gvshih Paulo nyamoq thoq mas loq kih dyei goeus ya, nyamoq thoq mas Gyingshang Dyos jweh las nyamoq dang vja ja jis las lvpe tsain pe los.

⁷Nyamoq dvnganh lyis vbusbih dvci aiq yuk nghuot.

⁸Hauh thang lhyi Paulo gas lyi jungs mas wvng las Mangso munghdan cho lhyi womh womh lhamhmuh somh khyvp top yomsoq bos dah dang yah taiq kyingh.

⁹Nghuot laus eq dvyhamh gas nhaiqlom than zis yah ma lomsjingh, moqphung xikkhonh mas haih cho yah sen lha ma gis khyvlyis taiq los lyis changlo jens lyis shwih las hau joqyos toh khoq las Tiranu ge dah jyauh yvpmuh mas nyeih nyenh taiq goh nyeis.

¹⁰Housoeh aiq zvn gyo lyis jyauh las Asia mau gonh mas dah Yuda dius, Heleni dius Yhensain dah dang lyis tsain gyo yoeus.

¹¹Mangso eq Paulo loq masyah yomsoq muh chixoeuq goeus las,

¹²Paulo dah gungs yah tanh dah misseh, huyhauh teh zis dvja ja, nos bang jyank mas yoeus los lyis, hauh nos bang gis los. Yius wvng zis eq thuq loh.

¹³Hauh uhlyis yius khat thuq dyei yenh bang Yuda dius dvyhamh eq, yius kuq bang lyis Yhensain Yesu dah nyings yoeus las yius lyis khat zis yah taiq zis gas, Paulo taiq dah Yesu nyings yah ngos namoq lyis vmingh dyei bah, thuq loh geh, ge.

¹⁴Yuda Phudyei Zainsmuh Skewa dah loloeu nyhet yuk eq housoeh tsain kuot.

¹⁵Hauh uhlyis ma shop dah yius gas nyamoq lyis, Yesu lyis ngos seq, Paulo lyis eq ngos seq, nghuot laus eq namoq hank nghuot goh: ge.

¹⁶Hauh yius kuq soeu eq nyamoq thoq mas dyvm doq las nis ung tyamp. Housoeh nyamoq gas shohthungh shohnyhoq shohchen hauh yhen masyah phang thuq loh.

¹⁷Hauh cho lhyi Ephesu mas dah Yuda, Heleni dius dvnganh xauhgyo lyis, nyamoq gyuk dvn mauh las Yhensain Yesu dah nyings lyis chungh nyeis.

¹⁸Lomsjingh goeus bang nyoshoq eq lyih las vsainnyang kuot shuot cho cu rhen.

¹⁹Mandan muot zo bang nyoshoq eq, nyamoq dah maussauh tsain chi lyih las, dius dvnganh dah xikkhonh mas ngheq tyamp. Hauh maussauh phauh suon yoeuh lyis ngwis kyvp[7] oeng mons ko phauh nghuot.

²⁰Housoeh Yhensain dah dang gas yomsoq zainsmuh yah ung los.

²¹Hauh cho bweh thang lhyi, Paulo gas Makedoni mau yahge Akhaia mau dye suh lai loh las, Yerusalem mas doms e das, hou mhayah Roma wus pheh eq jweh yoeuh das, ge ehnyet mas nghamh[8] toh.

²²Housoeh yvmvyah nyang lyis bos pangh vzomh Timothi yahge Erastu lyis shih Makedoni mau pheh nhang kat las, nyang gas Asia mau mas dvyoq nyeis khoq shih.

²³Gvshih hauh gyo lyis, hauh cho gvng mas dius hoeu chetchet lo toq los.

²⁴Khasoeh ge lyis Demetrio ge dah ngwis shonh soeu ka Artemi dah ngwis phvra gyamhlo kuot zis yah shonh bang lyis ngwis nyoshoq yoh nhang nyeis.

²⁵Hauh soeu ka nyah ngwis shonh changh jens yahge gohtoeu hauh muh kuot zo bang dvnganh lyis khi huom las taiq zis gas, Loeuzomh jens eh, haih muh yah kyingh yang dis nyeis zis gas namoq nyang seq.

²⁶Nghuot laus eq gvshih gas, Ephesu wus mas kyingh yangh ma nghuot lo, Asia vluk dvmau gonh nghuot shoq, haih Paulo ge soeu ka, Dius loq kuot zis gas phvra ma nghuot ge, dius nyoshoq lyis nyang taiq dang yoh jingh nhang loh goeus.

²⁷Housoeh yvmvyah, yah dah muh gas jwangh zis xauh thoq lyis magoh kuhxing dah gywes lonyi Artemi dah paiq yhenmuh eq dius jens ma phauh lo zis yahge Asia mau yahge mungkvn gonh paiq dah gywes lonyi dah nyoqnho ngelang lhoeu thyoq tyamp das zis eq chiq chank bos, ge.

²⁸Hauh dang tsain xauhgyo lyis nyamoq nhaiqyo las Ephesu dius dah Artemi gas kuhxing ge tsain kaiq.

²⁹Housoeh hauh wus gonh hoeu las, Paulo dah gyung suh changh Makedoni dius Gai-u yahge Aristaku lyis nyhik she las, nyamoq dah pwe gus mas wuih e.

³⁰Paulo eq haih moqphung mas wvng mes laus eq changlo jens nyang lyis tomp toh.

³¹Paulo yah seq goh, hauh wus mas dah dius zains dvyhamh eq nyang lyis pwe gus mas ma wvng das xiklyis taiq nhang kat.

³²Hauh uhlyis moqphung gas, vnhunk nhunk mus nyeis las gohyuk gohja tsain kaiq. Nyamoq nyothyang gas vsainnyang chamus lyih tsain huom zis yangh ma seq.

³³Gvshih Yuda dius jens Alesanda lyis jyuonh las moqphung mas toqh kat. Alesanda eq moqphung sam das xiklyis loq vsoh dyei las taiq bah ge cvvq.

³⁴Nghuot laus eq nyang Yuda dius nghuot zis seq lyis, dvnganhmoq gas dvyih dvyot, Ephesu jens dah Artemi gas kuhxing, ge aiq shishenh ko nyangh shoq tsain kaiq nyeis.

³⁵Wus mas lhaih comh soeu ka hauh moqphung lyis dye sam nhang thang lhyi taiq zis gas, Ephesu bang eh, haih Ephesu wus gas kuhxing dah Artemi gywes lonyi dah yhenmuh yahge maukhung mas gyoh los dah gungslho lyis tsainh toh joqyos nghuot yvlyis ma seq soeu hank bos lah?

³⁶Hauh cho ka ma yoh ngoek cho nghuot yvmvyah ehnyet nyens nyens nyeis gis zis yahge ma nghamh yoeuh muh ma gis kuot.

³⁷Nyamoq gas yah phvra yhen lyis thyoqzo dyei bang eq ma nghuot, yah gywes lonyi lyis loeusmus soqzo bang eq ma nghuot zis, namoq haih bang lyis she los lhyeh?

³⁸Housoeh yvmvyah Demetrio yahge nyah ngwis loqmuh zwi bang dvyuk lyis kauq chank bos lyis, soetuon jang phank toh, mungh zau eq nyeis, nyamoq nyang changh nyang zau kauq goh das.

³⁹Hei mhayah lai las seq mes cho dvja ja bos lyis, lyi wvng dah wus moq huom mas taiq thyet bas jungh.

⁴⁰Khvnyhik haih bang hoeu dah muh haih zis gas vyang ma bos yvmvyah, yang lyis yobos huon das zis chiq chank bos. Heisoeh teh hoeu yvlyis chamus bweh nhang ge dah phuk dang ngamoq ma yoh, ge.

⁴¹Nyang hauh zis dye taiq lyis hauh moq huom lhyi tyo tyamp.