Read Achang LVGYO 2 Bible Online

LVGYO 2 - Achang bible

LVGYO 2

¹Pentekoti buisnyeis jweh lyis, nyamoq dvnganhmoq yah dvkhyiq thaq dvgeh huom toh.

²Hauh uhlyis maukhung masyah uklyeis los teh, nyetlos nyettant nyings thuq los thwe ka, nyamoq tsung toh dah yvpkhau mas dyingh los.

³Nyilhyam teh zis eq thuq los las, nyamoq nyang yuk nyang toeu dah thoq mas lyih no joq.

⁴nyamoq dvnganh eq Gyingshang Dyos dyingh las, Dyos yah jyuonh zis yah dvyhangteh, gohtoeu nyingh yah tsain taiq los.

⁵Hauh uhlyis maukhung o mas nyeis ya nyeis dah dius nyau khanghmuh mas nyeis las, lomsjingh cho mas wontang dah Yuda jens gas, Yerusalem wugungs mas nyeis.

⁶Hau nyings dah thwe xauhgyo lyis, somci moqmuh gas zain los zis yah nyamoq yuk khanghmuh changlo jens taiq dah dang lyis vsainnyang nyingh yah xauhgyo yvmvyah tsain mauh dvn nyeis.

⁷Nyamoq mauh dvn las taiq zis gas, Yoeuh aq, gvshih hai taiq nyeis bang dvnganh gas, Galile dius kyingh ma tsain nghuot lhyeh?

⁸Housoeh lyis yang yuk khanghmuh vsainnyang choq thyet mau mas dah nyingh pheh yah yoh gyo yoeus zis gas khasoeh au lhyeh?

⁹Yang gas Parthi, Mede, Elam mau mas bang yahge Mesopotamia mau, Yuda mau yahge Kapadokia mau, Pontu yahge Asia,

¹⁰Phrigia yahge Pamphilia, Egutu yahge Kureni wuxom mas nyeis dah Libya mau mas bang, Roma masyah los dah boenghwus, Yuda dius jens yahge Yuda phung mas wvng bang,

¹¹Kreti yahge Arabia mau mas bang, yang dvnganh gas Mangso dah mauhphoh muhzoh cho, nyamoq taiq kyoh dang lyis nyang yuk nyang toeu nyingh pheh yah xauhgyo goeus, ge.

¹²Housoeh nyamoq dvnganhmoq yah mauh khamkhvv las, Heisoeh ge zis gas cha nghuot au lhyeh, ge nyang changh nyang taiq goh.

¹³Nghuot laus eq dvyhamh gas, nyamoq lyis jwangh zis yah taiq zis gas, Haih bang gas zvbiq saiq shuk yet, ge.

¹⁴Hauh uhlyis Petru gas, lvgyo dvci dvyuk moq yah dvgeh toq yap las thwe than yah taiq zis gas, Yuda mau mas bang yahge Yerusalem mas nyeis bang eh, namoq haih cho seqgyo bas jungh, ngah dang lyis eq gyo yoeus geh.

¹⁵Namoq nghamh yhangteh haih bang zvbiq yet zis ma nghuot: Khasoeh ge lyis gvshih gau shishenh dvnghuot shih.

¹⁶Haih cho ka lvpe Yoel taiq toh dang nghuot. Houka,

¹⁷Mangso heisoeh ge, Thang thank buisnyeis lyis ngah Dyos, Dius dvnganhmoq thoq mas huot khyoq las, namoq dah loloeu lonyi jens lvpe pe das; namoq dah wotyamh jens nyoqnyvng nyvng las, namoq dah lokhoq jens yhetmoq moq das.

¹⁸Nghuot goeus, hauh buisnyeis lyis Ngah jyeidwis phoq, jyeidwis nyhiq jens thoq mas Ngah Dyos huot khyoq las, Nyamoq lvpe pe das.

¹⁹Ngos gas maukhung thoq mas mauh loqmuh, nyeisjvng mas vlho vja ja, Suih, nyi, nyikhauh soq lyis chixoeuq das.

²⁰Kuhxing duk bvng ge dah hauh Yhensain dah buisnyeis ma jweh shih lyis, Buis gas mauchuotdwang bweh tyamp das, Lhamhmuh gas suih teh bweh das.

²¹Hauh uhlyis Yhensain nyah nyings lyis lui soeu khanghmuh khyuot yoeus zis xauh das, ge.

²²Israel dius jens eh, haih dang gyo yoeus geh: Mangso ka Nazaret phoq ge dah Yesu loq masyah namoq mas yomsoq muh, mauh loqmuh yahge vlho kuot xoeuq yvmvyah, nyang gas Mangso khyen toeuq toh soeu nghuot yvlyis chixoeuq zis gas namoq seq.

²³Haih soeu ka Mangso nghamh toh goeus joeui yah xiq toh zis yah dvyhangteh, namoq gas lyi ma chi bang dah loq mas kyauh tyamp las, nyang lyis tapzains mas taplhangh sat.

²⁴Nghuot laus eq shei, nos dah shohjyen zis lyis Mangso khyuot tyamp dyei las, nyang lyis dwis toq los nhang. Khasoeh ge lyis hau shei zis gas, nyang lyis yoh zwi kyamp toh zis ma nghuot.

²⁵Khasoeh ge lyis, hauh soeu yah sen las Dawi taiq zis gas, Yhensain lhyi nah xikkhonh mas vjangh nyvng goeus; Ngos ma lop ma loeh bas jungh ge Nyang ngah loqyos shot pheh nyeis.

²⁶Housoeh las ngah nhaiqlom gauslaus nyeis zis yahge, Ngah lhyo gauslaus nyeis. Ngah gungsshoh eq nghamhloms nyeis das.

²⁷Khasoeh ge lyis nvng ngah dyos lyis shei mau mas ma toh tyamp; Nvng nah Gyingshang Soeu dyoqbis xauh das zis ma gyo.

²⁸Kang dwis cho nvng ngos lyis seq nhang. Nah xikkhonh mas nvng ngos lyis gausyis zis yah tyink dyei das, ge.

²⁹Boekyis eh, yah phauh thyeih Dawi gas shei las nyhop zis xauh goeus, nyah lop gas khvnyhik jweh shoq yang yah dvgeh joq zis lyis, ngos namoq lyis womh womh taiq bah.

³⁰Nyang gas lvpe nghuot zis yahge, nyah nyei nyet mas zis dvyuk gas nyah hwankti tank mas tsung nhang das ge Mangso nyang lyis maukhi lha dangthoengh toh yvlyis seq yvmvyah,

³¹Khristu dah dwis toq los cho nyang uhlhomh nyvng las, nyah dyos lyis shei mau mas ma toh tyamp das zis yahge, nyah gungsshoh dyoqbis ma xauh das cho taiq toh.

³²Yesu haih yuk lyis nyang Mangso dwis toq nhang goeus; Ngamoq dvnganh eq haih cho dah kanghjyoeng nghuot.

³³Nyang gas nyah Uwus Mangso dah loqyos shot pheh toqh yoeus zis xauh goeus zis yahge Mangso nyang lyis dangthoengh toh zis yah dvyhangteh nyah jyank masyah Gyingshang Dyos lyis xauh lhom yoeus goeus. Gvshih namoq nyvng las xauhgyo zis gas, ngamoq thoq mas nyang huot khyoq dah jyungshuk nghuot.

³⁴Khasoeh ge lyis Dawi gas maukhung mha toqh kat zis ma xauh laus eq nyang nyang heisoeh ge: Hauh Yhensain ngah Yhensain lhyi taiq zis gas,

³⁵Ngos nah jeswus lyis nah nangte kuot shoq, Nvng ngah loqyos shot pheh tsung toh aq, ge.

³⁶Housoeh yvmvyah namoq tapzains mas taplhangh sat goeus dah Yesu lyis Mangso ka Yhensain yahge Khristu bweh nhang zis gas, Israel yhenbang dvnganh top seq yoeus geh, ge.

³⁷Hauh zis tsain xauhgyo lyis nyamoq ehnyet mas zangh las, nyamoq gas Petru yahge gohtoeu lvgyo jens lyis taiq zis gas, Boekyis eh, ngamoq khasoeh kuot das lah, ge.

³⁸Petru nyamoq lyis taiq zis gas, Namoq dah yaunos khyuot dyei das xiklyis namoq yuk khanghmuh nhaiqlom thaiq las, Yesu Khristu dah nyings mas jeisnyhop kham geh. Housoeh lyis Gyingshang Dyos ge dah jyungshuk gas namoq xauh yoeus das.

³⁹Khasoeh ge lyis hauh dangthoengh gas namoq yahge namoq dah lo jens xiklyis nghuot las, we we mas nyeis bang dvnganh yahge Yhensain Mangso khi yoeus dah bang dvnganh xiklyis nghuot, ge.

⁴⁰Dang gohtoeu nyoshoq yah eq nyang nyamoq lyis taiq kyingh yomdyei taiq zis gas, Vsainnyang gungs lyis hai ung lhung dah vcaiq masyah lhuiq yoeus geh, ge.

⁴¹Housoeh nyah dang lyis lhom yoeus bang lyis jeisnyhop dyei las, hauh nyeihyo dius somh khyoengh ko lung los.

⁴²Hauh bang gas lvgyo jens dah jyauh cho, dvgeh zomh cho, ohlhyoq khyiq gvm cho yahge shvmanh dung cho mha wontang tsain chank.

⁴³Lvgyo jens masyah eq mauh loqmuh yahge vlho nyoshoq kuot xoeuq las, dius jens dvnganh gyukwoms los.

⁴⁴Lomsjingh bang dvnganhmoq gas dvjoq mas dvgeh huom lha, nyamoq yoh dah vyhang dvnganh xonh yhung.

⁴⁵Nyamoq gas vsainnyang dah kyahsoe zisyos lyis eq ungh las, dvnganh lyis nyamoq chah zis yah dvyhangteh gvm dyei.

⁴⁶nyamoq gas nyeih yau nyeih yhenmuh mas zophuom lha, nyamoq dah yhen mas gaus gaus yis yis dyei mes ehnyet yah chomp zo shuk.

⁴⁷Housoeh nyamoq gas Mangso lhyi chunghtoq zis yah dius dvnganh dah chungh cho lhyi xauh lhom yoeus. Nyeih khanghmuh Yhensain gas khyuot yoeus xauh bang lyis nyamoq phung mas je los nhang.