Read Achang LVGYO 20 Bible Online

LVGYO 20 - Achang bible

LVGYO 20

¹Gvshih hau hoeu cho sam tyamp thang lhyi, Paulo gas changlo jens lyis khi yoeus las taiq kyingh yomdyei toh khoq lho las jeshuh las Makedoni mau pheh e das zis thuq loh.

²Hauh wuxom cho suh lai las taiq kyingh yom dye dyei lyis Akhaia mau mas jweh loh.

³Houmha lhamhmuh somh khyvp nyeis khoq las, Siria mau pheh doms goeu loh das cvvq lyis, Yuda jens nyang lyis lhom yvmvyah, Makedoni cho doms tauh loh das ge nghamh toh.

⁴Hauh uhlyis nyah thang chank yenh bang gas, Berea wus mas dah Piru dah lo Sopata; Thesaloni wus mas dah Aristaku yahge Sekundu; Derbe wus mas dah Gai-u; Asia mau mas dah Tichiku, Trophimu; yahge Timothi nghuot.

⁵Nyamoq gas xik lyis loh las Troa wus mas ngamoq lyis langh nyeis.

⁶Ngamoq eq bicheih ma kat ohlhyoq zo pwe lai thang lhyi, Philipi wus masyah goeu las oeng nyeih nyangh thang lhyi Troa wus, nyamoq jyank mas jweh lyis houmha nyhet nyeih tsain thoeng.

⁷Dvdaus dah cangxeih vnyeih lyis ohlhyoq khyiq das xiklyis changlo jens zain joq lyis, Paulo gas nungs nvp thuq das zis sont yvmvyah, nyamoq lyis gungsgvm jweh shoq hauh dang taiq kyingh nyeis.

⁸Hau nyamoq huom joq, thoq yvp mas nyibung nyoshoq duk nyeis.

⁹Khomhbaiq mas Utiku ge dah loyvm phoq dvyuk tsung las yhet joq. Paulo dang taiq xing nyeis shih lyis hauh soeu yhet muih loh las, somh tsank yhen masyah dyet gyoh loh. Nyamoq nyang lyis e kui uhlyis nyang shei goeus.

¹⁰Housoeh Paulo gyoh loh las hauh soeu lyis po yoeus las taiq zis gas, Vchiq goh nyang kang bos shih, ge.

¹¹Paulo doms doq loh zis yah, ohlhyoq khyiq las zo lho las, nyoqnyvng shoq nyamoq yah dang xing xing dye jisgoh thang lhyi, thuq loh.

¹²Nyamoq hauh loyvm phoq lyis vdwis shwih loh las, nhaiqtaink zis nyoshoq xauh.

¹³Paulo gas tungyos cho loh das zis sont toh yvmvyah nyang lyis Aso wus masyah sangpho mha shwih tsung das khyvlyis ngamoq nyah xik pheh hauh wus mas sangpho yah loh langh.

¹⁴Nyang Aso wus mas ngamoq yah xauhgoh goeus ya, nyang lyis sangpho shwih tsung lha, Mitilen wus pheh goeu e.

¹⁵Ngamoq hou mhayah doms toq lyis, nungs nyeih Kio mas jweh loh. Hou mhayah dvnyeih nyangh lyis Samo mas jweh loh. Hauh nungs nyeih Miletu wus mas jweh loh.

¹⁶Khasoeh ge lyis Paulo gas Yerusalem mas Pentekoti buisnyeis duons lyis duons shoq ge mangh nyeis las, Asia mau mas buisnyeis ma thank nhang mes yvmvyah, Ephesu wus lyis lai toh khoq das ge nghamh toh.

¹⁷Gvshih Paulo gas Miletu wus masyah Ephesu wus, phung mas dah logis jens lyis khi nhang kat.

¹⁸Nyamoq nyah jyank mas jweh lyis nyang nyamoq lyis taiq zis gas, Ngos Asia mau mas vsaiq wvng nyeih masyah khvnyhik jweh shoq ngos kang khasoeh dwis zis namoq seq.

¹⁹Ngos Yhensain dah muh wons wuq yvmas ehnyet khyoq las, ngausdyeis ngausnhvp yah Yuda jens lhom cho dah yaukyenh shanghsenh vja ja lyis kham zo zis yah ehnyet khyoq las ngausdyeis yah Yhensain dah muh lyis ngos wons wuq lai los.

²⁰Namoq xiklyis vkyuh bos dah muh lyis zwi cho mas ngos khanhamp eq nungs ma jik, namoq lyis hauh dang taiq kyoh las dvyhen dvyhen bvng bvng jyauh goeus.

²¹Yuda dius yahge Heleni dius eq yaunos masyah Mangso jyank pheh lhain los las, yah Yhensain Yesu lyis lomsjingh das xiklyis ngos khoek khoek choshet toh.

²²Gvshih yoeuh aq, ngos Dyos lyis domsyos gyo zis yah Yerusalem mas loh chah nyeis. Houmha ngos cha mus das zis gas ngos ma seq.

²³Thung lungh das zis yahge shoeuhshih das zis gas ngos lyis langh nyeis ge, wus khanghmuh mas Gyingshang Dyos gas ngos lyis zaih nhang cho kyingh ngos dvseq.

²⁴Nghuot laus eq ngos gas ngos chank chah cho lhyi yoh nyhuk das zis yahge Mangso dah jyehjuh gausyis dang kanghjyoeng kat das xiklyis, Yhensain Yesu jyank masyah ngos xauh yoeus dah muh lyis eq, dye wons wuq das xiklyis ngos ngah kang lhyi ma yu.

²⁵Yoeuh aq, ngos hai maukhung munghdan cho taiq kyoh yenh yoq lyis xauhgoh, zomh yoeuh bang namoq dvnganhmoq, thang pheh ngah nyoqnho lyis ma doms nyvng lo das zis ngos seq.

²⁶Housoeh las dius hank dah suih eq ngah jyank mas ma dap zis gas, ngos khvnyhik namoq lyis kanghjyoeng kat.

²⁷Khasoeh ge lyis Mangso nghamh toeuq cho dvnganh zis namoq lyis taiq kyoh cho lhyi ngos khanhamp eq ma chilhaiq.

²⁸Mangso ka nyah suih yah wis dah Mangso dah phung lyis yoeuh das gomh das xiklyis, Gyingshang Dyos namoq lyis uhshe bang kuot nhang goeus yvmvyah, namoq gas vsainnyang gungs yahge yvng phung gonh lyis wontang yoeuh nyeis geh.

²⁹Ngos thuq loh thang lhyi yvng phung lyis nhaiq ma nyen, wus dah cauhpau jens gas namoq mas wvng las yvng phung lyis nyamoq o khyvlyis kuot tyamp das zis ngos seq.

³⁰Namoq mas gomloeus pan bang toq los las changlo jens lyis eq chowhang shwih whang das.

³¹Housoeh las ngos namoq dvnganhmoq lyis somh zvn top nyeih nyenh ma no lo nyoqdyeis yah taiq kyingh toh zis lyis soh las phuksohlhaiq kuot geh.

³²Mangso dah nhaiqnyen shohgyo dah loq yah, nyah jyehjuh Dang mas kyauh toh. Hauh dang gas namoq lyis yoh kuhxing los nhang zis yahge Mangso nyah dius jens dvnganh lyis dyei dah jyehjuh jyungshuk gas namoq lyis xauh kham zo nhang.

³³Ngos gas hank dah ngwis xing, dyimis lyis eq nyoqnoq o ma bos ku.

³⁴Nghuot goeus haih loq gas ngah gungs yahge ngah Muh wons changh jens chah dah cho khat khanghmuh kuot dyei loq nghuot yvlyis namoq nyang seq.

³⁵Housoeh tungh kuot las yom ma bos bang lyis bos gis thuk cho eq, lhom yoeus thoq lyis dyei zis gas nge zes lhoq ge, Yhensain Yesu nyang taiq dang lyis soh las ngos kuot teh kuot dah muh mas yomnhuk bang lyis yoh pangh das xiklyis ngos namoq lyis yikhyoh chixoeuq goeus, ge.

³⁶Housoeh dye taiq lho las, nyang nyamoq dvnganhmoq yah dvgeh phvluk zomhgyuis las shvmanh dung.

³⁷nyamoq dvnganhmoq ngaus zis yah Paulo lainzain lyis po las nyang lyis bvlot tanh.

³⁸Thang pheh nyah nyoqnho ma xauh nyvng lo das, ge dah dang khonh mas nyamoq nhaiq zes kuk. Hauh thang lhyi Sangpho jweh shoq eq nyang lyis e tsain pauq kat.