Read Achang LVGYO 21 Bible Online

LVGYO 21 - Achang bible

LVGYO 21

¹Ngamoq nyamoq lyis kangh toh khoq las Kosa goeujo dan dan goeu loh. Nungs nyeih Rode mas tsain jweh, hou mhayah Patara wus mas jweh.

²Phoenisia mau pheh goeu dah sangpho nyvng las hauh zis yah tsung loh.

³Kupru goeujo nyvng kat lyis, hauh loqyos shot pheh lai loh las, Siria mau pheh goeu gyoh las sangpho mas dah hu khyoq das xiklyis Taire wus mas thoeng.

⁴Houmha dah changlo jens lyis loh xauhgoh zis yah ngamoq hauh wus mas nyhet nyeih nyeis khoq. Hauh bang eq Paulo lyis Yerusalem pheh ma loh das xiklyis Dyos yah taiq.

⁵Nyhet nyeih lai thang lhyi ngamoq thuq las tsoq loh lyis, houmha bang vmesbih jens yah dvgeh wus nghe jweh shoq chank pauq kat. Jyankyvm mas jweh lyis ngamoq dvnganhmoq phvluk zomhgyuis las shvmanh tsain dung.

⁶Dye lyis dvyuk yah dvyuk jeshuh goh thang lhyi, ngamoq sangpho khau mha wvng las, nyamoq eq yhen pheh tauh loh.

⁷Ngamoq Taire wus masyah jeis cho tsoq loh lyis Ptolemai wus mas jweh loh. Houmha ngamoq lomsjingh bang yah xauh jhent goh zis yah nyamoq yah dvgeh dvnyeih nyeis khoq.

⁸Nungs nyeih ngamoq hou mhayah Kesare wus mas jweh loh. Housoeh nyhet yuk mas dvyuk nghuot las, gausyis dang taiq kyoh soeu svra Philip yhen mas ngamoq boengh wvng doq khoq.

⁹Hauh soeu ka lvpe seq pe dah lonyi gyingh nyhet yuk yoh.

¹⁰Ngamoq nyah yhen mas dvyoq nyeis lyis, Yuda mau masyah Agabu ge dah lvpe dvyuk jweh los.

¹¹Housoeh nyang ngamoq jyank wvng las Paulo dah dyichih nyah khyei nyah loq mas yoeus twih lho las taiq zis gas, Gyingshang Dyos heisoeh taiq nyeis. Haih dyichih sain lyis Yerusalem mas Yuda jens yah heisoeh twih las gohnyau loq mas kyauh das, ge.

¹²Ngamoq hauh dang xauhgyo lyis, ngamoq yahge houmha bang gas, nyang lyis Yerusalem mas ma loh das xiklyis tsain taiq kyingh.

¹³Paulo phuk taiq zis gas, Namoq chamus tsain ngaus las ngos lyis nhaiqngis nhang goh lah? Twih zis za ma nghuot, Yhensain Yesu dah nyings xiklyis Yerusalem mas loh shei kham das zis yangh cicont nghuot, ge.

¹⁴Housoeh ma yoh jyoeuq lo goeus ya, Yhensain dah ehnyet dvnghuot lo oen ngamoq eq samlo nyeis.

¹⁵Hauh thang lhyi ngamoq gas dyens sont las Yerusalem pheh loh.

¹⁶Kesare mas dah changlo jens dvyhamh eq ngamoq yah dvgeh loh zis yah, ngamoq boengh loh doq das dah yhensain, changlo nyoshoq zvn duot goeus soeu Kupru dius Manason dah yhen mas tsain shwih loh.

¹⁷Ngamoq Yerusalem mas jweh lyis, boekyis gas ngamoq lyis gausyis zis yah lhom yoeus.

¹⁸Nungs nyeih Paulo gas ngamoq yah dvgeh Yaku jyank mas lamh e lyis logis jens dvnganh eq huom joq langh.

¹⁹Nyamoq yah dye jhent goh las, nyang wons wuq muh mas, gohnyau bang mas Mangso bweh nhang cho dvkoeuq thang lhyi dvkoeuq taiq kyoh.

²⁰Hauh zis xauhgyo lyis nyamoq eq Yhensain lhyi chungh las nyang lyis taiq zis gas, Vmang eh, Yuda dius mas lomsjingh bang khyoengh soe mons soe nyo zis gas nvng seq. Hauh bang dvnganh gas Lyi mas nhaiq wvng bang kyingh nghuot.

²¹Nghuot laus eq gohnyau bang mas loh nyhamh toh dah Yuda dius dvnganh lyis, vsainnyang dah lo jens lyis vthyoh tyomh cho ma kuot dyei noh, nyamoq thungh ma chank noh, ge Moshe Lyi ma chank das khyvlyis nyang jyauh, ge dah dang gas hauh bang dvnganh dye xauhgyo goeus.

²²Khasoeh kuot das? Nvng jweh zis nyamoq jyoengh xauhgyo hah das.

²³Housoeh las ngamoq taiq teh chank kuot aq. Ngamoq jyank mas dangthoengh toh bang nyei yuk bos.

²⁴Nah cho yah sen las nyamoq xauhgyo dah loeus gas ma jus zis yahge, nvng gas Lyi lyis phauh nyang las chank kuot nyeis zis lyis nyamoq seq das xiklyis haih bang lyis nvng shwih las, nvng eq nyamoq yah dvgeh cheihshang cho kuot aq. Nyamoq dah uhyuk phauh nvng kham aq.

²⁵Nghuot laus eq lomsjingh dah gohnyau bang dah cho ngamoq nghamhthyet cho maussauh yah nyamoq lyis seq nhang goeus. Nyamoq gas phvra lyis kyangh goeus dah vyhang yahge suih, lainzain lhyent sat shoh, yauxi cho lyis jhank chah, ge.

²⁶Hauh thang lhyi Paulo hauh vbusbih jens lyis shwih las, nungs nyeih nyah cheihshang cho lhyi nyamoq yah dvgeh kuot. Hauh thang lhyi, nyang yhenmuh mas wvng las cheihshang thungh lyis khanyhoq nyeih nyangh thang lhyi tyeh las nyamoq dvyuk yah dvyuk xiklyis phudyei das cho loh taiq kyoh.

²⁷Hau nyhet nyeih vluk dyingh los nyeis lyis Asia mau mas dah Yuda jens gas yhenmuh mas Paulo lyis nyvng lyis, moqphung lyis jyuonh las, Nyang lyis nyhik las kaiq zis gas,

²⁸Israel dius jens eh, bos pangh geh. Haih soeu ka joqyos khyiq khanghmuh mas bang dvnganh lyis yah vnyau yahge Lyi lyis eq, haih joqyos lyis eq, Lyi yah ma huq khyvlyis jyauh soeu nghuot. Hauh thoq lyis magoh, yhenmuh mas Heleni dius shwih wvng las haih Gyingshang joqyos lyis vwot v-oeu kuot, ge.

²⁹(Khasoeh ge lyis, Trophimu ge dah Ephesu dius dvyuk lyis wus mas Paulo yah dvgeh nyamoq nyvng goeus las, hauh soeu lyis yhenmuh mas shwih wvng goeus ge tsain nghamh.)

³⁰Dvwus gonh hoeu lha, moqjens tsain wuih wvng los las, Paulo lyis nyhik, yhenmuh masyah she thuq lho las khomh eq dvlhain dvm nyheih tyamp.

³¹Housoeh Paulo lyis sat das zis sont nyeis lyis, thoenkgus jesdvp guon dah zauzains jyank mas Yerusalem gonh hoeu nyeis cho loeus jweh loh.

³²Nyang gas jeslo jens yahge jes dvxo guon zau jens lyis shwih las nyamoq jyank pheh dvlhain dvm wuih e. Nyamoq gas jeslo jens yahge zauzains moq lyis nyvng lyis, nyamoq Paulo lyis lyuk zis tsain no.

³³Housoeh zauzains e las Paulo lyis she yoeus lho las jvngchoh aiq khat yah twih das zis vmingh dyei. Paulo hank nghuot? Nyang cha cu zis eq nyei yoeuh.

³⁴Moqphung gas dvyhamh dvja ge kaiq zis yah nyo hoeu yvmvyah, vlhomuh ma yoh seq shih lyis Paulo lyis thoenkgus jesdvp khau mas kat toh das xiklyis vmingh dyei.

³⁵Zvmlhangh mas jweh lyis, moq dius gas ehnyet gywes zis yah Paulo jyank dyvm los yvmvyah, jeslo jens yah nyang lyis po doq loh.

³⁶Chank los dah moqjens gas, Nyang lyis sat geh, ge tsain kaiq nyeis.

³⁷Paulo lyis thoenkgus jesdvp khau mas kat bah ge loqzoh mas, Paulo zauzains lyis taiq zis gas, Ngos nvng lyis dang dvkhonh vyoh taiq das lah, ge. Zauzains phuk taiq zis gas, Nvng Heleni nyingh seq lah, ge.

³⁸Housoeh lyis nvng gas khvlyens shih gomloeus toq las mhanhdyvp mas dius nyei khyoengh lyis shwih loh dah Egutu dius nvng vnghuot lah, ge nyei.

³⁹Paulo gas, Ngos Kiliki mau, Tarshu wus mas dah Yuda dius nghuot. Ngos nyeis wus gas vtsiq vlo ma nghuot; haih dius lyis dang yoh taiq das vmingh dyei aq, ge tungh sang nyeis.

⁴⁰Nyang vmingh yoh lyis, zvmlhangh thyoh mas yap las, moqphung sam das xiklyis loq vsoh dyei. Nyamoq sam goeus ya, Hebre nyingh pheh yah nyamoq lyis taiq zis gas,