Read Achang LVGYO 22 Bible Online

LVGYO 22 - Achang bible

LVGYO 22

¹Nhaiqbos uwus moq yahge boekyis eh, namoq xikkhonh mas ngah gungsgos dang lyis gyo yoeus dyei geh ge,

²Hebre nyingh pheh yah nyang taiq dang lyis nyamoq xauhgyo lyis zes sam nyeis. Housoeh nyang taiq zis gas,

³Ngos gas Kiliki mau, Tarshu wus mas khoeu dah Yuda dius nghuot. Nghuot laus eq, haih wus mas ngos bes los las, Gamale dah khyeiyang mas ngamoq phauh thyeih moq dah svsoh than lyi thungh yah dvyhangteh jeih jyvp xuq las, khvnyhik dah namoq teh ngos eq Mangso shot pheh nhaiq wvng zis yah,

⁴nyelo yukgis lo lyis twih she, thung khyoq las, haih cho chank bang lyis sat shoq shoeuhshih yoeuh ku.

⁵Phudyei bang yahge logis jens phung gonh eq ngah xiklyis kanghjyoeng yoh kat. Ngos nyamoq jyank mas dah maussauh xauh yoeus las Damasku wus mas nyeis bang lyis eq Yerusalem mas twih she los las yobos dyei das xiklyis ngos Damasku pheh loh.

⁶Housoeh ngos loh las, Damasku wus nvm mas jweh loh nyeis lyis, nyeih gungs lyis maukhung masyah svsoh bvng zis ngah vyvm vwi mas nyetlos nyettant bvng thuq los.

⁷Ngos gas nyeisjvng mas lains loh las xauhgyo dah dang gas, Saulo, Saulo, nvng ngos lyis chamus shoeuhshih nyeis lah, ge.

⁸Ngos phuk taiq zis gas, Yhensain eh, nvng hank nghuot? Nyang taiq zis gas, Ngos gas nvng shoeuhshih nyeis dah Nazaret Yesu nghuot, ge.

⁹Ngos yah dvgeh loh bang gas bvng zis tsain nyvng laus eq, ngos lyis taiq nyeis soeu dah thwe lyis gas ma xauhgyo.

¹⁰Tsai ngos gas, Yhensain eh, ngos cha kuot das lah, oen lyis Yhensain ngos lyis taiq zis gas, Toq las Damasku mas loh aq, nvng lyis dyei toh dah muh dvnganh houmha nvng lyis taiq kyoh das, ge.

¹¹Hauh bvng dah yet gvng mas ngos nyoq ma nyvng lo lyis, ngos yah loh bang ngah loq mas she lha, ngos lyis Damasku mas shwih wvng loh.

¹²Housoeh lyi chank zis yah lomsjingh cho mas wontang las, houmha nyeis dah Yuda dius dvnganhmoq dah xikkhonh mas nyoqnho ngelang bos dah Anani ge soeu,

¹³ngah nvm mas lyih yap las, Ngah vnoeuh Saulo eh, nah nyoq doms nyvng bas jungh, ge. Hauh uhlyis ngos ngah nyoq doms nyvng zis yah nyang lyis nyvng.

¹⁴Nyah nhaiqlom seq das zis yahge Dan Soeu lyis nyvng las nyah nhuot mas dah dang xauhgyo yoeus das xiklyis, yah phauh thyeih moq dah Mangso ka nvng lyis khyen toh.

¹⁵Khasoeh ge lyis nvng nyvng ku zis yahge xauhgyo ku cho lhyi nyeisjvng gonh mas nyah xiklyis kanghjyoeng kat dyei soeu nvng bweh das.

¹⁶Gvshih nvng chamus sheq nyeis lah? Toq aq, Yhensain dah nyings lyis yoeus las jeisnyhop kham las, nah yobos cheihshang tyamp aq, ge.

¹⁷Hauh thang lhyi ngos Yerusalem mas tauh loh las yhenmuh mas shvmanh dung nyeis lyis ngos nyoqnyvng nyvng zis gas,

¹⁸Nvng Yerusalem masyah lvnyap thuq loh aq, nvng ngah cho kanghjyoeng kat dang lyis nyamoq ma lhom yoeus das, ge Yhensain ngos lyis taiq.

¹⁹Hauh uhlyis ngos gas, Yhensain eh, nvng lyis lomsjingh bang lyis lyi jungs masyah ngos thung nyhik khyoq zis yahge tsain lyuk zis gas nyamoq nyang seq.

²⁰Nah kanghjyoeng Stephan dah suih huot yoq lyis eq ngos nyang vyvm mas yap las, hauh cho lhyi xam bos xonh las nyang lyis sat bang dah dyimis zungh dyei goeus, oen taiq goeus.

²¹Yhensain taiq zis gas, Loh aq, ngos nvng lyis gohnyau bang nyeis dah we mau pheh nhang kat das, ge.

²²Houmha jweh shoq nyamoq nyah dang gyo lho las, Houteh soeu lyis gas shung tyamp geh, sat geh, nyang kang dwis das zis ma mon lo, ge tsain kaiq.

²³Housoeh kaiq uhjyangh, nyamoq nyang dah dyi khyuot doeuh tyamp las tsohphih tsain doeuh lhank nyeis lyis,

²⁴zauzains taiq zis gas, Paulo lyis thoenkgus jesdvp khau mas shwih hwank las, nyah cho chamus heisoeh kaiq zis yoh seq shoq lyuk las nyei yoeuh geh, ge.

²⁵Shohyeis twih yah nyang lyis lyuk das xiklyis lang twih goeus ya, Paulo gas vyvm mas yap dah jes dvxo guon zau lyis, Khasoeh Roma dius nghuot soeu lyis, dang thang ma thyet shih lyis namoq nyang lyis lyuk zis gas lyi bos lhyeh, ge.

²⁶Jes dvxo guon zau hauh zis xauhgyo lyis, zauzains jyank mas loh taiq zis gas, Nvng cha kuot bah oen lah? Hauh soeu ka Roma dius nghuot, ge.

²⁷Zauzains eq Paulo jyank mas e las, Nvng Roma dius nghuot lah? Ngos lyis taiq kyoh aq ge. Nyang taiq zis gas, Nghuot, ge.

²⁸Tsai, zauzains taiq zis gas, Ngos Roma dius xauh bweh das nyhenshang phauh nyoshoq yah dvyoh yoeus, ge. Paulo taiq zis gas, Ngos gas Roma dius bweh goeus zis khoeu los soeu nghuot, ge.

²⁹Housoeh nyang lyis nyei wu yoeuh das ge bang houjang tsain thuq khoq. Zauzains eq Paulo Roma dius nghuot cho seq goeus ya, nyang lyis twih shuot las gyuk nyeis.

³⁰Yuda jens Paulo lyis chah yobos huon zis zauzains jeih jeih seq mes yvmvyah nungs nvp Paulo lyis phui kat las phudyei uhjyung jens yahge Yuda lyi huom gonh lyis huom das xiklyis vmingh dyei. Housoeh nyang Paulo lyis nyamoq xikkhonh masyah lyih shwih toh.