Read Achang LVGYO 23 Bible Online

LVGYO 23 - Achang bible

LVGYO 23

¹Housoeh Paulo gas nhaiqbos huom lyis yoeuh tsuk toh las taiq zis gas, Boekyis eh, ngos khvnyhik jweh shoq gis zis dvnganh lyis seq nghamh ehnyet yah Mangso xikkhonh mas dwis nyeis, ge.

²Housoeh las Phudyei Zainsmuh Anani gas, Nyah nhuot lyis tyuk dyei geh, ge vnvm mas yap joq bang lyis vmingh dyei.

³Paulo nyang lyis taiq zis gas, Vthyoeu juot dah tyoyvm eh, Mangso nvng lyis tyuk das: Lyi bos khyvlyis soetuon das zis nvng heimha dvtsung lhyi, Lyi yah shaih khyvlyis ngos lyis tyuk nhang lhyeh, ge.

⁴Vyvm mas yap joq bang eq, Nvng Mangso dah Phudyei Zainsmuh lyis ma phauhgis womh taiq lhyeh, ge.

⁵Paulo taiq zis gas, Boekyis eh, nyang Phudyei Zainsmuh nghuot zis ngos ma seq las nghuot. Nah vnyau thoq mas guon soeu lyis ma phauh yoh kuot das zis ma nghuot, ge lhaih toh, ge.

⁶Hau huom joq bang mas dvyhamh gas Saduke, dvyhamh gas Pharishe tsain nghuot yvlyis Paulo seq lyis, nyang hauh huom mas kaiq zis gas, Boekyis eh, ngos gas Pharishe jens dah lo Pharishe nyang nghuot. Shei goeus bang dwis toq cho lhyi lomsjingh gvng mas ngos shoenk zis xauh nyeis, ge.

⁷Housoeh taiq kat lyis Pharishe yahge Saduke moq nyang changh nyang phyen-goh las moq huom gas gang lvn loh.

⁸Khasoeh ge lyis, Saduke moq gas, Dwis toq ge zis ma bos, loeuswons bang yahge dyos eq ma bos, ge sang. Nghuot laus eq Pharishe moq gas hau dvnganh yvlyis lhom yoeus.

⁹Housoeh las svsoh tsain taiq hoeu goh nyeis. Hauh uhlyis Pharishe phung mas dah maussauh lhaih bang dvyhamh toq las, haih soeu mas chah yobos eq ngamoq ma nyvng, Dyos nghuot ya loeuswons soeu nyang yah dang taiq goh nyeis zis dvnghuot, ge.

¹⁰Housoeh svsoh phyen-goh los lyis, zauzains gas nyamoq Paulo lyis lang chingh sat das yvlyis chiq yvmvyah, nyamoq jyank mas gyoh e lha, nyamoq xikkhonh masyah nyang lyis lang she lha thoenkgus jesdvp khau mha shwih loh das xiklyis jeslo jens lyis vmingh dyei.

¹¹Hauh nyensyo Yhensain gas Paulo nvm mas yap las, Vgyuk, nvng ngah cho Yerusalem mas kanghjyoeng kat zis yah dvyhangteh Roma wus mas eq kat chah shih, ge.

¹²Nyoq nyvng lyis Yuda dius dvyhamh tsain huom, gomloeus pan lha, Paulo lyis ma yoh sat dvchank gas cha eq ma zo ma shuk das, ge nyamoq nyang gungs lyis mau tsain khi toh.

¹³Housoeh xam bang nyeici nyet ko nghuot.

¹⁴Nyamoq gas phudyei uhjyung jens yahge logis jens jyank mas e lha taiq zis gas, Paulo lyis ma yoh sat dvchank gas zonoms cha lyis eq ma tanh das oen ngamoq mau tsain khi toh.

¹⁵Housoeh yvmvyah gvshih namoq yahge hau nhaiqbos huom yah dvgeh, Paulo dah cho vlhomuh nyei yoeuh mes shih oen nyang lyis nvpyo namoq jyank mas khi yoeus das khyvlyis zauzains lyis sang kat geh. Ngamoq gas nyang heimha ma jweh shih lyis sat das zis cicont kuot nyeis das, ge.

¹⁶Housoeh lhom cho lhyi Paulo vbi dah lo xauhgyo las thoenkgus jesdvp khau mha Paulo lyis wvng taiq kyoh.

¹⁷Paulo eq jes dvxo guon zau dvyuk lyis khi las taiq zis gas, Haih loyvm phoq lyis zauzains jyank mas shwih e dyei aq: nyang dvja taiq mes ge, ge.

¹⁸Nyang hauh soeu lyis zauzains jyank mas shwih wvng las taiq zis gas, Haih loyvm phoq nvng lyis taiq das dang dvja bos yvmvyah, nyang lyis nah jyank mas shwih lyih das zis thung lungh Paulo ngos lyis khi lha sang kat, ge.

¹⁹Zauzains gas nyang lyis nyah loq mas she las, sam joqyos mas shwih loh las nyang lyis nyei zis gas, Nvng ngos lyis cha taiq mes, ge.

²⁰Nyang taiq zis gas, Paulo lyis vlhomuh nyei choq yoeuh mes shih teh kuot las, phvnaq nyeihyo huom mas shwih los dyei das xiklyis, nvng lyis sang das, ge Yuda jens xam tsain xonh goeus.

²¹Nghuot laus eq nyamoq o khyvlyis vgyo dyei: Khasoeh ge lyis Paulo lyis ma yoh sat dvchank gas cha eq ma zo ma shuk das ge nyamoq gungs lyis mau tsain khi toh bang nyeici nyet, nyang lyis lhom sat das zis tsain tamh joq das; gvshih yangh nah vmingh langh uhjyangh nyamoq haih muh kuot das zis cicont nghuot, ge.

²²Zauzains gas, hauh loyvm phoq lyis, Nvng ngos lyis haih cho lyih taiq kyoh zis hank lyis eq vtaiq kyoh, ge khyangh dye com lyis nhang kat.

²³Tsai nyang gas jes dvxo guon zau aiq yuk lyis khi lha taiq zis gas, Khvnyens gau shishenh lyis Kesare wus pheh loh das zis jeslo aiqxo, nyang ji zis nyhetci, lham chi bang aiqxo lyis sont toh geh, ge.

²⁴Hauh thoq lyis Paulo lyis nyang ji nhang las mungh zau Felik jyank mas tsoek yah yoh shwih kat das xiklyis taiq toh.

²⁵Maussauh eq heisoeh ge lhaih dyei kat.

²⁶Klodi Lusia gas nyoqnho ngelang kuh dah mungh zau Felik lyis jeshuh kat.

²⁷Haih soeu lyis Yuda jens nyhik las sat das tsain sont lyis, jeslo jens yahge ngos loh las, nyang Roma dius nghuot zis seq los yvmvyah, nyamoq jyank masyah khyuot yoeus toh.

²⁸Housoeh nyang lyis kauq cho seq mes yvmvyah, nyamoq dah lyi huom mas shwih hwank yoeuh lyis,

²⁹ngos nyvng zis gas, nyang mas shei mon, thung khyoq mon dah kauq cho ma bos, nyamoq lyi yah sen las nyei cho dvtsain kauq.

³⁰Haih soeu lyis sat das zis Yuda jens khaujeini las lhom cho ngos lyis taiq kyoh yvmvyah, ngos nyang lyis houjang nah jyank mas shwih kat nhang las, nyang lyis kauq bang eq nah xikkhonh mas tsain lyih nhang das khyvlyis taiq toh, ge.

³¹Housoeh taiq kat zis yah dvyhangteh, jeslo jens eq Paulo lyis Antipatri jweh shoq nyenh lyis loh tsain shwih kat.

³²Nungs nvp, nyang ji bang lyis gas nyang yah dvgeh loh das khyvlyis toh khoq las, nyamoq gas thoenkgus jesdvp pheh tsain tauh los.

³³Nyang ji bang eq Kesare wus jweh las mungh zau lyis maussauh dyei toh khoq lho las Paulo lyis eq nyah xikkhonh mas shwih hwank kat.

³⁴Hauh maussauh dye nghap lyis Paulo kha mau mas zis nghuot yvlyis nyei yoeuh las, Kiliki mau mas zis nghuot yvlyis seq goeus ya,

³⁵mungh zau gas, Nvng lyis kauq bang jweh los lho lyis, ngos nah soe gyo dyei das, ge taiq las Paulo lyis Pretori ge, Herod dah yhenmuh mas, zungh bang toh las lhunk toh das zis vmingh dyei.