Read Achang LVGYO 24 Bible Online

LVGYO 24 - Achang bible

LVGYO 24

¹Hauh thang lhyi oeng nyeih lyis Phudyei Zainsmuh Anani gas logis jens yah dvgeh, Tertulu ge dah dangdat dvyuk shwih las nyamoq gas mungh zau jyank mas Paulo cho e tsain nyei.

²Housoeh Paulo lyis khi wvng los yah dvyih, Tertulu kauq dang taiq phank los zis gas: Nyoqnho ngelang bos dah Felik eh, nah gvng mas ngamoq gas nyeis tam nyeis zis yahge nvng guon cho lyes yvmvyah, haih vnyau eq kuhxing los.

³Ngamoq hauh yvlyis cho khat khanghmuh, joqyos khyiq khanghmuh mas vjangh nhaiqshoqlang ehnyet yah lhom yoeus khamzo nyeis.

⁴Nghuot laus eq shishenh nyoshoq ma thank nhang dang lyung yah ngamoq taiq das dang lyis nah kuhxing ehnyet yah jenh gyo dyei aq.

⁵Haih soeu ka ma gis ma shop zis yah, mungkvn gonh dah Yuda jens lyis shwih hoeu las hau Nazaret phung dah vgyis uhjyung nghuot nyeis zis gas ngamoq nyvng.

⁶Nyang gas yhenmuh lyis yangh vwot v-oeu kuot das ge sont nyeis. Housoeh yvmvyah ngamoq nyang lyis nyhik las ngamoq dah lyi yah dvyhangteh soetuon mes.

⁷Nghuot laus eq jeszau Lusia gas nyang lyis ngamoq loq masyah chot shwih yoeus loh. Hauh thang lhyi Lusia gas ngamoq lyis nah xikkhonh mas Paulo lyis yobos los huon das xiklyis vmingh dyei toh.[9]

⁸Nvng nyang lyis nyei yoeuh lyis ngamoq nyang lyis kauq cho jyoeng zis nghuot yvlyis nvnyang yoh seq das, ge.

⁹Yuda dius jens eq housoeh nghuot ge bos taiq.

¹⁰Mungh zau gas nyang dang taiq das xiklyis vsoh dyei yah dvyih, Paulo taiq zis gas, Yhensain nvng haih vnyau thoq mas soetuon soeu zvnlom nyangh nyangh kuot ku goeus zis gas ngos seq yvmvyah, ngos ngah cho lhyi gauslaus zis yah taiq bah.

¹¹Khasoeh ge lyis Yerusalem mas shvmanh dung das xiklyis doq loh zis, buisnyeis dvci aiq nyeih ma lai shih zis gas nvng yoh seq, ge.

¹²Nyamoq gas ngos Yhenmuh yahge lyi jungs, wus vkhau mas hank yah phyen-goh zis eq, moqphung lyis shwih hoeu yos eq nyamoq ma nyvng.

¹³Gvshih nyamoq ngos lyis kauq cho mas, nvng lyis chah kanghjyoeng ma yoh tsain chixoeuq.

¹⁴Nghuot laus eq cho dvja gas ngos nah xikkhonh mas rhen. Houka ngamoq phauh thyeih dah Mangso lhyi nyamoq shuot ge nghamh dah cho ge lomsjingh vkhyoh yah paiq. Housoeh paiq yvmas Lyi maussauh mas dyei toh cho dvnganh yahge lvpe jens dah maussauh mas lhaih toh zis dvnganh lyis lomsjingh las lhom yoeus toh.

¹⁵Ngos gas nyamoq yah dvyhangteh Mangso mas nghamhloms cho yoh. Houka dius dvnganh gas gis bang eq, ma gis bang eq shei masyah dwis toq los ge dah nghamhloms cho nghuot.

¹⁶Ngos vjangh yah Mangso yahge dius xikkhonh mas shang dah seq nghamh ehnyet yah kang yoh dwis das xiklyis kank bos nyhoq yomkat nyeis.

¹⁷Housoeh nyoshoq zvn lai thang lhyi, ngah dius nyau jyank mas Vlu jyungshuk dyei das zis yahge phudyei das xiklyis ngos jweh loh.

¹⁸Ngos housoeh phudyei nyeis shishenh lyis nyamoq ngos lyis yhenmuh mas nyvng. Hauh shishenh lyis ngos ngah cheihshang thungh lyis dye kuot goeus. Houmha ngos yah dvgeh moqphung hank eq ma nyeis, hoeu cho eq cha ma bos.

¹⁹Asia mau mas dah Yuda dvyhamh nyeis. Nyamoq ngos lyis kauq chank bos lyis gas, hauh bang nyang nah xikkhonh mas lyih taiq gis.

²⁰Nghuot ya, ngos hauh lyi huom xikkhonh mas yap joq uhlyis, haih dius jens ngos cu yobos nyvng lyis gas nyamoq nyang taiq thuq los bas jungh.

²¹Ngos gas shei bang doms dwis los ge dah lomsjingh cho gvng mas khvnyhik namoq dah soetuon zis xauh nyeis oen nyamoq xikkhonh mas yap uhlyis kaiq kat dang mas lai las nyamoq ngos lyis yobos huon chank cha ma bos.

²²Mungh zau Felik gas Cho ge dah lomsjingh cho lhyi gvgis lo seq toh. Zauzains Lusia heimha jweh lyis ngos namoq dah soe dang thang thyet dyei das ge taiq zis yah hauh huom no toh.

²³Housoeh nyang gas jes dvxo guon zau lyis, Paulo lyis zungh soeu yah toh das xiklyis vmingh dyei. Nghuot laus eq nyah buisnoms jens lyih phuqsoe mes bang lyis ma tomp das xiklyis taiq toh.

²⁴Nyoshoq nyeih thang lhyi, Felik gas Yuda vmesbih Drusila ge, nyah yhensain nyhiq yah los las, Paulo lyis khi yoeus lho las, Khristu lyis lomsjingh cho lyis gyo yoeus.

²⁵Paulo gas, dan cho, nyang gungs nyang guon cho yahge jweh los das soetuon cho taiq thuq xoeuq lyis Felik dvn las phuk taiq zis gas, Gvshih loh shih aq, ngos doms ngo uhlyis nvng lyis khi das, ge.

²⁶Paulo gas nyang lyis ngwis dyei mvbeh ge nghamhloms yvmvyah nyang lyis dvsoq soq lyis khi yoeus las lhah goh nyeis.

²⁷Aiq zvn thang lhyi Porkiu Festu gas Felik dah muh lyis los thaiq. Housoeh Felik gas Yuda jens lyis ehnyet lhoqh pyo dyei mes yvmvyah Paulo lyis thung khyoq toh shih.