Read Achang LVGYO 25 Bible Online

LVGYO 25 - Achang bible

LVGYO 25

¹Hauh mauxom mas Festu wvng los thang lhyi somh nyeih lyis nyang gas Kesare wus masyah Yerusalem pheh loh.

²Hauh uhlyis Phudyei Zainsmuh yahge Yuda jens dah uhjyung jens gas, nyang lyis Paulo dah cho tyixo khyvlyis,

³Paulo lyis Yerusalem mas loh das xiklyis khi nhang das zis sang las, nyamoq gas Paulo lyis cho mas lhom sat das zis sont.

⁴Nghuot laus eq Festu phuk taiq zis gas, Paulo lyis Kesare mas lhunk toh chah shih zis yahge, ma nyangh lyis nyang eq houmha tauh loh das.

⁵Namoq mas vmingh bos bang ngos yah dvgeh loh las, hauh soeu mas yobos dvja ja bos lyis gas, hauh bang nyang kauq bas jungh, ge.

⁶Housoeh nyamoq jyank mas xet nyeih, nghuot ya dvci nyeih ko thoeng khoq las, nyang gas Kesare wus pheh loh. Hauh nungs nyeih, nyang soetuon tank mas tsung las Paulo lyis khi los nhang.

⁷Nyang jweh lyis, Yerusalem masyah los dah Yuda jens gas Paulo dah yvmlhaink yap las nyang lyis yobos vja ja tsain taiq huon. Nghuot laus eq nyamoq kanghjyoeng ma yoh chixoeuq.

⁸Paulo phuk taiq zis gas, Yuda jens dah lyi lyis eq, yhenmuh lyis eq, hwankti Kesar lyis eq ngos cha ma cu ku, ge gungsgos dang taiq.

⁹Nghuot laus eq Festu gas, Yuda jens xikkhonh mas nyoqnho yoh mes las Paulo lyis taiq zis gas, Nvng Yerusalem mas loh las, houmha ngah xikkhonh mas haih muhzoh cho soetuon kham das zis nvng gyo das lah, ge.

¹⁰Paulo taiq zis gas, ngos Kesar dah soetuon tank xik mas yap joq. Houka ngos lyis soetuon dyei das joqyos nghuot. Nvng vlhomuh seq nyeis zis yah dvyhangteh ngos Yuda jens lyis cha ma cu.

¹¹Khasoeh ge lyis ngos cu nghuot lyis gas, nghuot ya shei mon zis dvja ja cu lyis gas shei das zis lyis ngos ma jhank. Nghuot laus eq nyamoq ngos lyis yobos huon cho cha eq ma jyoeng lyis gas ngos lyis hank eq nyamoq loq mas yoh kyauh das zis ma nghuot. Kesar xikkhonh mas soetuon dyei das zis ngos dung.

¹²Festu gas nyah dah soetuon huom bang yah dye xamgoh las nyang lyis phuk taiq zis gas, Nvng Kesar soetuon dyei das zis dung kham goeus las, Kesar jyank mas loh das, ge.

¹³Hauh thang lhyi buisnyeis kha nyhank ma nyangh lyis hwankti Agripa yahge Bernike gas Kesare wus mas jweh las Festu lyis loh xauhgoh.

¹⁴nyamoq nyoshoq nyeih nyeis thang lhyi, Festu gas Paulo dah cho hau hwankti lyis taiq kyoh zis gas, Felik lhunk toh langh dah thung lungh soeu dvyuk nyeis.

¹⁵Ngos Yerusalem mas nyeis lyis phudyei uhjyung jens yahge Yuda logis jens hauh soeu dah cho lhyi taiq las, nyah cho dang thang thyet dyei das zis tsain sang.

¹⁶Ngos gas kauq soeu, kauq bang yah nhuot tsuk taiq goh las gungsgos dang ma yoh taiq shih lyis, hank lyis kyauh tyamp das zis eq Roma thungh ma bos oen las nyamoq lyis taiq toh.

¹⁷Housoeh las nyamoq heimha tsain huom joq lyis, ngos eq ma sheq toh lo, nungs nyeih nyang soetuon tank mas tsung las, hauh soeu lyis shwih thuq los das zis taiq kat.

¹⁸Hauh uhlyis nyang lyis kauq bang toq yap laus eq, nyang mas ngos jyo dah ma gis cho nyamoq cha eq ma yoh chixoeuq.

¹⁹Nyamoq gas nyang yah ma woenghgoh cho dvtsiq bos. Houka nyamoq dah lomsnoq cho yah sen cho yahge shei goeus dah Yesu ge soeu lyis Paulo gas, Nyang dwis nyeis ge dah cho jens nghuot, ge.

²⁰Haih nyeidang jens lyis jyoeng dah phuk dang yoh shoq khasoeh nyei gyo das yvlyis vlhomuh ma yoh nghamh yvmvyah, Paulo lyis haih cho yah sen lha Yerusalem pheh loh las houmha soetuon kham das lah, oen nyei goeus.

²¹Nghuot laus eq Paulo gas nyah soe lyis Kesar tuon dyei shoq thung lhunk toh das xiklyis sang yvmvyah, ngos nyang lyis Kesar jyank mas yoh nhang kat shishenh jweh shoq thung lhunk toh das xiklyis vmingh dyei, ge.

²²Agripa Festu lyis taiq zis gas, Ngos hauh soeu cha taiq das yvlyis gyo mes ge. Festu gas, Nvpyo xauhgyo das, ge.

²³Nungs nyeih Agripa yahge Bernike gas shunk las ngelang bos bos, jeszau jens yahge wus mas dah vgyis, nhaiqbos bang yah dvgeh lyih las yvpmuh mas tsain jweh lyis, Festu taiq kat zis yah dvyhangteh Paulo lyis hwank kat.

²⁴Hauh uhlyis Festu taiq zis gas, hwankti Agripa yahge gvshih heimha tsain nyeis bang eh, Yerusalem yahge haih wus mas dah Yuda jens dvnganh, ngos lyis los taiq las, hauh soeu lyis kang dwis nhang toh ma gis lo, ge tsain kaiq zis gas gvshih namoq nyvng nyeis, haih soeu lyis nghuot.

²⁵Nghuot laus eq ngos haih soeu mas shei mon dah yobos cha eq ma nyvng. Nyang Agustu soetuon dyei das xiklyis dung kham toh goeus las, ngos nyang lyis houmha nhang das zis nghamh thyet toh.

²⁶Nghuot laus eq nyah cho yah sen las ngamoq dah Kesar hwankti zainsmuh lyis jeihjyvp lhaih das zis cha eq ma yoh. Housoeh yvmvyah nyang lyis nyei wu thang lhyi ngos dvja ja yoh lhaih das xiklyis namoq dvnganhmoq xikkhonh mas, zes las nvng hwankti Agripa dah xikkhonh mas ngos nyang lyis shwih thuq xoeuq.

²⁷Khasoeh ge lyis thung lungh soeu dvyuk loh shwih kat lyis, nyang lyis huon dah yobos cho cha ma lhaih lhaih nhang kat das zis gas ma jus, oen nghamh, ge.