Read Achang LVGYO 27 Bible Online

LVGYO 27 - Achang bible

LVGYO 27

¹Gvshih ngamoq lyis Itali mau pheh sangpho yah goeu chah ge dye thyet dyei thang lhyi, Paulo yahge gohtoeu thung dius dvyhamh lyis Agustu jesdvp mas dah Yuliu ge dah jes dvxo guon zau loq mas kyauh kat.

²Hauh uhlyis Asia wuxom mas dah sangpho goeukhanh mas loh das xiklyis cicont nghuot dah Adramuti masyah wvng los dah sangpho mas ngamoq wvng tsung lha toq loh. Thesaloni wus masyah los dah Makedoni dius Aristaku eq ngamoq yah dvgeh nghuot.

³Nungs nyeih ngamoq Sidon wus mas thoeng. Yuliu gas Paulo lyis nhaiqnyen las, nyah buisnoms jens jyank mas nyang chah zis pangh bas jungh ge e xauhgoh nhang.

⁴Hou mhayah thuq goeus ya, lyeis muot tauh los yvmvyah, Kupru goeujo lyeis tam jyankyvm cho tsain loh.

⁵Ngamoq Kiliki yahge Pamphilia mau mas dah panglai cho goeu thang lhyi Likia mau Mira wus mas jweh loh.

⁶Hauh nyensyo jes dvxo guon zau gas Itali pheh goeu e dah Alesandria wus mas dah sangpho nyvng las, houmha ngamoq lyis wvng nhang.

⁷Hou mhayah buisnyeis nyangh shoq, zoh yah Khinidu nvm mas jweh lyis, lyeis than lha houmha ma dap loh nhang yvmvyah, Kreti goeujo lyeis tam yvcho Salmone vyvm chank yah lai loh.

⁸Hauh vyvm cho vyau vkeh tsain loh lyis Lasea wus yah ni dah Goeukhanh Gis ge dah sangpho goeukhanh mas tsain jweh loh.

⁹Shishenh geh ko lo nyangh los lyis, womkyi shishenh yangh lai tyamp yvmvyah sangpho yah suh e das zis gyuk chah yoq jweh las, Paulo nyamoq lyis taiq zis gas,

¹⁰Loeuzomh jens eh, haih gyung cho ka svsoh gyukphoh nghuot goeus, yah kyahsoe eq, sangpho eq somh thoq lyis magoh yah kang eq somh das teh mus, ge.

¹¹Jes dvxo guon zau gas Paulo dah dang thoq lyis sangpho komp soeu yahge sangpho sain dah dang lyis zes las jingh.

¹²Goeukhanh hauh zis eq cungh lyis yoh thoeng das teh ma doeus yvmvyah, Phonik goeukhanh mas yoh jweh lyis jweh shoq loh las, houmha cungh yoh ku shoq jweh loh das cho lhyi nyothyang xam tsain xonh. Hauh joqyos gas Kreti goeujo mas dah buiswvng mautyi pheh nyoqnho xoeu toh dah goeukhanh nghuot.

¹³Housoeh las mautyi lyeis, zoh yah muot los goeus ya, nyamoq nghamh zis yah top nghuot goeus ge tsain nghamh las, jywangh yoeus tyamp lho las Kreti goeujo jyank yvm cho yah lai loh.

¹⁴Nghuot laus eq ma nyangh lyis buisthuq mautsung lyeismuh jyang ka hauh goeujo masyah muot los.

¹⁵Houka sangpho lyis los bat las, xik pheh ma yoh loh lo yvmvyah nyamoq kat kat las lyeis muot loh yvpheh bos loh.

¹⁶Kauda ge dah goeujo ngis, lyeis tam yvcho yah los nyeis lyis nyah lhyik jens lyis svkhyen yoh zwi toh.

¹⁷Hauh yvlyis sangpho thoq mas tsain lang kih las sangpho kuh yah toenk shoq twih yah tsain lang twih tap toh. Tsai, Suti ge dah sihmuis jyank yvm mas kih das zis chiq yvmvyah, nyah misseh lyis khyoq tyamp las bos tsain nyoeu loh.

¹⁸Lyeis jyang ka sangpho lyis tsoq las bat nyeis yvmvyah nungs nyeih gas sangpho hu dvkhamh lyis panglai mas tsain tyungh khyoq.

¹⁹Tsai somh vnyeih lyis hauh sangpho yah sen dah kyahsoe lyis eq ngamoq nyang loq yah tyungh khyoq.

²⁰Buisnyeis nyoshoq nyeih buis ma nyvng, kyi eq ma thuq, lyeis than kyingh los nyeis yvmvyah, ngamoq yoh luiq das oen nghamh das cho dvtsiq eq ma bos lo.

²¹Nyamoq wom ma zo zis svsoh nyangh los goeus las, Paulo nyamoq vgungs mas toq yap las taiq zis gas, Loeuzomh jens eh, namoq ngah dang gyo las Kreti goeujo masyah ma thuq ya heisoeh dyoqbis, dyuk loh zis ma xauh das.

²²Gvshih laus eq, yom huont geh. Sangpho mas lai las namoq hank kang eq som das zis ma nghuot.

²³Khasoeh ge lyis, ngos phuqsoe nyeis, ngah Mangso dah loeuswons soeu vmvn ngah vyvm mas yap las taiq zis gas,

²⁴Paulo eh vgyuk, nvng hwankti Kesar xikkhonh mas xauh yap das. Yoeuh aq, nvng yah dvgeh haih sangpho mas tsung bang dvnganhmoq, nah gvng mas Mangso nyamoq lyis kang luiq nhang das, ge.

²⁵Housoeh las loeuzomh jens eh, yom huont geh, Khasoeh ge lyis ngos lyis taiq zis yah dvyhangteh nghuot das oen ngos Mangso lhyi loms.

²⁶Nghuot laus eq yang goeujo dvkoeuq koeuq mas sangpho loh dyoq das, ge.

²⁷Dvci nyei vnyeih nyenhthang jweh las, ngamoq Mediteranean Thomh cho nyoeu loh nyeis lyis, gungsgvm lyis tung yos dvjoq joq mas ni los soh bos, ge sangpho muh zwi bang nghamh.

²⁸Housoeh jeis keq yoeuh lyis, aiqci lvm noq zis tsain seq. Dvsoq lyis doms keq lyis, dvci oeng lvm dvnoq lo zis tsain seq.

²⁹Housoeh las lukmhung mas thungh das zis gyuk yvmvyah, nyamoq sangpho vthang pheh dah jywangh nyei koeuq khyoq las nyoq nyvng los bas jungh ge, shvmanh tsain dung nyeis.

³⁰Sangpho muh zwi bang hou mhayah tsain phang das ge nghamh zis yah sangpho uhloms pheh dah jywangh tsain khyoq das teh kuot las lhyik lyis jeis mas tsain khyoq nyeis lyis,

³¹Paulo jes dvxo guon zau yahge jeslo jens lyis taiq zis gas, Hai sangpho muh zwi bang sangpho mas ma nyeis lo lyis gas namoq yoh luiq das zis ma nghuot lo, ge.

³²Jeslo jens gas lhyik twih dah twih e thyet las, hauh lhyik lyis nyoeu loh nhang.

³³Nyoq nyvng los lyis Paulo gas nyamoq dvnganh lyis wom zo das xiklyis kywih las, Namoq dvci nyei nyeih nhangh langh nyeis las hauh gyo lyis cha eq ma tsain zo.

³⁴Housoeh las zonoms dvja ja zo geh; haih zis gas namoq dwis nyeis das cho nghuot. Namoq uhloms mas cam dvkhvt eq dyuk loh das zis ma nghuot, ge.

³⁵Housoeh dye taiq yah dvyih ohlhyoq yoeus las, nyamoq dvnganhmoq dah xikkhonh mas Mangso dah jyehjuh lyis chungh lho las, khyiq las zo.

³⁶Hauh uhlyis nyamoq dvnganhmoq yom yoeus las zonoms dvja ja tsain zo.

³⁷Hauh sangpho mha dah dius dvnganh lyis aiqxo nyhetci khyuk yuk nghuot.

³⁸Nyamoq jo shoq dye tsain zo lyis sangpho siq das xiklyis sunghso lyis jeis mas tsain doeuh khyoq.

³⁹Nyoq nyvng lyis, nyamoq hauh jyank yvm lyis ma seq laus eq sihsho yos vthunk dvkoeuq lyis nyvng kat las, gis bweh lyis houmha nyamoq dah sangpho loh no toh das ge thyet toh.

⁴⁰Housoeh nyamoq jywangh lyis thomh mas thyet khyoq khoq. Tsai sangpho komp dah lvshvp lyis twih dah twih lyis tsain phui tyamp. Hauh thang lhyi sangpho uhloms shot pheh misseh toq kat. Housoeh lyeis lyis yah hau jyank yvm pheh duon loh nhang.

⁴¹Nghuot laus eq sihsho jyank yvm lyis sangpho loh thungh las sangpho uhloms zuk joq yvmas sangpho vthang pheh jeisphauq los tsain bat yvmvyah dyoq loh.

⁴²Hauh uhlyis jeslo jens gas thung dius jeis bat bat las cangh loh das yvlyis chiq yvmvyah, nyamoq lyis sat das zis xamgoh nyeis.

⁴³Jes dvxo guon zau gas Paulo lyis khyuot yoeus mes yvmvyah, nyamoq xam cho lhyi tomp las, Jeisbat seq bat bang hank laus eq jeis mas gyoh las tung yos mas cangxeih jweh bas jungh, ge.

⁴⁴Nyet bang dvyhamh gas thyvkhyamh yah, dvyhamh gas sangpho vdoeus vdyet mas lang lwi ji las goeu loh bas jungh, ge taiq. Housoeh nyamoq dvnganh tung yos mas yoh shwih kat las tsain luiq.