Read Achang LVGYO 28 Bible Online

LVGYO 28 - Achang bible

LVGYO 28

¹Ngamoq housoeh jesluiq shohluiq las vlhomuh yoh jweh thang lhyi, goeujo hauh yvlyis Malta ge zis yoh seq.

²Houmha nyeis bang gas nhaiqnyen zis yah ngamoq lyis lhom zes yoeus. Mau eq wus, ngamh eq ngamh yvmvyah nyi khat dyei.

³Hauh uhlyis Paulo thangh kui lha nyikhyomp mas kat lyis, Ywimuhtsanh dvdoeu nyi ngeh los yvmvyah thuq los las nyah loq mas tsuk lhangh toh.

⁴Paulo loq mas ywimuhtsanh tsuk lhangh toh yvlyis hauh wukhau bang nyvng lyis, nyamoq nyang changh taiq goh zis gas, Haih dius yuk gas jyoengh nyang dius sat soeu nghuot soh bos: khasoeh ge lyis nyang thomh masyah yoh luiq los laus eq, jyoeng dah lyi gas nyang lyis ma dwis nyeis nhang lo, ge.

⁵Paulo gas hauh lhangnyis lyis nyikhyomp mas ko khyoq las cha eq ma mus, nyeis.

⁶Nyamoq gas, Nyah gungs yam los das, ma nghuot lyis eq dvsoq lyis lains shei loh das ge yoeuh nyeis. Nghuot laus eq nyangh shoq langh yoeuh lyis eq nyang mas cha eq ma chah los zis nyvng lyis nyamoq dah ehnyet doms thaiq las taiq zis gas, Haih soeu ka gywes dvkoeuq dvnghuot soh bos, ge.

⁷Hauh vnvm mas dah goeujo vgyis Publiu dah maunyeis tsain joq. Hauh soeu ka ngamoq lyis lhom yoeus las somh nyeih top buisnoms ehnyet yah boengh daih.

⁸Hauh uhlyis Publiu dah uwus gas gungs eq ngeh, womnes eq nos nyeis. Paulo gas hauh soeu lyis shvmanh dung zis yah nyah loq kih dyei las nyang lyis gis los nhang.

⁹Housoeh bweh yvmvyah hauh goeujo mas dah gohtoeu noslom yoh bang eq jweh los las gis los zis tsain xauh.

¹⁰Nyamoq eq ngamoq lyis phauh nyang cho nyoshoq kuot las, hou mhayah sangpho tsung thuq loh lyis ngamoq mas chah nyeis goeu sangpho mas kat dyei kat.

¹¹Hauh goeujo mas lhamhmuh somh khyvp cungh lai shoq nyeis khoq thang lhyi, Gywes zoms ge Alesandria mas dah sangpho yah tsoq loh.

¹²Siraku wus mas jweh lyis, ngamoq houmha somh nyeih thoeng nyeis khoq.

¹³Hou mhayah ngamoq doms tsoq loh lyis, Regium wus mas jweh loh. Nungs nyeih gas mautyi lyeis muot los las, aiq nyeih lyis Puteoli wus mas dvjweh loh.

¹⁴Ngamoq houmha lomsjingh bang yah xauhgoh las, nyhet nyeih thoeng khoq das xiklyis tsain sang lha, thoeng khoq. Hauh thang lhyi Roma wus pheh tsain loh.

¹⁵Hauh wus mas dah lomsjingh bang gas, ngamoq jweh das cho xauhgyo yvmvyah, zes das ge, Apiu kaih yahge Boenghdoq yhen Somh joq jweh shoq tsain lyih langh. Paulo nyamoq lyis nyvng lyis Mangso lhyi chungh las yom yoh.

¹⁶Ngamoq Roma wus mas jweh loh lyis, jes dvxo guon zau gas thung dius jens lyis, zungh dah zau loq mas kyauh toh. Nghuot laus eq Paulo lyis gas nyang lyis zungh soeu jeslo yah dvgeh gohtoeu nyeis das toeuh dyei.

¹⁷Buisnyeis somh nyeih lai thang lhyi Paulo gas, houmha dah Yuda vgyis nhaiqbos bang lyis khi. Nyamoq jweh lyis nyang taiq zis gas, Boekyis eh, ngah vnyau lyis eq, phauh thyeih dah thungh lyis eq ma doeus khyvlyis ngos cha eq ma kuot ku. Nghuot laus eq ngos lyis Yerusalem mas nyhik las Roma loq mas thung dius khyvlyis kyauh zis xauh.

¹⁸Roma zau jens gas ngos lyis nyei choq yoeuh thang lhyi ngos lyis phui kat mes: khasoeh ge lyis ngos shei mon yobos cha ma kuot ku zis nyamoq seq.

¹⁹Nghuot laus eq Yuda jens ma gyo yvmvyah ngos gas ngah vnyau jens lyis yobos huon dais ma bos nghuot laus eq ngos gas Kesar xikkhonh mas soetuon kham das xiklyis sang chah loh.

²⁰Ngos gas Israel vnyau dah nghamhloms cho yah sen lha ngos heisoeh shamjvng yah twih zis xauh nyeis yvmvyah, ngos namoq yah xauhgoh las jisgoh das xiklyis namoq lyis dung kat zis nghuot, ge.

²¹Housoeh nyamoq taiq zis gas, Ngamoq nah cho yah sen las Yuda mau masyah maussauh ma xauh yoeus; heimha los bang boekyis hank eq nah cho ma gis loeus cha ma taiq.

²²Nghuot laus eq haih nvng bos dah phung lyis joqyos khanghmuh yobos huon zis xauh cho ngamoq seq nyeis yvmvyah, hauh zis yah sen lha nvng khasoeh nghamh zis ngamoq gyo mes, ge.

²³Nyamoq Paulo yah xauhgoh das buisnyeis doengs toh las, nyang thoeng dah yhen mas dius nyoshoq lyih huom toh. Nvpsangh masyah nyenhthang jweh shoq, Nyang taiq kyoh dah Mangso munghdan cho dah dang lyis phant kyoh las, Moshe dah Lyi yahge lvpe maussauh jens lyis tuonh shet zis yah, Yesu dah cho jyoeng yvlyis nyamoq lomsjingh los shoq vlhomuh phui kyoh.

²⁴Housoeh taiq dah dang lyis dvyhamh gas jingh los, dvyhamh gas he tyamp.

²⁵Housoeh nyamoq nyang changh xam ma xonh. Housoeh nyamoq gang loh nyeis lyis Paulo dvkhonh doms taiq zis gas, lvpe Esaia dah nhuot lyis yah namoq dah phauh thyeih moq lyis Gyingshang Dyos taiq nyeis zis gas jus.

²⁶Hauh zis gas, Haih dius jens jyank mas heisoeh loh taiq aq, Namoq gas jyoengh gyo yoeus laus eq khanhamp eq seqgyo das zis ma nghuot; yoeuh laus eq nyvng das zis ma nghuot.

²⁷Khasoeh ge lyis Haih vnyau dah ehnyet gas than tyamp goeus; nyamoq no jet goeus. nyamoq nyoqjeih lyis tsain chenh toh goeus. Housoeh ma nghuot lyis gas nyamoq dah nyoq nyvng las nyamoq dah no xauhgyo zis yahge nyamoq gas ngah jyank mas lhain los das. Housoeh ngos nyamoq lyis gis los nhang das, ge Mangso taiq.

²⁸Paulo taiq zis gas, Mangso dah khyuot yoeus cho haih zis gas gohnyau bang lyis dyei goeus, nyamoq gyo yoeus das zis gas, namoq seq toh geh, ge.

²⁹Hauh dang dye taiq lyis, Yuda jens thuq loh las nyamoq nyang changh khoek khoek taiq phyen-goh nyeis.[10]

³⁰Hou mhayah, Paulo gas nyang nghoh dah yhen mas aiq zvn top nyeis lyis, nyah jyank mas lyih bang dvnganh lyis lhom yoeus las,

³¹Mangso munghdan cho taiq kyoh zis yahge Yhensain Yesu Khristu yah sen cho lhyi debangh womh womh jyauh nyeis.