Read Achang LVGYO 3 Bible Online

LVGYO 3 - Achang bible

LVGYO 3

¹Gvshih Petru yahge Yohan gas, somh shishenh dah shvmanh dung shishenh lyis, yhenmuh mas tsain doq loh.

²Hauh uhlyis, nyah ungwes ung masyah khyei ma yangh soeu dvyuk lyis dvng los las, yhenmuh mas wvng loh bang jyank masyah dung zo bas jungh ge, Yunghshop ge dah yhenmuh khomh nvm mas nyeih khanghmuh e toh toh kuot.

³Petru yahge Yohan yhenmuh mas wvng loh nyeis zis lyis nyang nyvng las, Nhaiqnyen aq, ge dung.

⁴Petru yahge Yohan gas nyang lyis yoeuh tsuk toh las, Ngah aiq yuk lyis yoeuh aq, ge.

⁵Nyah aiq yuk jyank masyah dvja ja xauh yoeus das ge nghamh las nyah aiq yuk lyis soq yoeuh nyeis.

⁶Petru taiq zis ka, Ngwis xing gas ngos ma yoh, nghuot laus eq ngos yoh zis nvng lyis dyei bah: Nazaret Yesu Khristu dah nyings masyah toq las suh loh aq, ge.

⁷Nyang nyah loqyos loq lyis zwi las lang toq kat. Houjang yah nyah khyeinyoqtyon yombos los.

⁸Nyang dyvm toq yap las suh loh uhlyis yah, goh jywe las Mangso lhyi chungh zoh lyis nyah aiq yuk yah dvgeh yhenmuh mas wvng loh.

⁹Dius dvnganh gas, nyang suh loh uhjyangh Mangso lhyi chungh yvlyis nyvng.

¹⁰Hauh soeu ka yhenmuh mas dah Yunghshop khomh nvm mas tsung las dung zo soeu nghuot zis lyis nyamoq seq yvmvyah, nyang mas bweh los dah cho gvng mas tsain mauh hangh toh.

¹¹Hauh soeu ka, Petru yahge Yohan lyis lang toh zis yah Solomon wumuk thang ge joqyos mas nyeis lyis, dius dvnganhmoq mauh zis yah nyamoq jyank mas wuih los.

¹²Hauh zis lyis Petru nyvng las dius jens lyis phuk taiq zis gas, Israel dius jens eh, haih soeu dah cho lhyi chamus tsain mauh goh lah? Ngah aiq yuk nyang dah yomsoq yah, nghuot ya lomsjingh dah muh yah haih soeu lhyi yoh suh loh nhang teh chamus yoeuh tsuk toh goh lah?

¹³Abraham, Isak yahge Yakop dah Mangso, yah phauh thyeih moq dah Mangso ka nyah Jyeidwis Yesu lyis chunghtoq zis dvnghuot. Nyang lyis gas namoq kyauh tyamp las Pilat nyang lyis lhuiq kat das ge sont lyis, namoq gas Pilat dah xikkhonh mas nyang lyis peq tyamp.

¹⁴Hau Gyingshang lha dan soeu lhyi namoq peq tyamp las, dius sat soeu lhyi yuk namoq xiklyis kat kat das zis sang yoeus.

¹⁵Kang sain lhyi namoq sat goeus; Mangso ka shei masyah nyang lyis dwis toq nhang goeus. Ngamoq eq hauh cho dah kanghjyoeng tsain nghuot.

¹⁶Nyah yomsoq gas hai khyei dyoq soeu lhyi yombos nhang goeus. Namoq yoh nyvng yoh seq cho lhyi nyah nyings lyis lomsjingh zis yah bweh nhang goeus. Namoq dvnganhmoq nyvng zis yah dvyhangteh Yesu lyis lomsjingh dah lomsjingh cho ka nyang lyis gis los nhang goeus.

¹⁷Gvshih nghuot laus eq, boekyis eh, namoq yahge namoq dah zauguon jens seq cho ma bos las kuot goeus zis gas ngos seq.

¹⁸Hauh zis gas, Mangso ka lvpe jens dvnganh dah nhuot masyah, Nyah Khristu gas shanghsenh xauh chah, ge uhlhomh taiq nhang zis lyis nyang, nyuk los nhang goeus.

¹⁹Nhaiqlom thaiq las tauh los geh, housoeh lyis namoq yaunos khyuot dyei zis xauh das.

²⁰Housoeh Yhensain ka yomsoq vsaiq yoh doms huiq dah shishenh dyei das nghuot las nyang namoq xiklyis khyen toeuq toh Meshia nghuot dah Yesu lyis nhang kat das.

²¹Gohlhain yah nyah Gyingshang lvpe jens dah nhuot masyah Mangso taiq toh zis yah dvyhangteh, vyhang dvnganh zis lyis vsaiq doms kuot dah caiq jweh shoq nyang gas maukhung mha nyeis nyeis chah.

²²Moshe taiq zis gas, Yhensain namoq dah Mangso ka, ngos teh dah lvpe dvyuk lyis, namoq dah vmang vnoeuh masyah namoq xiklyis thuq los nhang das, nyang taiq ya taiq yvlyis tsain gyo chah.

²³Hauh lvpe dah dang ma gyo soeu hank lyis laus eq, Mangso dah dius nyau masyah thyuk tyamp zis xauh das.

²⁴Nghuot goeus, Samuel masyah nyah thang mha chank thuq los las taiq dah lvpe jens dvnganhmoq gas, haih buisnyeis lyis bweh nyeis dah cho lhyi tsain taiq hoeuh.

²⁵Namoq eq hau lvpe jens dah nyei nyet jens tsain nghuot. Mangso ka yah phauh thyeih moq yah thanghchvp toh uhlyis, Abraham lyis, Nah vnyau masyah nyeisjvng thoq mas dius nyau dvnganh shvmanh yoh das ge zis yah dvyhangteh,

²⁶namoq yuk khanghmuh lyis vsainnyang dah unglhung cho masyah yoh lhain los dah shvmanh jyehjuh dyei das xiklyis Mangso ka nyah Jyeidwis Yesu lyis namoq jyank mas cangxeih nhang kat goeus, ge.