Read Achang LVGYO 5 Bible Online

LVGYO 5 - Achang bible

LVGYO 5

¹Nghuot laus eq Anani ge soeu yahge nyah yhensain nyhiq Saphira gas, nyah zomh yoh dah zisyos ungh las,

²Nyah zomh dvgeh khaujeini zis yah hauh phauh dvkhamh gauh shung toh las dvkhamh lvgyo jens lyis e kyauh.

³Petru nyang lyis taiq zis gas, Anani eh, nvng chamus Satan dah dang gyo las maunyeis phauh dvkhamh nah xiklyis thyet toh lah? Nvng chamus Gyingshang Dyos lyis hwah lah?

⁴Hauh zis ma ungh shih lyis nah zis nghuot ma nghuot lhyeh? Ungh thang lhyi eq yoh ungh dah nah ngwis nah zis nghuot las nvng o khyvlyis yoh kuot ma nghuot lhyeh? Chamus nah nhaiq mas housoeh kuot das zis nghamh lah? Nvng gas dius lyis hwah zis ma nghuot, Mangso lhyi hwah zis dvnghuot, ge.

⁵Hauh dang xauhgyo yah dvyih Anani gas lains shei tyamp. Hauh zis xauhgyo bang dvnganh eq svsoh gyuk.

⁶Housoeh loyvm jens toq las, nyah mvng lyis thop lho lha e dvng nyhop.

⁷Hauh thang lhyi somh shishenh ko nyangh lyis, yhensain nyhiq eq housoeh bweh cho ma seq las wvng los.

⁸Tsai Petru gas, Nyeisjvng ungh zis heinyhoq kyingh dvnghuot lhyeh? Ngos lyis taiq kyoh aq ge lyis, nyang eq, Nghuot goeus, heinyhoq yah dv ungh, ge.

⁹Petru nyang lyis taiq zis gas, Yhensain dah Dyos lyis shi yoeuh das zis nah zomh chamus housoeh xamxonh goh lah? Yoeuh aq, nah yhensain phoq lyis nyhop bang dah khyei, khomh mas jweh los goeus, nvng lyis eq dvng tyamp das, ge.

¹⁰Houjang nyang eq nyah khyeiyang mas lains shei goeus. Loyvm jens eq wvng los lyis, hauh vmesbih shei joq yvlyis nyvng las nyah yhensain phoq dah vyvm mas e dvng nyhop.

¹¹Housoeh phung dius jens dvnganh yahge hauh cho lhyi tsain xauhgyo bang dvnganh gas svsoh gyuk goeus.

¹²Gvshih lvgyo jens dah loq masyah vlho yahge mauh loqmuh nyoshoq dius jens dah xikkhonh mas bweh xoeuq nyeis. Hauh bang dvnganhmoq dvgeh Solomon dah wumuk thang mha nyeis.

¹³Gohtoeu dius jens hank eq nyamoq yah ma womh zomh. Nghuot laus eq dius jens gas nyamoq lyis gyukwoms.

¹⁴Yhensain lhyi lomsjingh bang nyelo yukgis lo nyoshoq zes nyo los.

¹⁵Housoeh las Petru suh lai loh lyis, dvyuk yuk dah thoq mas siyet khvlangh zangh bas jungh ge, nos bang lyis cho mha jung yahge mvnyhoeuq yah lyih tsain dvng toh.

¹⁶Hauh thoq lyis Yerusalem vyvm vwi wukhau mha dah nos bang yahge yius wvng las shoeuhshih zis xauh bang lyis tsain shwih jweh lyih. Hauh bang dvnganh eq gis los zis xauh.

¹⁷Nghuot laus eq Phudyei Zainsmuh yahge nyah dyenschangh jens Saduke ge dah dius phung dvnganhmoq gas, noh dah ehnyet dyingh joq yvmvyah toq las,

¹⁸lvgyo jens lyis nyhik lho lha wus thung mas lhunk toh.

¹⁹Nghuot laus eq hauh nyenhyo Yhensain dah loeuswons soeu ka, thung khomh phank tyamp dyei las, nyamoq lyis shwih thuq kat uhlyis taiq zis gas,

²⁰Namoq thuq loh geh, yhenmuh mas yap las hai kang dang dvnganh yah dius jens lyis taiq kyoh geh, ge.

²¹Nyamoq hauh zis xauhgyo lyis, nvpsangh yah yhenmuh mas wvng las tsain jyauh. Nghuot laus eq Phudyei Zainsmuh yahge nyah dyenschangh jens eq jweh los las, soetuon bang yahge Israel jens dah nhaiqbos dvnganh lyis khi huom toh lho lha, lvgyo jens lyis shwih thuq los das xiklyis thung mha dius nhang kat.

²²Jyeidwis jens gas, thung mha lvgyo jens lyis ma nyvng yvmvyah tauh los las taiq zis gas,

²³thung eq goeng goeng kyank toh, zungh bang eq khomh nghe pheh zungh nyeis zis ngamoq nyvng; nghuot laus eq hauh zis phank yoeuh lyis vkhau mha hank eq ma nyeis langh, ge.

²⁴Yhenmuh gomh soeu yahge phudyei uhjyung jens hauh dang xauhgyo lyis, Haih cho cha bweh los das au, ge uhnungh tsain nungh.

²⁵Hauh uhlyis dvyuk wvng los las nyamoq lyis taiq zis gas, Yoeuh aq, namoq thung mha lhunk toh bang gas yhenmuh mas yap las dius jens lyis jyauh nyeis, ge.

²⁶Housoeh las jeszau gas nyah jeslo jens yah lyih las, lvgyo jens lyis tsain shwih loh. Nghuot laus eq khoek khoek ma womh kuot. Khasoeh ge lyis, dius jens lukzains yah doeuh das yvlyis gyuk.

²⁷Housoeh nyamoq shwih yoeus las nhaiqbos huom xikkhonh mas nyhei toh las Phudyei Zainsmuh nyamoq lyis nyei zis gas,

²⁸Namoq haih nyings yah cha eq vtaiq, oen ngamoq khoek khoek taiq toh goeus ma nghuot lhyeh? Yoeuh aq, gvshih Yerusalem dvwus gonh namoq dah jyauh cho tyink las, haih soeu dah cangjau[3] ngamoq thoq mas kih dyei das zis cvvq nyeis, ge.

²⁹Petru yahge lvgyo jens phuk taiq zis gas, Ngamoq gas dius dah dang gyo das thoq lyis Mangso dang lyis gyo chah.

³⁰Ngamoq phauh thyeih dah Mangso ka namoq tapzains mas taplhangh sat dah Yesu lyis dwis toq los nhang goeus.

³¹Israel vnyau lyis nhaiqlom thaiq cho yahge yaunos khyuot dyei das cho lhyi phank dyei das xiklyis uhjyung yahge khyuot yoeus soeu kuot das ge, Mangso ka hauh soeu lhyi nyah loqyos shot pheh chunghtoq toh goeus.

³²Ngamoq eq haih cho dah kanghjyoeng tsain nghuot. Nyah dang gyo bang lyis Mangso dyei dah Gyingshang Dyos eq hauh dah kanghjyoeng nghuot, ge.

³³Hauh dang xauhgyo lyis nyamoq nhaiqyo zis yah lvgyo jens lyis sat das zis nghamh los.

³⁴Nghuot laus eq dius dvnganh dah xikkhonh mas nyoqnho ngelang yoh dah Lyi svra Gamale ge dah Pharishe dvyuk hauh nhaiqbos huom mha toq las, lvgyo jens lyis nghe pheh dvdvm thuq loh nhang das xiklyis taiq kat las,

³⁵nyang taiq zis gas, Israel dius jens eh, haih bang lyis cha kuot das zis gas vlhomuh nghamh yoeuh shih geh.

³⁶Khasoeh ge lyis xikpheh Thuda ge soeu nyang dvkohlhaiq teh thuq los lho lhyi dius nyeixo ko nyah thang mas chank ku. Nyang gas sat zis xauh las, nyah dang gyo bang dvnganh gas lanhsanhhu bi dyuk zis yah nyang kuot cho cha eq ma bweh lo.

³⁷Hauh thang lhyi dius nyings lhaih yoq lyis, Galile dius Yuda thuq los las dius jens lyis nyah jyank pheh lang yoeus loh. Nyang eq sat zis xauh las nyah thang chank bang eq lanhsanhhu mus tyamp.

³⁸Housoeh yvmvyah gvshih ngos namoq lyis taiq bah, Haih soe yah sen las nghuot goeus jungh, nyamoq lyis cha vkuot goh: khasoeh ge lyis nyamoq nghamh toh zis cangsoeu dius masyah nghuot lyis gas dyoq tyamp das.

³⁹Nghuot laus eq Mangso jyank masyah nghuot lyis gas namoq nyamoq lyis ung das zis ma nghuot, Mangso lhyi jes kuot bang dvduot das, ge.

⁴⁰Hauh dang lyis nyamoq lhom yoeus yvmvyah, lvgyo jens lyis khi yoeus lho lha lyuk las Yesu nyings yah ma taiq das xiklyis vmingh dyei lho lha kat kat.

⁴¹Nyamoq gas, Nyah nyings gvng mas xoqphuh das zis mon yih nyeis ge Mangso suon dyei yvmvyah gausyis zis yah hauh huom masyah tsain thuq loh.

⁴²Nyamoq nyeih yau nyeih yhenmuh mas eq, nyamoq nyeis dah yhen khanghmuh mas eq, Yesu gas Khristu nghuot cho ma lyen lo jyauh, taiq kyoh nyeis.