Read Achang LVGYO 6 Bible Online

LVGYO 6 - Achang bible

LVGYO 6

¹Hauh buisnyeis gyo lyis changlo jens nyo los lyis, nyeih yau nyeih dah phuqsoe muh mas nyamoq mas dah chauhmuh jens lyis yoeuh lhaiq toh yvmvyah, Heleni jens gas Hebre jens lyis tsain lop.

²Hauh uhlyis lvgyo dvci aiq yuk moq gas, somci moqmuh lyis khi tsainh toh las taiq zis gas, Yang Mangso dah dang lyis nungsyos toh las lvzo lvshuk ba dyei nyeis das zis gas ma doeus.

³Housoeh las boekyis eh, namoq mas lomluk las Gyingshang Dyos yahge joeui dyingh bang nyhet yuk khyen toh geh. Yang hauh bang lyis haih muh mas toeuq kat goh.

⁴Ngamoq gas shvmanh dung muh yahge gausyis dang taiq kyoh muh mas shishenh top yoh dyei das. ge.

⁵Hauh dang lyis phung dius jens dvnganh xamxonh las lomsjingh ehnyet yahge Gyingshang Dyos dyingh dah Stephan yahge Yuda, Prokoru, Nikanor, Timon, Pamena yahge Yuda lomsjingh cho chank soeu gohnyau bang Antiok wus mas dah Nikola moq lyis tsain khyen yoeus.

⁶nyamoq lyis lvgyo jens dah xikkhonh mas tsain shwih toh. nyamoq shvmanh dung thang lhyi nyamoq thoq mas loq kih dyei.

⁷Mangso dah dang eq jelvm los las Yerusalem wugungs mas changlo nyoshoq je los. Phudyei bang nyoshoq eq hau lomsjingh cho tsain chank.

⁸Gvshih Stephan ka Mangso dah jyehjuh yah lomsjingh ehnyet yahge yomsoq yah dyingh soeu nghuot las, dius jens dah xikkhonh mas kuh dah yomsoq muh yahge mauh loqmuh kuot xoeuq.

⁹Bent Kureni yahge Alesandria mas dah Yuda dius dvyhamh vsainnyang Lhuiq kat zis xauh bang ge dah lyi jungs phung mha dah phung dius jens nghuot. nyamoq gas Stephan yah phyen-goh. Kiliki yahge Asia mau mas dah Yuda dius jens dvyhamh eq nyang yah phyen-goh.

¹⁰Nghuot laus eq Dyos gas Stephan lyis joeui dang dyei las nyang taiq lyis nyamoq nyang lyis ma yoh he.

¹¹Housoeh nyamoq gas dius dvyhamh lyis khauwhot dyei las, Nyang gas Moshe yahge Mangso lhyi loeusmus soqzo nyeis zis ngamoq xauhgyo, ge taiq nhang.

¹²Nyamoq gas dius jens, logis jens yahge lyi svra moq lyis hoeu nhang las, hauh bang gas nyang lyis loh nyhik lha nhaiqbos huom mha tsain shwih e.

¹³Housoeh ma ying kanghjyoeng jens lyis toeuq toh las nyamoq gas, Hauh soeu ka haih Gyingshang joqyos yahge lyi lyis loeusmus soqzo dang ma no lo taiq nyeis.

¹⁴Khasoeh ge lyis Nazaret Yesu ge soeu ka haih joqyos lyis thyoq tyamp las, ngamoq lyis Moshe dyei toh dah thungh lyis thaiq tyamp das ge nyang nyang taiq dang ngamoq xauhgyo, ge.

¹⁵Housoeh hau huom mha tsain tsung toh bang dvnganh nyang lyis yoeuh tsuk toh lyis, nyah nyoqnho ka loeuswons soeu dah nyoqnho teh nghuot zis nyamoq nyvng.