Read Achang LVGYO 7 Bible Online

LVGYO 7 - Achang bible

LVGYO 7

¹Phudyei Zainsmuh taiq cho haih zis jyoeng lah, ge.

²Nyang taiq zis gas, Vmang vnoeuh moq yahge uwus moq eh, gyo yoeus dyei geh: ngamoq dah phauh thyeih Abraham Haran mas ma los nyeis shih, Mesopotamia mau mas nyeis khoq yoq lyis, phunk bos dah Mangso ka nyah jyank mas thuq xoeuq las taiq zis gas,

³Nah mau, nah buisnoms sainhchangh masyah thuq las ngos nvng lyis tuonh shet das mau mas loh aq, ge.

⁴Housoeh las nyang gas Khade mau masyah thuq las Haran mau mas los nyeis. Houmha nyah uwus shei thang lhyi, Mangso ka gvshih namoq nyeis, haih mau mas thuot los nhang.

⁵Houmha nyang lyis yhenzis yahge maunyeis khyei yos iq khvlangh ma dyei laus eq Mangso nyang lyis dangthoengh toh zis gas, nyang yahge nyah vkoq gas hauh mau lyis xauh sain das, ge. Hauh uhlyis Abraham gas loshang ma bos shih.

⁶Hauh thoq lyis Mangso haih cho lhyi taiq zis gas, Nyah vnyau lvbaus mau mas loh khau nyeis las, hauh mau mas nyeixo zvn jons duot las nyamoq lyis gyvzaiq gyvnang kuot zis xauh das.

⁷Nyamoq lyis jons kuot dah vnyau lyis eq, ngos joeng das, hauh uhlyis nyamoq thuq los las haih joqyos mas ngos lyis paiq das, ge.

⁸Vthyoh tyomh cho yah sen dah thanghchvp lyis eq nyang lyis dyei kat. Housoeh las Abraham mas yaus dah Isak lyis xet vnyeih lyis vthyoh tyomh dyei. Isak mas yaus zis Yakop, Yakop mas yaus zis phauh thyeih moq dvci aiq yuk nghuot.

⁹Phauh thyeih moq gas Yosep lyis noh las Egutu mau pheh ungh kat. Nghuot laus eq Mangso nyang yah dvgeh nyeis yvmvyah,

¹⁰Shohjyen zis dvnganh masyah nyang lyis khyuot yoeus las, Egutu hwankti Pharao dah xikkhonh mas nyang lyis nyoqnho yoh nhang lha joeui Chixoeuq nhang. Hauh hwankti ka Egutu mau yahge nyah yhenbang dvnganh lyis guon soeu kuot nhang.

¹¹Hauh uhlyis Egutu mau yahge Khanan mau gonh mas phangh khauq gyoh las yaukyenh zainsmuh jweh los. Yamoq dah phauh thyeih moq eq zonoms khalhye ma daq xo lo.

¹²Gvshih Egutu mau mas wom joq cho lhyi Yakop xauhgyo las, nyang gas, yah phauh thyeih moq lyis cangxeih vlhain nhang kat.

¹³Aiq vlhain ka Yosep gas nyah vmang vnoeuh moq lyis nyang hank nghuot cho taiq kyoh las Yosep dah vnyau cho lhyi eq Pharao seq loh.

¹⁴Housoeh Yosep gas nyah uwus Yakop yahge nyah dvyhen gonh oen das, dius nyhetci oeng yuk gonh lyis loeus kyoh las Egutu pheh los das xiklyis khi kat.

¹⁵Yakop eq Egutu mau mas e lha, nyang yahge yah phauh thyeih moq houmha shei goeus.

¹⁶Nyamoq mvng lyis Shekhem mha tsain yoeus los las, Shekhem mas tsain nyeis, Hamor dah nyei nyet jens jyank masyah Abraham dah ngwis yah wis toh lop mas tsain nyhop.

¹⁷Abraham lyis Mangso dangthoengh toh zis yah sen dah shishenh jweh los lyis, Egutu mas nyeis, yah dius jens gas svsoh jebais los.

¹⁸Hauh uhlyis Yosep lyis ma seq dah hwankti dvyuk guon xi los.

¹⁹Nyang gas yah vnyau lyis lhyent zis yah, phauh thyeih moq lyis gyvzaiq gyvnang shoeuhshih las nyamoq dah lonoeuh jens lyis shei bas jungh ge doeuh tyamp nhang.

²⁰Hauh shishenh lyis Moshe khoeu los: nyang gas Mangso dah xikkhonh mas yungh joq. Nyah uwus dah yhen mas lhamhmuh somh khyvp nyhoeu las,

²¹doeuh tyamp toh zis xauh uhlyis, Pharao dah lonyi kui zis yah nyah lo kuot las nyhoeu kat.

²²Moshe eq Egutu joeui dvnganh xuq las, nhuot nhuot loq loq kunk soeu nghuot.

²³Gvshih Moshe nyenhkyi nyeici zvn bos lyis nyah boekyis Israel jens jyank mas e komh mes ehnyet bos los.

²⁴Hauh uhlyis gyvzaiq gyvnang xauh nyeis soeu dvyuk lyis nyang nyvng las, hauh soeu lhyi yeimus las, gyvzaiq gyvnang kuot soeu Egutu dius lyis lvto phuk khyvlyis sat.

²⁵Moshe loq yah boekyis lyis Mangso khyuot yoeus cho phank dyei nyeis zis gas nyamoq seq das, ge las nghamh laus eq, nyamoq gas ma tsain seq.

²⁶Thang lhyi nyeihyo Moshe ka, Israel nyang changh nyang zan goh nyeis zis lyis e zangh nyvng las, nyah aiq yuk lyis khyuon mes yvmvyah, Nhaiqbos tang eh, vmang vnoeuh nyang changh dvnghuot lyis chamus nyang changh nyang zan goh nyeis lah, ge khyuon lhyi,

²⁷yhenkyoh lyis shoeuhshih nyeis soeu ka, Moshe lhyi duon tyamp zis yah, Nvng lyis ngamoq thoq mas guon soeu yahge, soetuon soeu hank kuot nhang?

²⁸Nyinaq Egutu dius dvyuk lyis sat teh, ngos lyis eq sat mes lhyeh, ge phuk taiq.

²⁹Hauh dang gvng mas Moshe phang lha, Midian mau mas dius boengh e duot nyeis uhlyis, nyang mas yukgis lo aiq yuk bos.

³⁰Nyeici zvn dyingh lai thang lhyi, Sina boms dah mhanhdyvp, nyi duk nyeis dah mhanhgyomh mas, Yhensain dah loeuswons soeu nyah jyank mas thuq los.

³¹Moshe ka hauh yvlyis nyvng lyis hauh nyoqnyvng gvng mas nyang mauh las hauh zis lyis yoeuh das ge loh lyis, Yhensain dah thwe hou mhayah taiq thuq los zis gas,

³²Ngos gas nah phauh thyeih moq dah Mangso, Abraham, Isak, Yakop moq dah Mangso nghuot, ge. Moshe ka gyuk nvn las ma womh yoeuh mus.

³³Yhensain nyang lyis taiq zis gas, Nah thyvkoq khyuot tyamp aq. Khasoeh ge lyis nvng yap joqyos gas gyingshang.

³⁴Egutu mas ngah dius jens xauh dah shoeuhshih cho lhyi ngos jyoengh nyvng goeus. Nyamoq noskyingh thwe xauhgyo. Housoeh yvmvyah nyamoq lyis khyuot yoeus das xiklyis ngos gyoh los zis nghuot. Los aq, ngos nvng lyis Egutu mas nhang kat bah, ge.

³⁵Housoeh las, Nvng lyis guon soeu yahge soetuon soeu hank kuot nhang, ge las nyamoq he tyamp dah Moshe lhyi, Mangso ka mhanhgyomh mas thuq xoeuq dah loeuswons soeu lhyi yah, guon soeu yahge khyuot yoeus soeu kuot das xiklyis nhang kat.

³⁶Housoeh nyang nyamoq lyis Egutu mas eq, Thomh Nes mas eq, mhanhdyvp mas eq nyeici zvn top yomsoq muh yahge mauh loqmuh chixoeuq las shwih los.

³⁷Haih Moshe nyang, Namoq vmang vnoeuh masyah ngos teh dah lvpe dvyuk thuq los nhang das ge Israel jens lyis taiq toh soeu nghuot.

³⁸Mhanhdyvp mas nghuot yoq lyis dah moqphung mha Sina boms mas nyang yah dang jis goh dah loeuswons soeu yahge yah phauh thyeih moq yah dvgeh nghuot soeu ka, nyang nghuot: yang lyis dyei das, kang bos dah dang lhom yoeus soeu eq nyang nghuot.

³⁹Yah phauh thyeih moq gas nyah dang ma mes gyo las, nyang lyis nungsyos toh zis yah, nyamoq dah nhaiqlom mas Egutu pheh doms tauh loh mes.

⁴⁰Nyamoq Aron lyis taiq zis gas, Ngamoq xik pheh kat das zis mangso jens kuot aq. Khasoeh ge lyis ngamoq lyis Egutu masyah shwih thuq los, haih Moshe chamus goeus zis ngamoq ma seq, ge.

⁴¹Hauh buisnyeis gyo lyis nyamoq noeu lho dvkoeuq kuot las, hauh silho lyis lomhxangh lainh las nyamoq nyang loq yah kuot dah muhzoh xiklyis pwe kuot nyeis.

⁴²Housoeh yvmvyah Mangso ka nyamoq jyank masyah nyoqnho gohshot xoeu tyamp las, maukhung mha dah buislom lhamhmuh lyis paiq das xiklyis doeuh tyamp khoq dah haih zis gas, lvpe jens dah maussauh mas, Israel dius jens eh, hau mhanhdyvp mas nyeici zvn gyo lyis namoq sat dah gaunyhauq yahge lomhxangh lainh zis gas, Ngos lyis paiq zis nghuot lah?

⁴³Namoq paiq das xiklyis kuot toh dah gywes lho tsain nghuot dah Molok dah zvng yahge namoq dah gywes Rephan dah kyi namoq tsain wuq. Housoeh yvmvyah namoq lyis ngos Babilon lai shoq jonsdoeus loh nhang das, ge lhaih toh.

⁴⁴Nvng nyvng dah vzwvng yah dvyhangteh chank kuot aq, ge Moshe lhyi taiq kat zis teh kuot dah kanghjyoeng zvng lyis, hauh mhanhdyvp mas, yah phauh thyeih moq xauh yoeus.

⁴⁵Hauh thang lhyi yah phauh thyeih moq gas, nyamoq xikkhonh masyah Mangso khat tyamp dah gohnyau bang mau lyis nyamoq dah mau kuot das xiklyis Yoshua yah dvgeh wvng los uhlyis haih zvng eq chi wvng los las Dawi dah zaih jweh shoq joq.

⁴⁶Dawi gas Mangso xikkhonh mas nyoqnho yoh las, Yakop dah Mangso nyhenshang zvng xo das xiklyis sang toh goeus laus eq,

⁴⁷Solomon yuk nyah xiklyis zvng kuot dyei.

⁴⁸Nghuot laus eq nyhang thank Soeu ka, dius loq yah dvkuot yhen mas lungh zis ma nghuot. Hauh cho lvpe taiq zis gas,

⁴⁹Maukhung ka ngah hwankti tank, nyeisjvng gas ngah nangte nghuot. Nvng ngah xiklyis khasoeh teh dah yhen kuot das lah? Ngos no das joqyos gas khamha nghuot lah?

⁵⁰Hau dvnganh zis lyis ngah loq yah kyingh dvkuot toh ma nghuot lhyeh? ge Yhensain taiq, ge.

⁵¹Nhaiqlom than lha ehnyet yahge no lyis vthyoh ma tyomh bang eh, namoq vjangh Gyingshang Dyos lyis ngoek tyamp; namoq dah phauh thyeih moq kuot teh namoq eq housoeh dvtsain kuot nyeis.

⁵²Namoq dah phauh thyeih ma shoeuhshih ku dah lvpe hank bos lah? Hauh Dan Soeu thuq los das cho lhyi taiq hoeuh bang lyis, nyamoq sat. Gvshih namoq eq hauh soeu lhyi kyauh tyamp bang yahge sat bang nghuot.

⁵³Loeuswons bang masyah xauh yoeus dah Mangso dah lyi xauh yoeus bang nghuot laus eq, namoq hauh yvlyis chank tyink zis ma nghuot, ge.

⁵⁴Hauh cho xauhgyo lyis nyamoq nhaiq gis yo zis yah nyang lyis zwis swih las tsain yoeuh.

⁵⁵Nyang gas Gyingshang Dyos dyingh las, maukhung mha yoeuh kat lyis, Mangso phunk yahge Mangso dah loqyos shot pheh Yesu yap joq yvlyis nyvng las,

⁵⁶Yoeuh aq, maukhung phank hanh joq las cangsoeu Lo gas Mangso dah loqyos shot pheh yap joq yvlyis ngos nyvng goeus, ge.

⁵⁷Hauh uhlyis nyamoq gas no cauq, yomkat kaiq las, dvyih dvyot dvlhain dvm lyis nyah jyank mas tsain dyvm e las,

⁵⁸nyamoq gas nyang lyis wus nghe pheh she thuq loh las lukzains yah tsain chomp doeuh. Hauh uhlyis kanghjyoeng jens eq nyamoq dah dyi khyuot las Saulo ge dah loyvm phoq khyeiyang mas tsain toh.

⁵⁹Housoeh tsain doeuh nyeis lyis, Stephan shvmanh dung zis gas, Yhensain Yesu eh, ngah dyos lyis lhom yoeus dyei aq, ge.

⁶⁰Tsai, nyang phvluk zomhgyuis las, Yhensain eh, haih yobos nyamoq lyis vhuon dyei ge yomkat kaiq. Hauh zis dye taiq lyis nyang shei goeus.