Read Achang LVGYO 8 Bible Online

LVGYO 8 - Achang bible

LVGYO 8

¹Saulo eq nyang lyis sat dah yvmas bos jyonh. Hauh buisnyeis lyis Yerusalem mas dah phung ka shoeuhshih zis xauh los las, lvgyo jens masyah lai las gohtoeu dvnganhmoq gas Yuda mau, Samari mau, joqyos khyiq khanghmuh mas tsain dyos loh.

²Nghuot laus eq lomsjingh cho mha wontang bang gas, Stephan lyis ba nyhop las, nyah xiklyis kukxi zainsmuh kuot.

³Saulo ka yhen khanghmuh wvng las nyelo yukgis lo lyis lang she lha thung lhunk zis yahge hau phung lyis thyoq sanh tyamp.

⁴Dyos loh bang gas, loh jweh dah joqyos khanghmuh mas Dang lyis taiq kyoh.

⁵Hauh uhlyis Philip gas Samari wus mas loh las, Khristu dah cho taiq kyoh.

⁶Nyang taiq kyoh cho xauhgyo zis yahge nyang chixoeuq dah vlho tsain nyvng lyis, dius jens ehnyet dvlom yah nyah dang lyis nhaiq wvng zis yah tsain gyo yoeus.

⁷Khasoeh ge lyis, yius kuq bang nyoshoq masyah, yius jens gas yomkat kaiq las tsain thuq loh. Gungsjen shei bang yahge khyei dyoq bang nyoshoq eq gis los.

⁸Housoeh las hauh wus mas svsoh gausyis nyeis.

⁹Nghuot laus eq houmha Simon ge soeu dvyuk nyeis. Nyang gas nyah gungs nyang diuszains dvyuk teh nghamh las nyah hweq kat zis yah Samari jens lyis dvyoq mauh nhang soeu nghuot.

¹⁰Dius ngislo kuhlo dvnganhmoq yah, Haih soeu ka kuh thank Mangso dah yomsoq nghuot, ge nyah dang lyis omes zis yah tsain gyo.

¹¹Hauh soeu ka nyah hweq yah nyamoq lyis nyangh nyangh lo mauh nhang goeus yvmvyah, nyang lyis omes zis yah gyo zis nghuot.

¹²Nghuot laus eq Mangso dah munghdan cho yahge Yesu Khristu nyings yah sen dah gausyis dang Philip taiq kyoh yvlyis tsain lomsjingh las, nyelo yukgis lo jeisnyhop tsain kham.

¹³Simon nyang eq lomsjingh las jeisnyhop dye kham yoeus lyis, Philip thang mas chank nyeis. Nyang kuot dah yomsoq muh yahge vlho nyvng lyis nyang svsoh mauh.

¹⁴Samari jens Mangso dah Dang lhom yoeus zis lyis Yerusalem mas nyeis dah lvgyo jens xauhgyo lyis, nyamoq gas Petru yahge Yohan lyis nyamoq jyank mas nhang kat.

¹⁵Nyah aiq yuk eq houmha jweh lyis, nyamoq Gyingshang Dyos xauh yoeus das xiklyis shvmanh tsain dung dyei.

¹⁶Khasoeh ge lyis nyamoq hank thoq mas eq Gyingshang Dyos ma gyoh lyih ku shih. Yhensain Yesu dah nyings mas jeisnyhop kham zis kyingh dvtsain nghuot shih.

¹⁷Housoeh lvgyo Petru yahge Yohan nyamoq thoq mas loq kih dyei lyis, nyamoq hau Gyingshang Dyos tsain xauh kham yoeus.

¹⁸Lvgyo nhaiqtang dah loq kih dyei las Dyos xauh kham yoeus zis lyis Simon nyvng lyis, nyang ngwis e dyei lho lha,

¹⁹sang zis gas, Hank thoq mas laus eq ngos loq kih lyis, hauh soeu Gyingshang Dyos xauh yoeus das xiklyis, housoeh teh dah yomsoq ngos lyis eq dyei aq, ge.

²⁰Petru taiq zis gas, Mangso dah jyungshuk lyis ngwis yah xauh yoeus das ge nghamh yvmvyah, nah ngwis gas nvng yah dvgeh dyoqbis bas jungh.

²¹Nah ehnyet Mangso dah xikkhonh mas ma dan joq yvmvyah, haih cho mha nvng ma bos, gvmboms ma yoh.

²²Housoeh yvmvyah nah lhung cho lhyi nhaiqlom thaiq las Yhensain lhyi dung aq, nah ehnyet mas nghamh khoq cho toq khyuot dyei mvbeh.

²³Khasoeh ge lyis nvng mas noh cho yah dyingh joq las yaunos dah mauchuotdwang mas lungh joq yvlyis ngos nyvng, ge.

²⁴Simon phuk taiq zis gas, Nah aiq yuk taiq cho ngah jyank mas cha eq ma jweh bas jungh, ngah nyhen shang nah aiq yuk nyang Yhensain jyank mas bos dung dyei geh, ge.

²⁵Nyah aiq yuk gas Yhensain dah dang cho kanghjyoeng kat las dye taiq kyoh lyis, Samari wukhau nyoshoq mas hau gausyis dang taiq kyoh uhjyangh Yerusalem pheh tsain tauh loh.

²⁶Gvshih Yhensain dah loeuswons soeu Philip lyis taiq zis gas, Toq aq, Yerusalem masyah Gaza pheh loh dah cho bangh shoq, mautyi pheh dyet loh aq, ge. Hauh cho ka mhanhdyvp cho nghuot.

²⁷Housoeh nyang toq las loh. Yoeuh aq, Ethiopia mas guon soeu hwankti nyhiq Kandake dah xikkhonh mas nyoqnho ngelang zainsmuh yoh las, nyah zisyos dvnganh yah zom soeu Ethiopia dius Unuk gas, Mangso lhyi chungh paiq das xiklyis Yerusalem mas loh khoq.

²⁸Gvshih nyang doms tauh loh zis nyah nyang lhyingh khau mha tsung las lvpe Esaia dah maussauh nghap nyeis.

²⁹Hauh uhlyis Dyos yah Philip lyis taiq zis gas, Loh aq, hau lhyingh yah tanh tanh loh aq, ge.

³⁰Philip eq wuih loh las Esaia maussauh nghap nyeis zis xauhgyo lyis, Nvng nghap cho lhyi seqgyo lhyeh, ge nyang lyis nyei.

³¹Hauh soeu phuk taiq zis gas, Vjyuk taiq kyoh das soeu ma bos lyis ngos khasoeh kuot las seqgyo das lah, ge las nyang yah dvgeh lhyingh khau mha wvng tsung das xiklyis Philip lyis yus.

³²Nyang nghap dah maussauh dang gas haih zis nghuot. Yvng lyis teh nyang lyis sat das soeu jyank mas shwih loh; Yvnglo gas yvng mauh gom soeu xikkhonh mas taih toh teh, nyang nyah nhuot ma haq.

³³Nyang khyoq zis xauh yvmvyah, nyang lyis jyoeng khyvlyis dang thang ma tsain thyet dyei. Nyah dius caiq hank yoh shap? Khasoeh ge lyis nyah kang ka, Nyeisjvng thoq mas thank tyamp goeus, ge.

³⁴Unuk Philip lyis phuk taiq zis gas, Haih lvpe ka hank lyis toeuq las taiq au lhyeh, nyah gungs lyis nyang taiq au? Nghuot ya, gohtoeu dvyuk yuk lyis taiq lah, ge.

³⁵Hauh uhlyis Philip dang taiq phank las, hauh maussauh masyah dang zoh yoeus lho lha, Yesu yah sen dah gausyis dang nyang lyis taiq kyoh.

³⁶Housoeh nyah aiq yuk tsoq loh las jeis joq yvmas jweh lyis Unuk gas, Yoeuh aq, heimha jeis joq; ngos jeisnyhop kham das xiklyis tomp toh das zis cha bos lah, ge.

³⁷Philip taiq zis gas, Nah nhaiqlom dvnganh yah nvng lomsjingh goeus ya, gis kham goeus, ge. Nyang phuk taiq zis gas, Yesu Khristu gas Mangso dah Lo nghuot nyeis zis gas ngos lomsjingh goeus, ge.[4]

³⁸Housoeh nyah lhyingh no nhang lha, nyah aiq yuk jeis lvng mas gyoh e lha, Philip gas Unuk lyis jeisnyhop dyei.

³⁹Jeis masyah tsain thuq los lyis Yhensain dah Dyos Philip lyis shwih loh las, ma nyvng kat lo. Unuk eq gauslaus zis yah nyah cho nyang loh lo.

⁴⁰Philip gas Azotu wus mas jweh nyeis yvlyis nyang soh. Nyang Kesare wus jweh shoq loh uhlyis suh lai dah wus khanghmuh mas hauh gausyis dang taiq kyoh.