Read Achang LVGYO 9 Bible Online

LVGYO 9 - Achang bible

LVGYO 9

¹Hauh yoq lyis Saulo ka Yhensain dah changlo jens lyis sat das xiklyis kyuk tant cho lhyi tsoq kuot nyeis shih. Housoeh nyang gas phudyei zainsmuh jyank mas e lha,

²haih cho chank bang nyelo yukgis lo, nyvng ya nyvng yvlyis nyhik las Yerusalem mas yoh she los shoq, Damasku wugungs, lyi jungs mas bang lyis dyei kat das vmingh maussauh sang wons.

³Nyang Damasku wugungs nvm mas jweh lyis maukhung mha dah bvng zis nyah yvmlhaink yah nyetlos nyettant bvng thuq los.

⁴Nyang eq nyeisjvng mas lains loh lyis, nyang lyis taiq dah thwe dvkoeuq xauhgyo zis gas, Saulo, Saulo, nvng ngos lyis chamus shoeuhshih nyeis lah, ge.

⁵Hauh uhlyis nyang gas, Yhensain eh, nvng hank nghuot lah, ge nyei. Yhensain taiq zis gas, Ngos gas nvng shoeuhshih nyeis dah Yesu nghuot.

⁶Nghuot laus eq, toq las wus mas wvng loh aq. Nvng kuot chah cho nvng lyis taiq kyoh langh das, ge.

⁷Nyang yah dvgeh loh bang gas tsain mauh: khasoeh ge lyis, thwe xauhgyo laus eq hank lyis eq ma nyvng.

⁸Saulo nyeisjvng masyah toq las nyoq phank yoeuh lyis cha eq ma nyvng yvmvyah, nyamoq gas nyang lyis loq masyah she las Damasku wus mas shwih wvng loh.

⁹Gvshih nyang gas somh nyeih top nyoq ma nyvng las ma zo ma shuk nyeis.

¹⁰Gvshih Damasku wus mas Anani ge dah changlo dvyuk nyeis. Yhensain ka nyoqnyvng masyah, Anani eh, ge lui. Nyang eq, Yhensain eh, heimha nyeis, ge toeuh.

¹¹Yhensain taiq zis gas, Toq aq, Chodan ge dah wus cho mha e las, Yuda yhen mha Tarshu mas dah dius Saulo ge soeu lhyi e xo aq, nyang shvmanh dung nyeis.

¹²Nyah nyoqnyvng mas Anani ge soeu nyah jyank mas wvng los las, nyang nyoq doms nyvng bas jungh, ge nyah thoq mas loq kih dyei zis, nyvng goeus, ge.

¹³Anani gas, Yhensain eh, hauh soeu ka Yerusalem mas nah Gyingshang bang lyis ma gis khyvlyis kha iq kuot zis gas, dius nyoshoq masyah loeus nyoshoq xauhgyo goeus.

¹⁴Nah nyings yoeus bang dvnganh lyis twih she loh das ge, phudyei uhjyung jens jyank masyah vmingh xauh yoeus goeus, heimha eq jweh nyeis, ge toeuh.

¹⁵Nghuot laus eq Yhensain nyang lyis taiq zis gas, Dv e aq, hauh soeu ka gohnyau bang yahge hwankti jens xikkhonh mas eq, Israel vnyau xikkhonh mas eq ngah nyings wons wuq das xiklyis ngos khyen toh, ngah jyeidwis nghuot.

¹⁶Khasoeh ge lyis ngah nyings gvng mas kha iq shanghsenh shohjyen xauh das cho ngos nyang lyis chixoeuq das, ge.

¹⁷Housoeh Anani hauh yhen mha jweh e lha, Saulo thoq mas loq kih las, Vmang vnoeuh Saulo eh, nvng nyoq doms nyvng zis yahge Gyingshang Dyos yah dyingh bas jungh, nvng los cho mha nvng lyis nyvng xoeuq dah Yhensain Yesu gas ngos lyis nhang kat, ge lho lhyi,

¹⁸Houyah dvyih Saulo dah nyoq masyah vkyvp teh dah zis gyoh tyamp las nyah nyoq doms nyvng goeus. Housoeh nyang toq las jeisnyhop kham.

¹⁹Zonoms eq zo las yom huiq yoeus. Hauh thang lhyi Saulo ka Damasku wus mas dah changlo jens yah dvyoq nyeis uhjyangh,

²⁰Khristu gas Mangso dah Lo nghuot, ge hauh uhlyis nyang lyi jungs mas tsain taiq kyoh.

²¹Nyah dang xauh ya xauhgyo bang gas mauh las, Haih soeu ka Yerusalem mas haih nyings yoeus bang lyis lhoq thyoq soeu ma nghuot lhyeh? Gvshih heimha eq housoeh teh bang lyis nyhik las phudyei uhjyung jens jyank mas loh kyauh das zis los jweh nyeis ma nghuot lhyeh, ge taiq.

²²Saulo ka dvnyeih dvnyeih yombos los las, Yesu gas Khristu nyang nghuot dah cho kanghjyoeng Chixoeuq zis yah Damasku mas nyeis dah Yuda jens lyis mauh nhang.

²³Buisnyeis nyangh nyangh lo thang lhyi Yuda jens nyang lyis sat das zis xamgoh.

²⁴Nghuot laus eq nyamoq dah khaujeini cho lhyi Saulo seq tyamp goeus. Nyang lyis yoh sat shoq, khomh mas nyeih nyenh tsain lhom nyeis.

²⁵Housoeh las changlo jens gas, nyenh lyis nyang lyis mhanghkhoq masyah ciank khomhbaiq cho nghe pheh tsain xuot khyoq kat.

²⁶Housoeh nyang Yerusalem mas jweh lyis changlo jens yah zomhgoh das zis yomkat; nghuot laus eq nyang gas changlo nghuot goeus zis nyamoq ma jingh las nyang lyis dvnganhmoq gyuk.

²⁷Nghuot laus eq Barnaba gas nyang lyis lvgyo jens jyank mas shwih e lha, Saulo ka Yhensain yah cho mas khasoeh xauhgoh las, Yhensain yah nyang lyis khasoeh taiq zis eq, Damasku mas Yesu nyings yoeus las womh womh taiq kyoh cho eq nyamoq lyis taiq kyoh.

²⁸Housoeh Yerusalem mas nyang nyamoq yah thuq wvng kuot uhjyangh,

²⁹Yhensain Yesu dah nyings yoeus las womh womh taiq kyoh nyeis. Greek nyingh kat dah Yuda jens yah eq taiq phyen-goh yvmvyah, nyamoq gas nyang lyis sat das ge sont.

³⁰Hauh cho lhyi boekyis seq lyis nyang lyis Kesare jweh shoq shwih kat las Tarshu pheh nhang kat.

³¹Hauh uhlyis Yuda mau, Samari mau yahge Galile mau dvkhauyah dah phung ka nyenstap zis yah tsain kuhxing los. Nyamoq gas Gyingshang Dyos dah nhaiqtaink dyei zis yah dvyhangteh Yhensain lhyi gyukwoms zis yah nyeis las nyoshoq jebais los.

³²Hauh uhlyis Petru gas dvkhauyah chank komh yenh. Dvlhain ka Luda wus mas nyeis dah Gyingshang bang jyank mas eq jweh e.

³³Hauh yvmas gungsjen shei lha xet zvn top yhetyos masyah ma yoh toq dah Anea ge vbusbih dvyuk lyis nyvng.

³⁴Petru nyang lyis taiq zis gas, Anea eh, Yesu Khristu nvng lyis gis los nhang goeus: toq aq, nah yhetyos shung aq, ge. Houyah dvyih nyang toq loh.

³⁵Luda yahge Sharon wus mas nyeis bang dvnganh eq nyang lyis nyvng las Yhensain jyank pheh tsain lhain los.

³⁶Gvshih Yopa wus mas Tabitha ge dah changlo vmesbih dvyuk nyeis. Greek pheh hauh nyings gas Dorka ge. Vjyuk gas cvt nghuot. Nyang gas gis dah muhzoh yahge vlu dyei cho mas nhaiqbos soeu nghuot.

³⁷Hauh yoq lyis nyang nos las shei tyamp. Nyah mvng lyis cheih las nyhang tsank yvp mas toh toh.

³⁸Luda gas Yopa wus yah ni joq las, Petru houmha nyeis cho changlo jens xauhgyo lyis nyamoq dius dvzomh nhang lha, Ngamoq jyank pheh lvnyap jenh lyih aq, ge dung kat.

³⁹Petru toq las hauh aiq yuk yah dvgeh chank loh. Nyang jweh lyis nyhang tsank yvp mas shwih wvng loh las, chauhmuh jens dvnganhmoq nyah vyvm mas yap ngaus uhjyangh, nyamoq yah dvgeh nyeis shih uhlyis Dorka chop dah dyi chixoeuq las nyeis.

⁴⁰Petru dvnganhmoq lyis nghe pheh khat thuq lho las, phvluk zomhgyuis las shvmanh dung nyeis. Housoeh hauh mvng pheh lhain los las, Tabitha eh, toq aq, ge. Hauh uhlyis Tabitha gas nyoq phank las Petru lyis nyvng lyis toq tsung toh.

⁴¹Petru eq loq yhuonh kat las she toq lho las, gyingshang bang yahge chauhmuh jens lyis khi yoeus las vdwis kyauh.

⁴²Hauh cho lhyi Yopa wuxom gonh xauhgyo yvmvyah nyoshoq Yhensain lhyi lomsjingh.

⁴³Housoeh Petru gas Yopa wus mas dvyoq lo shohyeis muh kuot soeu Simon yah dvgeh nyeis.