Read Achang ROMA 1 Bible Online

ROMA 1 - Achang bible

ROMA 1

¹Yesu Khristu dah jyeidwis ngos Paulo ka, lvgyo duot das xiklyis khi toh las Mangso dah gausyis dang nyhenshang toeuq toh zis xauh soeu nghuot.

²Gausyis dang mas nyang gas gohlhain lvpe jens lyis yah gyingshang lhaihtoh dang mas dangthoengh toh las,

³Nyah Lo, yah Yhensain Yesu Khristu lyis gas, gungsshoh khyvlyis Dawi dah vnyau vshih mas khoeu los nhang.

⁴Gyingshang dah Dyos mas, yomsoq yah nyang lyis shei masyah dwis toqh kat las nyang gas Mangso dah Lo, yah Yhensain Yesu Khristu nghuot yvlyis taiq hoeuh.

⁵Nyah nyings gvng mas dius nyau khanghmuh hau lomsjingh cho lhyi domsyos gyo bas jungh ge, nyah jyank masyah jyehjuh yahge lvgyo muh lyis ngamoq xauh kham yoeus.

⁶Yesu Khristu yah sen bang duot das xiklyis khi tsainh toh bang mas namoq eq bos.

⁷Mangso dah jyetdap bang yahge gyingshang dius bweh bas jungh ge, khi yoeus zis xauh dah Roma bang dvnganhmoq thoq mas, yah Uwus Mangso yahge Yhensain Yesu jyank masyah, jyehjuh yahge nyenstap zis joq bas jungh.

⁸Namoq dah lomsjingh zis gas mungkvn gonh seq loh goeus las, Yesu Khristu nyings yah ngos ngah Mangso lhyi shih nhaiqshoqlang sang.

⁹Ngah shvmanh dung dang mas ngos namoq lyis soh nyeis cho lhyi, nyah Lo dah gausyis dang taiq kyoh zis yah ngos phuqsoe nyeis, Mangso ka ngah kanghjyoeng nghuot.

¹⁰Mangso dah ehnyet o khyvlyis gvshih thang thank lyis ngos namoq yah los yoh xauhgoh das cho phank dyei das xiklyis ngos shvmanh dung nyeis.

¹¹Khasoeh ge lyis namoq lyis yom yoh bos nhang shoq, Dyos jyungshuk dvkhamh yoh gvm dyei bas jungh, ngos namoq yah yoh xauhgoh das nyhenshang hwangh nyeis.

¹²Ngos taiq mes zis gas, yah lomsjingh cho gvng mas yang nyang changh nyang yom yoh dyei goh das oen zis nghuot.

¹³Hauh thoq lyis boekyis eh, gohnyau bang masyah khyuot yoeus xauh bang lyis yoh taiq kyoh shwih los teh, namoq masyah eq yoh taiq kyoh shwih los das xiklyis namoq jyank mas los das zis nyoshoq lhain sont laus eq, gvshih jweh shoq kyamp toh zis xauh nyeis yvlyis, namoq lyis seq nhang mes.

¹⁴Heleni yahge dius soengh, joeui bos bang, joeui ma bos bang yahge dius dvnganh lyis gausyis dang taiq kyoh das nyhenshang jyen shauh soeu ka ngos nghuot.

¹⁵Housoeh las namoq Roma bang lyis eq hau gausyis dang svsoh taiq kyoh mes nyeis.

¹⁶Hau Khristu dah gausyis dang mas ngos ma xoq: khasoeh ge lyis hauh zis gas cangxeih lyis Yuda, hauh thang lhyi gohnyau lomsjingh bang dvnganh lyis yoh khyuot yoeus das xiklyis Mangso dah yomsoq nghuot.

¹⁷Lomsjingh gvng mas dan cho yoh ge, Mangso dah dan cho ka, hau gausyis dang mas Chixoeuq toh: khasoeh ge lyis dan soeu ka lomsjingh zis yah dwis nyeis das, ge lhaih toh.[1]

¹⁸Maukhung mhayah Mangso dah nhaiqlom dyis zis gas, gywes ma tsungh bang yahge nyamoq dah ma gis muhzoh yah jyoeng cho lhyi kyamp gos tyamp bang thoq mas Chixoeuq.

¹⁹Khasoeh ge lyis Mangso lhyi seq gis cho ka, Mangso nyang nyamoq lyis Chixoeuq goeus las, hauh zis gas nyamoq xikkhonh mas dede nghuot.

²⁰Khasoeh ge lyis, nyoq yah ma nyvng, Mangso nyah vcaiq vto yomsoq yahge Mangso nghuot cho ka, hau gvnkhanh zis dvnganh masyah yoh nyvng las, nyamoq hauh zis lyis mauthuq nyeiszvn lyis yah nyvng las seq goeus. Housoeh yvmvyah nyamoq jyamp gus ma bos lo.

²¹Nyamoq Mangso lhyi seq toh las, nyang lyis Mangso lhyi teh ma phauh nyang, Nhaiqshoqlang eq ma tsain ge, nyamoq nghamh cho ka vkom duot las nyamoq dah koh ehnyet gas chuot tyamp.

²²Nyamoq gas nyang gungs nyang joeui bos tsain ge laus eq nyamoq gas koh bang nghuot.

²³Ma seq shei dah Mangso phunk nyoqnho lyis, seq shei dah dius, nghoq, nyei khyei dap yewus, shweh loh ja dah silho jens yah tsain thaiq tyamp.

²⁴Housoeh las Mangso ka nyamoq lyis nyamoq dah obos dah vchoqh vjyot muh kuot bas jungh ge kyauh tyamp. Housoeh nyamoq gas nyamoq nyang changh vxoq vcaiq muh tsain kuot.

²⁵Khasoeh ge lyis, Mangso dah jyoeng cho lhyi hwah cho yah tsain thaiq tyamp. Gvnkhanh soeu lhyi paiq phuqsoe das gungsthaiq gvnkhanh toh zis lyis tsain paiq phuqsoe nyeis. Gvnkhanh toh soeu nyang gas vcaiq vto phunk bos. Amen.

²⁶Housoeh las Mangso ka nyamoq lyis vxoq vcaiq dah gungsshoh nyetnau muh mas kyauh tyamp. Nyamoq dah vmesbih jens yangh soengh choenk lyi khyvlyis zomh cho yah tyi lha nyamoq nyang changh tsain zomhgoh.

²⁷Vbusbih jens eq vmesbih jens yah zomhgoh dah soengh choenk lyi toh tyamp las vbusbih nyang changh vxoq vcaiq muh tsain kuot yvmvyah nyamoq dah gungs mas nyamoq dah nyetnau yobos yah mon yih dah yobos dyei zis tsain kham yoeus.

²⁸Tsai, Mangso cho, jyoeng dah seq cho lhyi ngoek tyamp yvmvyah, Mangso ka nyamoq lyis ma gis dah ehnyet yah suh e das xiklyis kyauh tyamp las nyamoq gas nyamoq ma kuot vvng dah muh lyis tsain kuot.

²⁹Nyamoq gas lhung cho vja ja, ma gis cho, nyoqnoq obos, gohyuk lyis nos nhang mes cho yah dyingh joq; noh, dius sat, dyoqgoh, mhuih, hoeng, wotwu ma gis zis yah dyingh joq.

³⁰Loeusmus goh, khyangh sang goh, Mangso lhyi hoeng bang, moengs bang, khwank bang, gomloeus pan bang, nyhiphoq dang ma gyo bang,

³¹Seq cho ma bos bang, dang thanghchvp lais bang, jyetdap ehnyet ma bos bang, yobos ma yoh thoq khyuot dyei bang yahge nhaiq ma seq nyen bang nyamoq tsain nghuot.

³²Housoeh kuot bang gas shei mon, ge Mangso dah soetuon cho lhyi seq laus eq nyamoq gungs nyang hauh zis lyis tsain kuot thoq lyis magoh, housoeh chank kuot bang lyis eq xihhonh, bos gaus nyeis.