Read Achang ROMA 10 Bible Online

ROMA 10 - Achang bible

ROMA 10

¹Boekyis eh, ngah vnyau Israel jens khyuot yoeus zis xauh das nyhenshang ngos ngah ehnyet nhaiqlom dvnganh yah ngos kha iq o mes zis yah nyamoq xiklyis Mangso jyank mas shvmanh dung nyeis lah!

²Khasoeh ge lyis nyamoq gas Mangso dah cho mha nhaiqkank wvng yvlyis ngos kanghjyoeng yoh kat. Nghuot laus eq hau nhaiq wvng yvmas seq cho ma bos.

³Khasoeh ge lyis nyamoq gas Mangso jyank masyah los dah dan cho lhyi ma tsain seq las, vsainnyang dah dan cho lhyi doengs nhang das ge yomkat yvmvyah nyamoq gas Mangso dah dan cho lhyi ma lhom yoeus.

⁴Khasoeh ge lyis lomsjingh bang dvnganh gas dan cho yoh bas jungh, Khristu gas hau Lyi lyis thank loh nhang goeus.

⁵Lyi chank zis yah Mangso xikkhonh mas dan soeu yoh bweh cho yah sen lha Moshe ka, Lyi chank soeu ka dwis nyeis das ge, lhaih toh.

⁶Nghuot laus eq lomsjingh zis yah Mangso xikkhonh mas yoh dan los cho yah sen lha lhaihtoh dang mas, nah ehnyet mas, Khristu lyis gyoh los nhang das xiklyis maukhung mha hank yoh doq das lah, oen vsang.

⁷Khristu lyis shei masyah dwis toq nhang das xiklyis, Noq thank joqyos mas hank yoh gyoh loh das lah, oen eq vsang.

⁸Housoeh ge zis gas, Mangso dang gas nvng yah ni joq, nah nhuotkuk mas, nah nhaiqlom khau mha bos. Hauh zis gas ngamoq taiq kyoh dah lomsjingh cho yah sen dah dang nghuot.

⁹Housoeh Yesu gas Yhensain nghuot, ge nah nhuot yah rhen lha, Mangso ka nyang lyis dwis toq nhang yvlyis nah ehnyet mas lomsjingh nghuot lyis gas nvng khyuot yoeus zis xauh das.

¹⁰Khasoeh ge lyis dius gas dan zis xauh yoeus shoq, ehnyet nhaiqlom yah lomsjingh las, khyuot yoeus zis xauh shoq nhuot yah rhen toh.

¹¹Khasoeh ge lyis lhaihtoh dang eq, Nyang lyis lomsjingh soeu hank laus eq yom ma gyau das, ge.

¹²Khasoeh ge lyis Yuda dius, gohnyau bang lyis khwih khyamh zis ma bos yvmvyah houmha yuk khanghmuh bos. Mangso ka dvnganh dah Yhensain nghuot las, nyang lyis lui bang dvnganh lyis shvmanh jyehjuh magons magoh dyei.

¹³Lhaihtoh dang mas taiq zis yah dvyhangteh, Yhensain dah nyings lyis lui soeu khanghmuh khyuot yoeus zis xauh das.

¹⁴Nghuot laus eq Yhensain lhyi ma lomsjingh shih bang gas nyang lyis khasoeh yoh lui das lah? Nyamoq dang lyis ma xauhgyo ku lhyi khasoeh yoh lomsjingh das lah? Dang cho taiq kyoh soeu ma bos lyis nyamoq khasoeh yoh xauhgyo das lah?

¹⁵Gausyis dang taiq kyoh das bang lyis ma nhang kat lyis gas khasoeh yoh taiq kyoh das lah? Lhaihtoh dang mas taiq zis yah dvyhangteh, hau gausyis dang wons los dah loeuskyoh bang dah khyei ka kha iq yungh!

¹⁶Nghuot laus eq hau gausyis dang lyis dvnganhmoq lhom yoeus zis ma nghuot. Khasoeh ge lyis Esaia nyang taiq zis gas, Yhensain eh, ngamoq loeus lyis hank lomsjingh lah, ge.

¹⁷Housoeh las hau lomsjingh ehnyet gas loeus xauhgyo masyah bweh los, hauh loeus gas Khristu dah cho taiq kyoh masyah los.

¹⁸Nghuot laus eq ngos nyei zis gas, Nyamoq hauh loeus ma xauhgyo ku zis jyoeng lhyeh? Nyamoq xauhgyo goeus. Khasoeh ge lyis lhaihtoh dang mas taiq zis yah dvyhangteh, Nyamoq dah thwe ka nyeisjvng gonh mas, Nyamoq dang gas mungkvn goms shoq duons loh goeus, ge.

¹⁹Tsai, ngos nyei zis gas, Israel dius jens ma seqgyo lhyeh? Moshe nyang shih toeuh zis gas, Ngos gas cha ma nghuot dah dius nyau lyis yhung zis yah ngah dius nyau lyis noh nhang das. Koh dah dius nyau lyis yhung lha namoq lyis nhaiqyo nhang das, ge.

²⁰Hauh thoq lyis Esaia womh womh taiq zis gas, Ngos lyis ma xo bang ngos lyis nyvng goeus. Ngah cho ma nyei bang jyank mas ngos thuq xoeuq, ge.

²¹Nyang Israel yah sen cho taiq zis gas, Domsyos ma gyo, gomloeus toq dah dius jens lyis lhom yoeus das xiklyis ngos ngah loq dvnyeih gonh yhuonh toh, ge.