Read Achang ROMA 11 Bible Online

ROMA 11 - Achang bible

ROMA 11

¹Housoeh las ngos nyei zis gas, Mangso ka nyah vnyau lyis peq tyamp goeus lah? Housoeh ma nghuot, Ngvnyang eq Israel vnyau, Abraham dah vshih yahge Benyamin vkoq nghuot.

²Mangso ka xik lyis yah nyang khyen toh dah nyah dius nyau lyis ma peq tyamp. Lhaihtoh dang mas Eliya gas Israel jens lyis yobos huon zis yah Mangso lhyi khasoeh dung yvlyis namoq seq.

³Yhensain eh, nyamoq nah lvpe jens lyis sat goeus. Nah phon lhyi eq tsain thyoq tyamp; ngos kyingh dvnyet joq lo las, nyamoq ngah kang lhyi eq tsain xo, ge.

⁴Mangso ka nyang lyis khasoeh ge toeuh lah? Bala mangso xikkhonh mas phvluk zomh gyuis ma paiq dah yukgis nyhet khyoengh gas, ngos ngah xiklyis nyhet toh, ge.

⁵Houyah dvyhangteh haq caiq mas eq Mangso jyehjuh gvng mas nyang khyen yoeus zis xauh bang dvyhamh nyet shih.

⁶Nyang khyen yoeus cho ka muhzoh gvng mas ma nghuot, nyah jyehjuh gvng mas nghuot. Muhzoh yah nghuot lyis gas, nyah jyehjuh cho ka jyehjuh gyingh ma nghuot lo.

⁷Housoeh lyis khasoeh taiq das lah? Israel jens gas nyamoq xo zis ma nyvng. Mangso khyen yoeus zis xauh bang nainlo dvtsain nyvng; nyet bang gas Mangso lui zis lyis ma xauhgyo.

⁸Lhaihtoh dang mas taiq zis yah dvyhangteh, Mangso ka nyamoq dah uhnuk yahge ehnyet nhaiqlom lyis yoeu nhang lha khvnyhik jweh shoq nyamoq ma nyvng, xauh eq ma xauhgyo.

⁹Dawi eq, Nyamoq dah zo pwe ka nyamoq xiklyis lhyik yahge twih mas nyih zis yah lains bas jungh, nyamoq joeng zis xauh bas jungh.

¹⁰Nyamoq ma yoh nyvng das xiklyis nyoqjet nhang zis xauh bas jungh; Nyamoq dah nungs gas lyei dah yvwons o mha vjangh goeuh joq bas jungh, ge.

¹¹Housoeh las ngos nyei zis gas, Israel jens gas nyamoq dyoqbis shoq thungh lains goeus lah? Ma nghuot, Nyamoq yaunos kuot yvmvyah khyuot yoeus cho ka gohnyau bang jyank mas jweh loh. Houka Yuda dius jens noh cho bweh das nyhenshang nghuot.

¹²Yuda jens dah yaunos kuot zis gas mungkvn dius jens xiklyis shvmanh jyehjuh nyoshoq bweh los nhang. Yuda jens dah dyos mas shohjyen cho ka gohnyau bang xiklyis shvmanh jyehjuh nyoshoq bweh los nhang. Housoeh lyis gas Yuda jens dvnganh hau khyuot yoeus yvmas bos nhang zis xauh lyis gas, kha iq kuh dah jyehjuh jyungshuk bweh los das lah!

¹³Housoeh las ngos namoq gohnyau bang lyis taiq zis gas, Ngos gohnyau bang dah lvgyo nghuot joq dvchank, ngos ngah muhzoh mas nyoqnho ngelang yoeus las khwank nyeis.

¹⁴Ngos ngah vnyau lyis noh dah ehnyet bos nhang zis yah nyamoq dvyhamh lyis yoh khyuot yoeus das.

¹⁵Khasoeh ge lyis, nyamoq lyis peq tyamp zis gas cangsoeu dius jens yah Mangso jo mas buisnoms bweh los shoq mehoq tamp cho bweh los lyis gas, Yuda jens lyis Mangso doms lhom yoeus cho ka shei bang lyis kang dwis nhang zis nghuot.

¹⁶Khasoeh ge lyis cangxeih yhomh dah guknyau shih nyau khyvlyis phudyei dah ohlhyoq dvkhyiq gas gyingshang nghuot lyis gas hau ohlhyoq dvkoeuq gonh gyingshang. Vnyet gyingshang lhyi ka vko jens eq gyingshang.

¹⁷Tsungh toh dah tsanlun zains dah vko dvkhamh pheq tyamp las hauh vngot mas tsanlun lamh dah vko lhyi gyangh tsoq tsungh toh. Gohnyau bang nghuot dah nvng gas hauh tsanlun lamh dah vko yah doeusgoh las, nvng gas Yuda jens dah yombos dyos kang bos xauh gvm yoeus.

¹⁸Housoeh lyis nvng hauh vko pheq tyamp zis xauh teh dah bang lyis dius ngis ma gis yoeuh khyoq, ma gis khwank, nvng gas vko dvnghuot. Nvng vnyet lyis wons toh zis ma nghuot, hauh vnyet yah nvng lyis dvwons toh.

¹⁹Nghuot laus eq, Ngos lyis coq das zis hauh vko ka pheq tyamp zis xauh goeus, ge nvng taiq mvbeh.

²⁰Nghuot goeus, nyamoq gas ma lomsjingh yvmvyah pheq tyamp zis xauh: nvng gas lomsjingh zis yah goeng joq. Nghuot laus eq nvng vkhwank, gyukwoms nyeis aq.

²¹Khasoeh ge lyis, Mangso ka vko gyingh ge dah Yuda lyis yangh ma yu lyis gas nvng lyis eq yu das teh mus lah?

²²Haih yvmas Mangso ka kha iq nhaiq seq nyen zis yahge kha iq than shoq yau dyei yvlyis yang nyvng goeus. Nyang gas yaunos kuot bang lyis than than joeng laus eq namoq gas nyah nhaiqnyen shohgyo cho lhyi kham yoeus cho mha tsoq las mon yih shoq suh e nyeis lyis gas, Yhensain ka namoq lyis nhaiqnyen nyeis das. Nghuot laus eq namoq eq nyah nhaiqnyen zis kham yoeus mon bang ma duot lyis gas pheq tyamp zis xauh das.

²³Yuda jens nyamoq dah ma lomsjingh cho tyamp lyis gas, nyah joqyos mas doms coq zis tsain xauh das: Khasoeh ge lyis Mangso ka nyang lyis yoh doms coq.

²⁴Namoq gohnyau bang gas hau tsanlun lamh vko lhyi zan yoeus las soengh choenk nghuot dah tsanlun gyingh mas coq tsungh teh nghuot. Yuda jens gas tsungh toh dah vko gyingh teh nghuot las, hau tsanlun vko jens lyis vkhang dah vzains gyingh mas coq tsungh das zis gas Mangso xiklyis zes lwis ma nghuot lhyeh?

²⁵Boekyis eh, namoq gas namoq nyang svsoh seq ge ma nghamh das xiklyis nghop toh, Mangso dah jyoeng cho dvkoeuq ngos namoq lyis seqgyo nhang mes. Houka Israel jens gas vjangh ehnyet than joq das zis ma nghuot, laus eq houka khyuot yoeus xauh las Mangso jyank mas jweh loh das, Gohnyau bang dah sonzoh dyingh los shoq dvnghuot das.

²⁶Heika Israel dius dvnganh khyuot yoeus zis khasoeh xauh das cho nghuot. Lhaihtoh dang mas: Zion masyah khyuot yoeus soeu thuq los las, Yakop vnyau masyah lhung cho dvnganh yoeus tyamp das.

²⁷Ngos nyamoq dah yaunos yoeus tyamp dyei uhlyis, Ngos nyamoq yah haih thanghchvp toh das, ge.

²⁸Namoq gohnyau bang gvng mas Yuda jens gas Gausyis Loeus lyis peq tyamp yvmvyah nyamoq gas Mangso dah jeswus bweh los. Nghuot laus eq Mangso ka nyamoq lyis khyen yoeus dah vnyau kuot goeus yvmvyah nyamoq dah phauh thyeih moq lyis toh dah dangthoengh gvng mas nyamoq gas nyang jyetdap zis xauh bang nghuot.

²⁹Khasoeh ge lyis Mangso ka hank lyis laus eq khi yoeus las shvmanh dyei das xiklyis nghamh thyet thang lhyi ma phanh lo soeu nghuot.

³⁰Namoq gohnyau bang xiklyis gas, namoq xikpheh Mangso dah domsyos ma gyo, nghuot laus eq gvshih gas Yuda jens domsyos ma gyo yvmvyah namoq gas Mangso dah nhaiqnyen cho xauh yoeus.

³¹Namoq Mangso dah nhaiqnyen zis xauh kham yoeus teh nyamoq eq xauh kham yoeus bas jungh ge nyamoq gvshih domsyos ma gyo mus nyeis.

³²Khasoeh ge lyis Mangso ka dius dvnganh lyis nhaiqnyen zis yoh chixoeuq shoq dvnganh lyis domsyos ma gyo yvmas lhunk toh zis xauh nhang.

³³Mangso dah jyehjuh kha iq kuh joq! Nyah joeui yahge seq cho ka kha iq noq! Nyang nghamh thyet cho lhyi hank yoh phant kyoh! Nyah cho lhyi hank yoh seqgyo!

³⁴Lhaihtoh dang mas taiq zis yah dvyhangteh, Yhensain dah ehnyet lyis hank seq lah? Nyang lyis joeui hank yoh dyei lah!

³⁵Mangso jyehjuh tauh dyei bas jungh ge nyang lyis hank cha jyungshuk dyei toh ku lah?

³⁶Vyhang dvnganh yvlyis nyang gvnkhanh toh. Joq ya joq zis dvnganh gas nyang masyah, nyah xiklyis goeng joq. Mangso ka vcaiq vto phunk bos bas jungh. Amen.