Read Achang ROMA 12 Bible Online

ROMA 12 - Achang bible

ROMA 12

¹Housoeh yvmvyah boekyis eh, Mangso ka yang lyis nhaiqnyen nyeis yvmvyah, namoq gungs lyis gyingshang lha lhom yoeus mon dah dwis nyeis, lomhxangh khyvlyis Mangso lhyi ngheq phudyei geh oen ngos namoq lyis taiq kyingh yomdyei kat. Houka namoq phudyei vvng, jyoeng dah paiq cho nghuot.

²Namoq gas haih mungkvn dah vwot lyis ma wuot: Mangso lhyi namoq vkhau mha dah ehnyet nhaiqlom dvnganh lyis vsaiq thaiq nhang geh. Hauh uhlyis namoq gas Mangso o dah cho, gis cho, lhom yoeus mon cho yahge dyinghjet cho cha tsain nghuot yvlyis seq gvn das.

³Housoeh Mangso ngos lyis dyei toh dah jyehjuh jyungshuk yah ngos namoq yuk khanghmuh lyis taiq bah. Namoq nyang gungs lyis nghamh vvng thoq lyis lai las vnghamh goh. Hauh gungsthaiq Mangso dius yuk khanghmuh lyis lvdoeus toeuq las dyei toh dah lomsjingh cho yah dvyhangteh vsainnyang gungs lyis nghamh yoeuh las thyet geh.

⁴Khasoeh ge lyis dvgungs mas gungsbon nyoshoq bos, hauh gungsbon jens eq nyang muh nyang bos.

⁵Houyah dvyhangteh yang nyoshoq tsain nghuot laus eq, Khristu mas dvgungs kyingh nghuot las, nyang changh nyang sain goh joq.

⁶Housoeh yang gas yang lyis dyei toh dah jyehjuh jyungshuk nyang ja nyang nghuot zis yah dvyhangteh hauh yvlyis yhung chah. Yang yoh dah jyehjuh jyungshuk gas Mangso dah dang taiq kyoh das muh nghuot lyis gas yang yoh dah lomsjingh cho yah dvyhangteh kuot chah.

⁷Phuqsoe muh nghuot lyis gas phuqsoe muh wons wuq bas jungh; jyauh muh nghuot lyis gas jyauh bas jungh.

⁸Taiq kyingh yomdyei muh nghuot lyis taiq kyingh yomdyei muh khanh nyeis bas jungh. Vlu dyei soeu eq magons magoh dyei bas jungh; guon soeu eq yomkat las guon bas jungh; nhaiq seq nyen soeu ka gausyis ehnyet yah kuot bas jungh.

⁹Jyetdap cho mha vguons kuot zis ma bos bas jungh; ma gis yvlyis hoeng geh, gis yvlyis zwi zains toh geh.

¹⁰Jyetdap yvmas Khristan vmang vnoeuh teh jyet goh geh. Dvyuk yah dvyuk phauh nyang cho tungh chixoeuq goh nyeis geh.

¹¹Muh mas ma lan lo yomkat nyeis geh; Yhensain lhyi nhaiq wvng zis yah phuqsoe nyeis geh.

¹²Nvng nghamhloms zis gas nvng lyis gauslaus nhang bas jungh; shanghsenh yvmas jhen geh; Vjangh shvmanh dung nyeis geh.

¹³Nyungs dah Khristan dyenschangh jens lyis nvng yoh vyhang gvm dyei aq. Boengh daih nyeis geh.

¹⁴Namoq lyis shoeuhshih bang lyis Mangso jyank mas shvmanh dung dyei geh; vnhoengh goh, shvmanh dyei geh.

¹⁵Gauslaus bang yah dvgeh gauslaus las ngaus bang yah dvgeh ngaus geh.

¹⁶Dvyuk yah dvyuk xamxonh zis yah pangh thuk goh nyeis geh. Vkhwank goh, nyoqnho ma yoh dah muh lyis lhom yoeus las wons wuq nyeis geh.[3] Vsainnyang seq thoq lyis joeui bos oen vmoengs.

¹⁷Dvyuk yuk nvng lyis ma gis khyvlyis kuot lyis, nvng nyang lyis ma gis khyvlyis vtauh dyei. Yuk khanghmuh gis ge nghamh yvlyis tungh kuot aq.

¹⁸Namoq gas dvnganh yvmas nah shot pheh yah gis bweh lyis dius yuk khanghmuh yah nyenstap khyvlyis nyeis geh.

¹⁹Jyetdap bang eh, khanhamp eq lvto vphuk; Mangso dah nhaiqlom dyis yvlyis xwiq toh geh: Khasoeh ge lyis lhaihtoh dang mas taiq zis gas, Lvto phuk das zis gas ngah muh nghuot, ngos tauh dyei das, ge Yhensain taiq.

²⁰Lvto phuk das gungsthaiq lhaihtoh dang mas taiq zis yah dvyhangteh, nah jeswus yuot lyis tsoh aq: shet lyis jeis gvmshuk aq; heisoeh kuot gvng mas nvng nyang lyis xoqphuh nyoqnho ngeh nhang das.[4]

²¹Ma gis zis yah nvng lyis ma ung bas jungh, gis zis yah ma gis yvlyis dv ung bas jungh.