Read Achang ROMA 15 Bible Online

ROMA 15 - Achang bible

ROMA 15

¹Yang lomsjingh cho mha yombos bang gas vsainnyang pyo cho ma gis chank, lomsjingh cho yomnhuk bang wons chah dah yvwons lyis bos gis pangh.

²Yang dvnganh gas yah vmang vnoeuh jens dah nyeisgis yaplhoq das cho nghamh las lomsjingh cho mha jebais los das xiklyis nyamoq lyis lhoq pyo dyei goh.

³Housoeh lhaihtoh dang mas, Nvng lyis jwangh nyhap dang gas ngos lyis zangh los, ge zis yah dvyhangteh, Khristu eq nyah gungs lyis nyang gaus nhang zis ma nghuot.

⁴Lhaihtoh dang dvnganh gas yang lyis jyauh das xiklyis nghuot. Housoeh yang gas lhaihtoh dang masyah yoh dah jhen cho yahge yombos nhang cho gvng mas nghamhloms cho bos das xiklyis nghuot.

⁵Yang dvnganh gas Khristu Yesu dah yikhyoh lyis chank las namoq nyang changh ehnyet dvdain dvlom yoh nghuot bas jungh, jhen cho yahge yomdyei cho dyei nyeis dah Mangso ka namoq lyis shwih bas jungh.

⁶Housoeh lyis namoq dvnganhmoq dvgeh dvthwe kyingh yah, yah Yhensain Yesu Khristu dah Uwus nghuot dah Mangso lhyi yoh chungh das.

⁷Housoeh las Mangso dah nyoqnho ngelang xiklyis Khristu gas namoq lyis lhom yoeus goeus zis yah dvyhangteh, namoq nyang changh nyang lhom yoeus goh geh.

⁸Khasoeh ge lyis ngos taiq zis gas, Mangso ka dang jings soeu nghuot cho Chixoeuq das xiklyis phauh thyeih moq lyis dyei toh dah dangthoengh tyink das zis Khristu gas vthyoh tyomh bang Yuda jens dah gis cho nyhenshang jweh los, oen.

⁹Gohnyau bang yangh Mangso dah nhaiqnyen cho lhyi yoh chungh bas jungh ge eq jweh los. Lhaihtoh dang mas taiq zis yah dvyhangteh nghuot. Houka, Gohnyau bang mas ngos nvng lyis chungh das, Ngos nvng lyis chunghthwe kat das, ge.

¹⁰Tsai, lhaihtoh dang mas, Gohnyau bang eh, Mangso dah dius jens yah dvgeh gauslaus geh.

¹¹Tsai, Gohnyau bang dvnganh eh, Yhensain lhyi chungh geh; Dius jens dvnganh eh, nyang lyis chungh geh.

¹²Tsai Esaia gas, Yese dah vnyet dvkoq thuq los das, Nyang gas Gohnyau bang lyis guon das; Nyamoq gas nyang lyis nghamhloms das, ge.

¹³Gvshih Gyingshang Dyos dah yomsoq yah namoq dah nghamhloms cho tsoq je los bas jungh, Nghamhloms vpom nghuot dah Mangso ka, namoq dah lomsjingh cho mha gauslaus zis yahge nyenstap zis tyink dyei bas jungh.

¹⁴Ngah boekyis eh, namoq gas gis cho yah dyingh las seq cho dvnganh dyingh zis yah, namoq nyang changh yoh jyauh goh nyeis yvlyis ngos wontang loms toh.

¹⁵Nghuot laus eq haih maussauh mas ngos namoq lyis taiq kyingh kat dah cho dvkhamh womh womh lhaih kat. Ngos housoeh womh womh lhaih zis gas,

¹⁶Mangso ngos lyis Khristu Yesu dah jyeidwis duot zis yah gohnyau bang xiklyis muh wons soeu duot das toeuh dyei yvmvyah nghuot. Gohnyau bang gas Mangso lhom yoeus mon dah phudyei duot las Gyingshang Dyos yah Mangso lhyi kyauh zis xauh bang bweh bas jungh, ngos gas phudyei soeu khyvlyis Mangso dah Gausyis dang lyis taiq kyoh.

¹⁷Housoeh las Khristu Yesu mas dvdain dvlom bweh zis yah ngos wons wuq dah Mangso muh mas yoh khwank gaus nyeis.

¹⁸Ngos womh womh taiq das zis gas Gohnyau bang Mangso dah domsyos gyo bas jungh Khristu gas ngos lyis yhung lha shwih uhshe nhang cho dvnghuot. Nyang haih yvlyis dang yah eq, muhzoh yah eq kuot.

¹⁹Yomsoq muh yahge mauh loqmuh, Mangso dah Dyos yomsoq yah eq kuot. Housoeh ngos gas Yerusalem masyah Ilirikum wuxom ngap shoq chwang lha Khristu dah cho gausyis dang lyis taiq kyoh.

²⁰Nghuot laus eq dvyuk yuk tsuk toh dah vpom thoq mas ma tsank bas jungh, ngos vjangh nghamh tsuk zains toh zis gas, Khristu nyings ma xauhgyo ku shih joqyos mas, ngos hau gausyis dang taiq hoeuh das cho nghuot.

²¹Lhaihtoh dang mas lhaih toh zis yah dvyhangteh nghuot: Houka: Nyah cho khanhamp eq ma xauhgyo ku bang nyvng das, Hauh zis ma xauhgyo ku bang seqgyo los das, ge.

²²Housoeh las ngos namoq jyank mas jweh das cho tomp toh zis nyoshoq lhain xauh.

²³Gvshih gas haih wuxom jens mas ngos kuot chah dah muh dye wons wuq goeus. Ngos namoq jyank mas los xauhgoh das xiklyis nyoshoq zvn lyis yah nghamh toh goeus.

²⁴Gvshih namoq jyank mas yoh los das oen nghamhloms. Ngos Spain mau pheh loh uhlyis namoq yah los xauhgoh mes. Namoq yah dvyoq zomh nyeis thang lhyi, hauh mau mas namoq ngos lyis pangh kat bas jungh oen nghamhloms nyeis.

²⁵Gvshih gas, Mangso dah dius jens lyis pangh thuk muh wons wuq das xiklyis Yerusalem pheh loh nyeis.

²⁶Khasoeh ge lyis Makedoni yahge Akhaia mau mas dah phung jens gas, Yerusalem mas nyeis, shohjyen dah Mangso dius jens lyis pangh das xiklyis gausyis zis yah vlu tsainh das zis nghamh thyet toh.

²⁷nyamoq thyet cho ka dius yah kywih las ma nghuot, nghuot laus eq jyoengh ge lyis hauh bang lyis pangh thuk das nyhenshang nyamoq mas yvwons s bos. Khasoeh ge lyis, Yuda jens dah dyos vso vlho gohnyau bang lyis gvm lyis gas, gohnyau bang gas nyeisjvng zisyos yah nyamoq lyis pangh das zis gis.

²⁸Housoeh yvmvyah haih muh dye kuot las, hauh bang xiklyis yung dah ngwis dye kyauh goeus ya, ngos Spain pheh loh uhjyangh namoq jyank mas wvng xauhgoh khoq das.

²⁹Namoq jyank mas jweh lyis Khristu dah shvmanh jyehjuh dyingh zis yah jweh das yvlyis ngos seq.

³⁰Housoeh yvmvyah boekyis eh, Yhensain Yesu Khristu gvng mas eq, Dyos yah dyei dah jyetdap gvng mas eq namoq ngah xiklyis ngos yah dvgeh malyen lo lomsjingh ehnyet zainsmuh yah shvmanh dung yvmas yomkat das xiklyis yomdyei kat.

³¹Houka Yuda mau mas dah ma lomsjingh bang masyah jeslhuiq das zis yahge Yerusalem mas ngos phuqsoe dah muhzoh lyis houmha nyeis dah Mangso dius jens yoh lhom yoeus dyei das xiklyis shvmanh bos dung geh.

³²Housoeh Mangso dah ehnyet nghuot lyis gas ngos namoq lyis gausyis zis yah yoh xauhgoh las, namoq yah dvgeh pyo pyo yom doms yoh huiq das.

³³Nyenstap vpom Mangso ka, namoq dvnganhmoq yah dvgeh nghuot bas jungh. Amen.