Read Achang ROMA 2 Bible Online

ROMA 2 - Achang bible

ROMA 2

¹Housoeh yvmvyah gohyuk lyis soetuon soeu eh, nvng gas jyamp das cho ma bos lo: khasoeh ge lyis nvng soetuon dah muh lyis nvnyang kuot nyeis yvmvyah, gohyuk lyis soetuon yah dvyih nah gungs lyis nvnyang dang thang thyet goeus.

²Housoeh kuot bang dah thoq mas Mangso dah soetuon cho ka jus yvlyis yang seq.

³Housoeh kuot bang lyis soetuon nyeis las vsainnyang gas chank kuot soeu eh, nvng Mangso dah soetuon yvmvyah yoh luiq das oen nghamh lah?

⁴Mangso dah jyehjuh gas nhaiqlom yoh thaiq shoq nvng lyis shwih uhshe los goeus yvlyis ma soh seq las, nyah magons magoh dah jyehjuh eq kuhxing ehnyet yah nvng lyis jhen nyeis yvlyis nvng chaxwe ma nhang lhyeh?

⁵Nvng nothoeu zis yahge ma yoh thaiq dah ehnyet gvng mas hau Mangso dah nhaiqlom dyis ge, dan dah soetuon das buisnyeis lyis nvng kham das zis yobos yom nyhuk toh.

⁶Mangso ka dvyuk yah dvyuk lyis vsainnyang dah muhzoh yah dvyhangteh phauh shangh das.

⁷Gis dah muh kuot las jhen zis yah phunk, nyoqnho ngelang ma dyoq ma dyuk zis xo soeu lhyi ka vcaiq vto kang dyei das.

⁸Nghuot laus eq vsainnyang vkyuh kyingh xo bang yahge dyoqgoh nyensgoh las, jyoeng cho lhyi domsyos ma gyo, lhung zis kuot bang xiklyis nhaiqlom tsoeu zis yahge nhaiqlom dyis zis xauh das.

⁹Ma gis muh khanh bang dvnganhmoq thoq mas yaukyenh zis yahge shanghsenh zis xauh das. Houka cangxeih lyis Yuda jens, hauh thang lhyi gohnyau bang xauh das.

¹⁰Gis dah muh kuot soeu khanghmuh mas phunk, nyoqnho ngelang yahge nyenstap zis joq das. Cangxeih lyis Yuda dius mas shih, hauh thang lhyi gohnyau bang mas eq joq das.

¹¹Khasoeh ge lyis Mangso ka dius dah nyoqnho khyen zis ma nghuot.

¹²Lyi ma yoh las yaunos kuot bang hank laus eq, Lyi ma bos khyvlyis dyoqbis das. Lyi khau mha yaunos kuot bang gas Lyi khyvlyis soetuon zis xauh das.

¹³Lyi xauhgyo ku zis yah kyingh Mangso xikkhonh mas dan zis ma nghuot; Lyi lyis chank kuot bang lyis gas dan bang ge das.

¹⁴Gohnyau bang gas Lyi ma yoh, nghuot laus eq Lyi yah taiq toh cho lhyi nyang pheh nyang chank kuot nyeis lyis, nyamoq Lyi ma yoh laus eq hau taiq toh cho ka nyamoq xiklyis Lyi bweh los goeus.

¹⁵Nyamoq dah wotwu gas nyamoq dah ehnyet mas Lyi dah taiq toh cho lhaih toh goeus yvlyis chixoeuq nyeis zis yahge nyamoq dah seq nghamh ehnyet eq hauh yvlyis kanghjyoeng kat dyei nyeis las, nyamoq dah seq ehnyet gas nyamoq lyis yobos huon das, nghuot ya yobos khyuot dyei das.

¹⁶Housoeh ngos taiq kyoh dah Gausyis Dang yah dvyhangteh, Mangso ka Yesu Khristu loq yah dius dah nghop toh cho lhyi soetuon das buisnyeis lyis houyah dvyhangteh nghuot das.

¹⁷Yoeuh aq, nvng gas Yuda dius nyings dap soeu nghuot las, hauh Lyi mas nges zis yah Mangso yah sen lha moengs nyeis.

¹⁸Nyah ehnyet o zis seq las Lyi yah jyauh yvmvyah gis thank yvlyis dang thang seq thyet las,

¹⁹Nvng gas nyoqjet bang dah choshe soeu yahge, chuot yvmas bang xiklyis bvng zis,

²⁰koh bang dah shet dyei soeu, lonoeuh jens dah svra, lyi mas jyoeng dah seq cho bos soeu nghuot, ge ehnyet tap nyeis.

²¹Gohyuk lyis jyauh soeu nvng gas nah gungs lyis ma jyauh das lhyeh? Ma gis khauh ge taiq kyoh lho lha nvnyang gas khauh lhyeh?

²²Nyi vshuot ge las nvng gas nyi shuot nyeis lhyeh? Silho lhyi choqh ge las nvng silho yhen lhyi thyoq yoeus nyeis lhyeh?

²³Nvng lyi mas khwank nyeis las lyi lhyweq zis yah Mangso lhyi ma phauh ma nyang kuot lhyeh?

²⁴Khasoeh ge lyis namoq gvng mas Mangso dah nyings gas gohnyau bang mas loeusmus soqzo zis xauh nyeis, ge lhaih toh.

²⁵Lyi lyis chank lyis gas, vthyoh tyomh zis vkyuh bos. Nghuot laus eq Lyi lhyweq soeu nvng nghuot joq lyis, nah vthyoh tyomh cho ka ma tyomh zis doms bweh joq goeus.

²⁶Housoeh yvmvyah vthyoh tyomh soeu ma nghuot laus eq Lyi taiq toh cho lhyi chank nghuot lyis gas, Mangso yah nyang lyis vthyoh tyomh soeu ge suon dyei das ma nghuot lah?

²⁷Gungs vthyoh ma tyomh laus eq Lyi chank lyis gas, lhaih toh Lyi khyvlyis chank las vthyoh tyomh toh dah nvng, Lyi lhyweq soeu lhyi soetuon das ma nghuot lhyeh?

²⁸Khasoeh ge lyis thoqlos baus lyis Yuda nghuot soeu ka Yuda gyingh ma nghuot. Gungsshoh dah vthyoh tyomh zis eq vthyoh tyomh gyingh ma nghuot.

²⁹Nghuot laus eq nhaiqlom mas Yuda nghuot soeu ka Yuda dius gyingh nghuot. Vthyoh tyomh cho jyoeng ka ehnyet yah sen cho nghuot. Houka gungs shoh yah ma nghuot, dyos yah sen zis dvnghuot. Housoeh teh bang gas gohyuk yah chungh zis ma nghuot mulas, Mangso yah chungh yvlyis xauh kham yoeus.