Read Achang ROMA 3 Bible Online

ROMA 3 - Achang bible

ROMA 3

¹Housoeh lyis gas, Yuda jens gas gohnyau bang thoq lyis cha zes lah? Vthyoh tyomh zis eq chah vkyuh bos lah?

²Cho khat khanghmuh mas vkyuh svsoh bos. Cangxeih lyis Mangso ka hauh Lyi Yuda jens dah loq mas kyauh toh yvmvyah nghuot.

³Nyamoq mas dvyhamh ma lomsjingh lyis gas khasoeh gah? Nyamoq dah ma lomsjingh zis gas Mangso dah wontang cho lhyi vnyet vxuh bweh nhang lhyeh?

⁴Housoeh ma nghuot: dius dvnganh gas hwah bang bweh los laus eq Mangso jyoeng zis gas dede nghuot cho kyink toh. Khasoeh ge lyis, Jyomp maussauh mas lhaih toh zis yah dvyhangteh, Nvng taiq dang gas dede jus joq zis yahge Nvng soetuon zis xauh lyis ung los bas jungh, ge.

⁵Gvshih, yah ma dan cho ka, Mangso dah dan yvlyis bvng bvng zes nyvng nhang nghuot lyis gas, yang khasoeh taiq das lah? Mangso yang lyis nhaiqlom dyis dah joeng cho dyei lyis gas Nyang lyi ma chi khyvlyis kuot zis nghuot lhyeh? (Ngos heisoeh taiq zis gas dius dah nghamh cho khyvlyis chank las dvtaiq.)

⁶Housoeh ma nghuot, Mangso lyi ma chi nghuot lyis gas mungkvn gonh lyis soe khasoeh yoh tuon das lah?

⁷Tsai, ngos cu zis gas Mangso dah jyoeng cho lhyi bvng bvng zes bweh nhang khyvlyis yah nyah nyoqnho ngelang lyis zes chixoeuq dyei lyis gas, ngos yaunos yoh soeu dvyuk teh chamus dang thang thyet zis xauh nyeis shih lah?

⁸Housoeh dvnghuot lyis gas, Gis cho bweh thuq los bas jungh, ma gis muh tsain kuot goh oen chamus ma taiq das lah? Jyoengh dius dvyhamh gas housoeh, ngamoq lyis loeusmus soqzo zis yah yobos huon nyeis. Nyamoq mon yih dah dang thang thyet zis xauh das.

⁹Housoeh lyis khasoeh gah? Ngamoq dah chojeis gas gohyhamh thoq lyis zes gis lhyeh? Ma nghuot, khasoeh ge lyis ngos Chixoeuq goeus zis yah dvyhangteh Yuda jens yahge gohnyau bang dvnganhmoq gas yaunos dah yomsoq o mha nghuot joq.

¹⁰Lhaih toh zis yah dvyhangteh: Dan soeu ma bos, dvyuk eq ma bos;

¹¹Seqgyo soeu hank ma bos, Mangso lhyi xo soeu eq ma bos;

¹²Dvnganhmoq chowhang whang loh goeus, Nyamoq yhung pvjus bang bweh tyamp, nhaiqbos cho chixoeuq zis hank ma bos, dvyuk yangh ma bos.

¹³Nyamoq dah khyunghkang ka bangh joq dah lop tsain nghuot; Nyamoq lhyo eq mhuih dang taiq. Nyamoq nhuotkuk khau mha ywimuhtsanh dah duk bos.

¹⁴Nyamoq nhuot mas xungh xent dah nhoengh dang yah dyingh joq.

¹⁵Nyamoq dah khyei ka suih huot das zis nyap.

¹⁶Nyamoq dah cho mha dyoqbis zis yahge shanghsenh cho yah dyingh joq.

¹⁷Nyamoq nyenstap cho lhyi ma seq:

¹⁸Nyamoq mas Mangso lhyi gyukwoms cho ma bos, ge.

¹⁹Lyi mas lhaih toh zis dvnganh zis gas, Lyi khau mha kang dwis bang chank das xiklyis lhaih toh yvlyis yang seq. Hau lhaih toh dah Lyi gas hank lyis eq ma seq oen jyamp taiq das cho ma dyei toh zis yahge mungkvn dius dvnganh gas Mangso dah soetuon zis xauh das cho chixoeuq toh.

²⁰Housoeh las Lyi taiq toh cho lhyi tyink khyvlyis yah hank eq Mangso xikkhonh mas yoh dan zis ma nghuot. Khasoeh ge lyis Lyi gas yang yaunos yoh bang nghuot ge zis lyis kyingh dvyoh chixoeuq.

²¹Nghuot laus eq gvshih gas Lyi yahge lvpe jens kanghjyoeng kat toh laus eq Lyi yah ma sen khyvlyis yah Mangso dah dan cho lhyi chixoeuq goeus.

²²Hauh zis gas Yesu Khristu lyis lomsjingh gvng mas, lomsjingh bang dvnganh lyis dyei, Mangso dah dan cho nghuot. Khasoeh ge lyis houmha khwih khyamh cho ma bos.

²³Khasoeh ge lyis dius dvnganh gas yaunos kuot las, Mangso dah phunk lyis kat khyoq tyamp.

²⁴Nghuot laus eq gvshih gas Yesu Khristu khyuot yoeus gvng mas phauh ma dyei noh, Mangso dah jyehjuh yah dan cho xauh yoeus.

²⁵Mangso ka, Yesu Khristu lyis yah jyank mas nhang lha yah xiklyis lomhxangh kuot goeus. Housoeh nyah suih gvng mas nyang lyis lomsjingh bang gas nyamoq dah yaunos khyuot dyei zis tsain xauh. Mangso heisoeh kuot zis gas nyang nyang dan soeu nghuot ge yvlyis chixoeuq das nyhenshang nghuot.

²⁶Lai loh goeus shishenh lyis nyang dius dah yaunos lyis yoeuh lhaiq tyamp goeus. Nghuot laus eq gvshih nyang gas nyamoq dah yaunos lyis soetuon khyvlyis nyah dan cho lhyi chixoeuq nyeis. Heisoeh Mangso ka nyah gungs dan cho lhyi chixoeuq zis yah Yesu lyis lomsjingh bang dvnganh lyis dan cho xauh yoeus nhang.

²⁷Housoeh lyis khwank das cho cha bos? Cha ma bos, Chamus? Yang Lyi chank las lah? Ma nghuot, lomsjingh gvng mas dvnghuot.

²⁸Khasoeh ge lyis yang seqgyo zis gas, dius dvyuk Lyi yah taiq toh muh lyis chank kuot khyvlyis ma nghuot, lomsjingh gvng mas dan cho xauh yoeus ge zis nghuot.

²⁹Mangso ka Yuda jens dah Mangso kyingh nghuot lhyeh? Gohnyau bang dah Mangso eq nyang nghuot, ma nghuot lhyeh? Nghuot, gohnyau bang dah Mangso eq nghuot.

³⁰Mangso ka dvso kyingh dvnghuot yvmvyah, vthyoh tyomh kham bang lyis lomsjingh gvng mas dan nhang, Tsai vthyoh tyomh ma kham bang lyis eq hau lomsjingh cho yah kyingh dan nhang das.

³¹Housoeh lyis gas, lomsjingh gvng mas hauh Lyi lyis tyamp goeus lhyeh? Housoeh ma nghuot, tyamp das gungsthaiq yang hauh Lyi lyis tsain chank tyink.