Read Achang ROMA 5 Bible Online

ROMA 5 - Achang bible

ROMA 5

¹Lomsjingh gvng mas tsain dan los yvmvyah, yah Yhensain Yesu Khristu gvng mas yang Mangso yah yoh nyenstap goeus.

²Yesu gas yang lyis lomsjingh khyvpheh yah gvshih kham zo nyeis Mangso dah jyehjuh shot pheh shwih wvng loh goeus. Housoeh yang gas Mangso dah phunk mas xauh wvng das zis nghamhloms zainsmuh bos las khwank gaus nyeis.

³Hauh thoq lyis yang gas yaukyenh shanghsenh xauh dah cho mha laus eq yang khwank gaus nyeis. Khasoeh ge lyis yaukyenh zis gas jhen zis lyis bweh los nhang yvlyis yang seq.

⁴Jhen zis gas kyink zis, kyink zis gas nghamhloms zis lyis bweh nhang.

⁵Hau nghamhloms zis gas yang lyis ehnyet yom ma gyau nhang. Khasoeh ge lyis yang lyis dyei toh dah Gyingshang Dyos khyvlyis yah Mangso dah jyetdap ehnyet gas, yah nhaiqlom khau mha huot kat dyei goeus.

⁶Yang gas yomnhuk joq shih lyis toeuq toh shishenh lyis, Khristu gas yaunos yoh bang xiklyis shei kham goeus.

⁷Jyoengh, dan soeu xiklyis shei kham das dius hank ma bos mvbeh; dius gis dvyuk yuk xiklyis gas womh shei kham das zis dvyuk yuk bos mvbeh.

⁸Nghuot laus eq yang yaunos dap bang nghuot joq shih lyis, Khristu gas yah nyhenshang shei kham yvmvyah, Mangso ka nyah jyetdap cho lhyi, yah jyank mas dede Chixoeuq goeus.

⁹Housoeh nyah suih gvng mas gvshih yang dan cho yoh goeus las, nyah gvng mas Mangso dah nhaiqlom dyis masyah yang khyuot yoeus zis zes xauh.

¹⁰Khasoeh ge lyis yang gas nyang lyis jes kuot bang dvtsain nghuot joq shih lyis, nyah Lo shei kham zis yah, yang lyis Mangso yah mehoq tamp zis xauh goeus bang yang gas nyah dah dwis nyeis kang yah zes las khyuot yoeus zis xauh das.

¹¹Tsai, hauh thoq lyis yang lyis Mangso yah mehoq tamp das xiklyis nyang gas yah Yhensain Yesu Khristu lyis nhang kat yvmvyah yang gauslaus nyeis.

¹²Housoeh las dius dvyuk gvng mas yaunos gas mungkvn mas wvng los las yaunos gvng mas shei cho jweh los zis yah dvyhangteh, dius dvnganh yaunos kuot yvmvyah dvnganh gas shei chah.

¹³Khasoeh ge lyis, hauh lyi ma dyei shih lyis yaunos gas mungkvn mas joq goeus; nghuot laus eq lyi ma joq shih gyo lyis yaunos comh toh ge zis ma bos.

¹⁴Nghuot laus eq Adam masyah Moshe jweh shoq shei zis guon nyeis las, Adam dah shuot cho teh ma shuot bang thoq mas eq guon nyeis. Adam gas jweh los das soeu dah vzwvng nghuot.

¹⁵Nghuot laus eq hau aiq yuk gas dvyhangteh ma nghuot. Khasoeh ge lyis Mangso dah jyehjuh jyungshuk gas Adam dah yaunos teh ma nghuot. Dius dvyuk dah yaunos gvng mas dius nyoshoq shei zis xauh ge zis gas jus. Nghuot laus eq Mangso dah jyehjuh gas hauh thoq lyis zes kuh joq. Houyah dvyhangteh Yesu Khristu ge dah dius dvyuk dah jyehjuh gvng mas dius nyoshoq lyis dyei dah nyah jyehjuh jyungshuk gas zes kuh joq.

¹⁶Mangso dah jyehjuh jyungshuk yah dius dvyuk dah yaunos cho ka shaih goh. Adam gas yaunos dvkoeuq kuot uhlyis yobos yoh ge dah dang thang thyet cho chank los. Nyah thang lhyi yaunos nyoshoq kuot uhlyis ma mon ma yih laus eq yobos ma bos ge dah jyehjuh jyungshuk chank los.

¹⁷Khasoeh ge lyis dius dvyuk dah shuot cho gvng mas shei zis yah guon cho bweh thuq los zis gas jyoeng. Nghuot laus eq Yesu Khristu ge dius dvyuk kuot dah muh gvng mas bweh thuq los dah vkyuh gas kha iq zes kuh joq! Mangso dyei dah magons magoh jyehjuh jyungshuk lyis xauh yoeus las nyah jyehjuh yah dan ge suon dyei zis xauh bang dvnganh gas Yesu Khristu ge dius dvyuk dah gvng mas kang dwis zis yah xauh guon nyeis das.

¹⁸Housoeh las dius dvyuk shuot dah yaunos gvng mas dius dvnganh dang thang thyet zis xauh zis yah dvyhangteh, dius dvyuk dan dah muhzoh gvng mas dius dvnganh gas dan cho xauh las kang tsain dwis nyeis das.

¹⁹Khasoeh ge lyis dius dvyuk domsyos ma gyo gvng mas nyoshoq lyis yaunos wons bang bweh nhang zis yah dvyhangteh, gohtoeu dius dvyuk domsyos gyo gvng mas nyoshoq gas dan bang bweh los das.

²⁰Lyi jweh los yvmvyah shuot cho nyo los. Nghuot laus eq yaunos zes nyo los zes Mangso dah jyehjuh gas magons magoh zes dyingh shon los.

²¹Housoeh yaunos gas shei cho khyvpheh yah guon nyeis zis yah dvyhangteh Mangso dah jyehjuh gas dan khyvlyis yah guon nyeis las, yah Yhensain Yesu dah jyehjuh yah yang lyis vcaiq vto kang dwis yvpheh shwih loh nyeis.