Read Achang ROMA 6 Bible Online

ROMA 6 - Achang bible

ROMA 6

¹Housoeh lyis gas yang khasoeh taiq das lah? Jyehjuh je los bas jungh oen yang yaunos mas kang tsoq dwis nyeis das lah?

²Ma nghuot, yang yaunos masyah shei gang goeus lyis gas houmha khasoeh kang tsoq dwis nyeis das lah?

³Yesu Khristu mas jeisnyhop kham bang yang dvnganh gas nyang shei kham yvmas jeisnyhop tsain kham nyeis yvlyis namoq ma seq goh lhyeh?

⁴Housoeh yvmvyah Khristu gas Uwus dah phunk yah, shei masyah dwis toq los nhang zis xauh zis yah dvyhangteh, yang eq kang saiq mas yoh suh shoq, hau jeisnyhop kham yvmas shei yvlyis yang kham yoeus las, nyang yah dvgeh nyhop zis tsain xauh goeus.

⁵Yang gas nyang shei kham yvmas dvgeh bos shei kham lhyi ka, nyang dwis toq los yvmas eq dvgeh dwis toq los das.

⁶Yang gas yaunos dah jyeidwis ma tsoq bweh bas jungh, yaunos gungsshoh lyis mhont das xiklyis, yah dius cauh lyis nyang yah dvgeh taplhangh kham yvlyis yang seq.

⁷Khasoeh ge lyis shei goeus soeu ka yaunos masyah lhuiq zis xauh goeus.

⁸Yang Khristu yah dvgeh shei lhyi ka, yang nyang yah dvgeh dwis nyeis das oen lomsjingh nyeis.

⁹Khasoeh ge lyis Khristu gas dwis toq nhang zis xauh goeus yvmvyah ma doms shei lo zis lyis yang seq. Shei zis eq nyang lyis ma yoh guon lo.

¹⁰Khristu shei zis gas yaunos xiklyis dvlhain kyingh shei lha, nyang kang dwis zis gas Mangso xiklyis dwis nyeis.

¹¹Houyah dvyhangteh namoq eq yaunos yah shei gang loh bang nghuot las, yah Khristu Yesu gvng mas Mangso mha dwis nyeis bang nghuot oen nghamh yoeus chah.

¹²Namoq obos ehnyet dah jyeidwis jens ma duot loh bas jungh, yaunos lyis namoq dah seq shei gungs mas vguon nhang goh.

¹³Namoq dah gungsdoeus lyis ma gis ma shop muh kuot das xiklyis yaunos dah muh mas vkyauh tyamp goh. Hauh gungsthaiq shei mhayah dwis toq nhang zis xauh bang teh namoq gungs Mangso lhyi kyauh las, namoq gungsdoeus lyis dan dah muh kuot das nyhenshang Mangso lhyi kyauh toh geh.

¹⁴Khasoeh ge lyis namoq gas lyi khau mha ma nghuot, jyehjuh khau mha kang dwis nyeis yvmvyah yaunos dah yomsoq gas namoq thoq mas ma yoh zau lo.

¹⁵Housoeh lyis gas khasoeh gah? Yang gas lyi khau mha ma nghuot, jyehjuh khau mha dvtsain nghuot yvmvyah, yaunos kuot das lah? Housoeh ma nghuot.

¹⁶Namoq dvyuk dah domsyos gyo lyis namoq gas hauh soeu dah jyeidwis nghuot yvlyis namoq ma seq lhyeh? Yaunos dah jons duot lyis gas shei das. Mangso lhyi domsyos gyo dah jons duot lyis gas dan yvlyis xauh kham yoeus das.

¹⁷Namoq xikpheh yaunos dah jons duot ku laus eq, namoq xauh yoeus dah jyauh cho, jyoeng yvvlyis ehnyet nhaiqlom dvnganh yah domsyos gyo goeus las Mangso lhyi nhaiqshoqlang.

¹⁸Namoq gas yaunos masyah lhuiq kat zis xauh las dan cho dah jons jens duot los goeus.

¹⁹(Namoq gungsshoh nhuk joq yvmvyah dius dah nghamh cho lhyi chank las ngos dvtaiq). Dvlhain ka ma gis dah muh kuot das xiklyis ma lhoq ma shang zis yahge ma shop dah jons jens bweh nhang. Houyah dvyhangteh gvshih gas namoq dah gungs dvnganh yah gyingshang dah muh kuot das xiklyis dan cho dah jons jens bweh los nhang chah goeus.

²⁰Namoq yaunos jons tsain duot nyeis shih uhlyis, namoq gas Mangso o cho, dan cho yah cha ma tsain sen.

²¹Gvshih doms yoeuh lyis xoqphoh cho xikpheh namoq kuot ku goeus muh masyah chah vkyuh xauh yoeus lah? Hauh muh dah uhkung phauh gas shei zis nghuot.

²²Gvshih gas yaunos masyah lhuiq zis xauh las, Mangso dah jyeidwis jens duot goeus. Hauh vkyuh gas namoq gyingshang bang bweh los las thang thank lyis vcaiq vto kang yoh.

²³Khasoeh ge lyis yaunos dah uhkung phauh gas shei zis nghuot; Mangso dah jyehjuh jyungshuk gas yah Yhensain Yesu Khristu mas vcaiq vto kang nghuot.