Read Achang ROMA 7 Bible Online

ROMA 7 - Achang bible

ROMA 7

¹Boekyis eh, ngos lyi seq bang lyis taiq bah, dius dwis nyeis gyo lyis lyi gas nyang lyis sain toh zis lyis namoq ma seq nyeis goh lhyeh?

²Housoeh yhensain phoq yoh dah vmesbih gas yhensain phoq dwis nyeis dvchank, lyi gvng mas nyang yah dvgeh twih toh: nghuot laus eq yhensain phoq shei goeus ya, yhensain phoq yah sen dah lyi masyah luiq goeus.

³Housoeh las yhensain phoq dwis nyeis shih lyis, yhensain phoq gohyuk xo loh lyis gas, nyang lyis lvng shuot soeu ge das: nghuot laus eq yhensain phoq shei goeus ya, nyang lyi masyah luiq goeus las, yhensain phoq gohyuk jyank mas loh laus eq nyang lvng shuot soeu bweh das zis ma nghuot.

⁴Houyah dvyhangteh boekyis eh, shei masyah dwis toq los soeu yah phoengh wvng las yah Mangso xiklyis vshih yoh shih bas jungh, namoq eq Khristu gungs mas Lyi yah shei gang loh.

⁵Khasoeh ge lyis yang gungsshoh nghuot shih lyis, Lyi yah nhauh toq kat, yah dah yaunos dap gungsshoh dah obos ehnyet gas shei muhzoh dah vshih shih bas jungh, yah gungsdoeus jens lyis muh khanh dyei nyeis.

⁶Nghuot laus eq gvshih gas yang lyis twih toh dah Lyi masyah shei luiq goeus las, yang gas lhaih toh Lyi cauh dah phuqsoe bang ma nghuot lo, gyingshang Dyos dah kang vsaiq mas dvphuqsoe nyeis.

⁷Housoeh lyis gas yang khasoeh oen taiq das lah? Lyi gas yaunos nghuot joq lhyeh? Housoeh ma nghuot: Lyi yah ma nghuot lyis gas, yaunos lyis ngos ma seq: Khasoeh ge lyis nyoq vnoq, ge Lyi ma taiq ya, ngos nyoqnoq obos cho lhyi jyoengh ma seq.

⁸Nghuot laus eq yaunos gas tyingtoh dang lyis jyamp las obos cho vja ja lyis ngos masyah kuot thuq kat. Khasoeh ge lyis lyi ma joq lyis gas yaunos gas shei joq.

⁹Khasoeh ge lyis xikpheh ngos gas lyi dah nghe pheh nyeis khoq: nghuot laus eq hauh lyi dah twih toh cho ngah jyank mas jweh yah dvyih, yaunos gas ngos mas kuh los las ngos gas shei loh.

¹⁰Housoeh kang dyei das ge dah dangthoengh yah jweh los dah lyi nyang ngos mas shei cho bweh nhang.

¹¹Khasoeh ge lyis yaunos gas hau tyingtoh dang lyis yhung lha ngos lyis mhuih zis yah sat.

¹²Housoeh las Lyi gas gyingshang, hau tyingtoh dang eq gyingshang, dan las gis joq.

¹³Housoeh lyis gas, gis ja gas ngah xiklyis shei cho bweh los lhyeh? Housoeh ma nghuot: yaunos gas gis zis lyis yhung lha ngos lyis shei nhang. Houka yaunos dah wotwu lyis chixoeuq das xiklyis nghuot. Housoeh las tyingtoh dang gas yaunos gas cha yah ma yoh byi shoq kuh cho lhyi chixoeuq nyeis.

¹⁴Khasoeh ge lyis Lyi gas Dyos yah sen yvlyis yang seq; nghuot laus eq ngos gas gungsshoh ehnyet bos las yaunos dah jons duot das xiklyis ungh zis xauh.

¹⁵Ngos khanh yoszoh lyis ngos ma seqgyo; nghuot laus eq ngos kuot mes cho lhyi ma kuot kuot, ngos hoeng dah muh lyis kyingh ngos dvkuot nyeis.

¹⁶Ngos ma mes kuot zis lyis ngos kuot lyis gas, Lyi gas gis joq yvlyis, ngos xamxonh.

¹⁷Housoeh las, gvshih ngos nyang hauh zis lyis kuot nyeis zis ma nghuot, ngos mas bos dah yaunos dvkuot nyeis.

¹⁸Khasoeh ge lyis ngah ungkhau mha, nghuot goeus, ngah gungsshoh mas gis zis cha ma bos yvlyis ngos seq. Ngos mas kuot mes ehnyet bos joq laus eq gis khyvlyis kuot das zis ngos ma nyvng.

¹⁹Kuot mes dah gis cho lhyi ngos ma kuot, ma mes kuot, ma shop yvlyis ngos kuot nyeis.

²⁰Housoeh ngos ma mes kuot yvlyis ngos kuot nyeis lyis gas, ngos nyang hauh yvlyis ma kuot, ngos mas bos dah yaunos dvkuot nyeis.

²¹Housoeh ngos nyvng dah lyi dvkoeuq gas, ngos gis dah muh lyis kuot mes khanghmuh ma gis zis lyis kyingh ngos dvyoh kuot.

²²Khasoeh ge lyis ngah ungkhau mha ka, Mangso dah lyi lyis nhaiqdoeus nyeis.

²³Nghuot laus eq ngah gungsdoeus mas gohtoeu lyi dvkoeuq gas ngah ehnyet mas bos dah lyi yah zan goh nyeis zis ngos nyvng. Hauh lyi gas ngos lyis ngah gungsdoeus mas bos, yaunos lyi dah thung dius kuot.

²⁴Mvshohjyen soeu ngos eh, hai shei nhang dah gungs masyah ngos lyis hank khyuot yoeus das lah?

²⁵Yah Yhensain Yesu Khristu gvng mas ngos lyis khyuot kat Mangso dah jyehjuh lyis chungh. Housoeh las ngos gungs doeu nyang, Mangso lyi lyis phuqsoe nyeis; nghuot laus eq gungsshoh yah gas yaunos lyi lyis ngos phuqsoe nyeis.