Read Achang ROMA 9 Bible Online

ROMA 9 - Achang bible

ROMA 9

¹Ngos Khristu yah sen soeu nghuot las jyoeng dang taiq, ngos ma hwah. Gyingshang Dyos yah guon yvlyis lhom yoeus dah ngah sohseq ehnyet yah ngos ma hwah cho kanghjyoeng kat.

²Ngah suih ngah shoh, ngah vnyau jens dah nyhenshang ngah ehnyet mas nhaiqkuk zainsmuh yahge yaukyenh cho malyen lo xauh nyeis cho taiq lyis kha iq kuh joq lah!

³Khasoeh ge lyis, nyamoq xiklyis ngos Mangso dah nhoengh zis lyis eq, Khristu yah gang loh das zis lyis eq kham mes shoq nghuot.

⁴Israel jens gas Mangso lo jens nghuot. Nyamoq lyis nyah lo jens duot nhang lha, nyah phunk thuq xoeuq. Nyamoq yah thanghchvp toh, Lyi eq dyei. Nyamoq gas jyoeng dah paiq cho yahge Mangso dah dangthoengh lyis eq xauh yoeus.

⁵Nyamoq gas nyings hoeuh dah Hebre phauh thyeih moq masyah yaus lyih bang nghuot. Dius khyvlyis gas Khristu eq nyamoq vnyau yah sen. Dvnganh lyis guon dah Mangso lhyi vcaiq vto chungh goh. Amen.

⁶Mangso dah dangthoengh gas vnyet vkom bweh goeus oen zis ma nghuot. Khasoeh ge lyis Israel vnyau dvnganh yah Mangso dah dius gyingh ma tsain nghuot.

⁷Abraham dah vnyau vshih nghuot bang eq dvnganh gas Mangso dah lo jens nghuot lhyeh? Mangso Abraham lyis taiq zis gas, Ngos nvng lyis dangthoengh toh vgus Isak masyah nah vnyau vshih gyoh das, ge.

⁸Hauh vjyuk gas, gungsshoh pheh yah khoeu los dah lo jens gas Mangso dah lo jens ma tsain nghuot; Mangso dangthoengh toh zis yah dvyhangteh khoeu los dah lo jens gas Abraham dah vnyau vshih gyingh nghuot ge suon yoeus dyei.

⁹Khasoeh ge lyis dangthoengh mas, Heinyos ngos doms jweh lyis Sara gas yukgis lo yoh das, ge taiq toh.

¹⁰Haih zis kyingh ma nghuot, Rebeka dah lotang eq yah phauh thyeih Isak masyah los.

¹¹Nghuot laus eq lotang ma khoeu shih las, gis gang cha ma daq kuot shih lyis yah Mangso Rebeka lyis taiq zis gas, Nah lo kuh vyuk gas ngis vyuk jyank mas jons mus das, ge.

¹²Mangso housoeh taiq zis gas, nyang toeuq toh zis yah dvyhangteh lobes yuk lyis ma lui yoeus, khyen cho mha nyang gas dius ya kuot dah muh lyis vgungs toh las khyen zis ma nghuot, nyang o khyvlyis dvkhyen.

¹³Housoeh Jyomp maussauh mas, Ngos Yakop lyis jyetdap las, Esau lyis hoeng, ge lhaih toh.

¹⁴Housoeh lyis yang, Mangso ma dan oen taiq das lah? Housoeh ma nghuot.

¹⁵Khasoeh ge lyis, Ngos jyehjuh kuot mes soeu lhyi jyehjuh kuot das. Ngos nhaiqnyen mes soeu lhyi nhaiqnyen das, ge Moshe lhyi taiq toh.

¹⁶Housoeh las Mangso dah khyen cho ka dius dah omes cho, dius dah zwi khank cho mha ma nges. Mangso dah nhaiqnyen cho mha dvnges toh.

¹⁷Khasoeh ge lyis lhaihtoh dang mas Egutu hwankti Pharao lyis taiq zis gas, Nvng mas ngah yomsoq yoh chixoeuq las ngah nyings nyeisjvng gonh hoeuh loh bas jungh, oen ngos nvng lyis dvtoeu toh, ge.

¹⁸Housoeh las Mangso ka nyang nhaiqnyen mes soeu lyis nhaiqnyen las, nhaiqlom than nhang mes soeu lyis lhoq than dyei nyeis.

¹⁹Nghuot laus eq namoq dvyuk yuk ngos lyis, Housoeh lyis Mangso ka dius lyis yobos khasoeh yoh xo das lah? Nyang bauh dah cho lhyi hank yoh kyamp toh lah, ge ngos lyis taiq mes mvbeh.

²⁰Buisnoms phoq eh, nvng gas hank nghuot las Mangso lhyi housoeh yoh toeuh lah? Tsoh auh dvlom gas hauh yvlyis kuot toh goeus soeu lhyi, Nvng ngos lyis chamus heisoeh kuot lah, oen yoh taiq lhyeh?

²¹Auh shonh soeu ka tsohnyhon lhyi nyang o khyvlyis kuot das toeuh yoh las, tsoh dvjop zis lyis dvkhamh yah nyoqnho ngelang bos yvmas yhung das phauhdap auh, gohtoeu dvkhamh yah ma phauh dah auh yoh kuot ma nghuot lhyeh?

²²Housoeh Mangso eq housoeh kuot nyeis. Nyang gas nyah nhaiqlom dyis cho Chixoeuq zis yah nyah yomsoq lyis seq nhang nyeis. Nghuot laus eq nyah dah nhaiqlom dyis gvng mas monh las somh loh mon bang lyis ehnyet xing xing jhen nyeis.

²³Yhensain ka nyah nhaiqnyen cho kham yoeus das bang ge dah yang lyis nyah mathank magons Phunk lyis xauh nyvng nhang das nyhenshang o nyeis. Hauh bang gas Mangso dah phunk xauh yoeus das zis sont toh goeus bang nghuot.

²⁴Khasoeh ge lyis yang gas Mangso yah khi toh goeus bang nghuot las, Yuda jens mas kyingh ma nghuot, gohnyau bang mas zis eq nghuot.

²⁵Houyah dvyhangteh, Hosea maussauh mas eq Mangso heisoeh ge taiq: Ngah dius ma nghuot bang lyis ngos ngah dius oen das; Ngos ma jyet ku dah dius nyau lyis eq, Ngos jyet dah dius nyau nghuot, oen das.

²⁶Tsai, namoq ngah dius jens ma nghuot, ge nyamoq lyis taiq zis xauh joqyos mas nyang, dwis nyeis Mangso dah lo jens ge das, ge.

²⁷Esaia eq Israel vnyau dah cho kaiq las, Israel jens gas thomh mas sihsho nyhoq nyo laus eq, nyamoq mas dvtsiq kyingh khyuot yoeus zis dvxauh das.

²⁸Khasoeh ge lyis Mangso ka nyeisjvng thoq mas dius lyis soetuon cho lvnyap kuot tyink das.

²⁹Houyah dvyhangteh xik lyis yah Esaia taiq toh zis gas, Maukhung Jesphung YHENSAIN yang lyis vnyau vshih dvyhamh ma nyhet toh lyis gas, Yang Sodom teh bweh las Gomora yah doeusgoh das, ge.

³⁰Housoeh yvmvyah yang cha taiq chank bos lo lah? Dan yvlyis ma chank dah gohnyau bang gas lomsjingh gvng mas dan cho yoh.

³¹Israel vnyau gas, lyi chank las dan cho yoh das xiklyis yomkat, nghuot laus eq hauh lyi lyis ma yoh tsain chank tyink.

³²Chamus ma yoh ge lyis, nyamoq gas lomsjingh zis lyis ma nges, muhzoh mas vgungs toh khyvlyis kyingh dvtsain yomkat yvmvyah ma yoh tyink. Housoeh las thungh dwes das luklom mas tsain thungh lains.

³³Hauh zis gas lhaihtoh dang mas, Yoeuh aq, ngos Zion mha thungh lains das luklom yahge lainszo das lukmuh lom toh. Nghuot laus eq nyang lyis lomsjingh soeu hank laus eq yom ma gyau das, ge toh.