Read Achang 1 KORINTHU 1 Bible Online

1 KORINTHU 1 - Achang bible

1 KORINTHU 1

¹Yesu Khristu dah lvgyo kuot das xiklyis Mangso dah ehnyet yah khi toh dah ngos Paulo yahge boek Sotene gas,

²Korinthu wus mas joq, Mangso dah phung mha bos bang yahge khyiq khanghmuh mas ngamoq yahge nyamoq dah Yhensain Yesu Khristu lyis chomp paiq bang Khristu Yesu gvng mas Mangso dah gyingshang bang bweh das xiklyis lui yoeus zis xauh bang dvnganh jyank mas dang tying kat.

³Yah Uwus Mangso yahge Yhensain Yesu Khristu dah jyehjuh yahge nyenstap zis gas namoq lyis dyei bas jungh.

⁴Yesu Khristu gvng mas namoq lyis jyehjuh dyei toh yvmvyah, ngos namoq nyhenshang ngah Mangso lhyi vjangh nhaiqshoqlang sang.

⁵Namoq gas Khristu Yesu mas dvdain dvlom bweh nyeis yvmvyah taiq dang yahge seq cho dvnganh, ja khanghmuh gas nyah gvng mas dyinghjet joq goeus.

⁶Khristu dah Loeus gas namoq mas vnyet goeng goeng yoh chent joq goeus.

⁷Housoeh, yah Yhensain Yesu thuq los das yvlyis langh nyeis uhlyis namoq ma xauh lhom yoeus dah jyehjuh jyungshuk dvja eq ma bos lo.

⁸Yah Yhensain Yesu Khristu dah buisnyeis lyis yobos huon chank ma bos bas jungh, Nyang gas thang thank jweh shoq goeng joq nhang das.

⁹Nyah Lo, yah Yhensain Yesu Khristu yah yoh zomh shoq namoq lyis lui yoeus dah Mangso ka wontang.

¹⁰Ngah boekyis eh, namoq dvnganh gas taiq dang xamxonh goh nyeis das xiklyis ngos namoq lyis Yah Yhensain Yesu Khristu nyings yah yomdyei kat; housoeh lyis namoq mas gang lvn loh cho ma bos das. Namoq nghamh cho, toeuqkhom dvkoeuq mas xamxonh goh nyeis geh.

¹¹Khasoeh ge lyis, ngah boekyis eh, namoq mas dyoqgoh cho bos yvlyis Khloe yhenbang dvyhamh ngos lyis los taiq kyoh.

¹²Ngos heisoeh taiq bah, namoq dvyuk yah dvyuk shaih khyvlyis, Ngos gas Paulo thang chank, ngos gas Apolo thang chank, ngos gas Petru thang chank, ngos gas Khristu thang chank, ge tsain taiq goh nyeis.

¹³Khristu gas vphung phung khyoq zis xauh goeus nyvng lhyeh? Paulo ka namoq xiklyis taplhangh zis kham goeus lhyeh? Namoq Paulo nyings masyah jeisnyhop tsain kham goh lhyeh?

¹⁴Krispu yahge Gai-u mas lai las, ngos namoq hank lyis eq jeisnyhop ma dyei yvmvyah ngos Mangso lhyi nhaiqshoqlang sang.

¹⁵Housoeh yvmvyah namoq gas ngah nyings yah jeisnyhop kham goeus ge hank eq ma yoh tsain taiq.

¹⁶Jyoengh oen lhyi Stephana yahge nyah yhenbang lyis eq ngos jeisnyhop dyei goeus; hauh thoq lyis gohyuk hank lyis dyei shih lah zis ngos ma soh lo.

¹⁷Khasoeh ge lyis Khristu ngos lyis nhang kat zis gas jeisnyhop dyei das xiklyis ma nghuot, gausyis dang taiq kyoh das xiklyis dvnghuot. Khristu dah tapzains dah yomsoq gas vkom ma bweh bas jungh, ngos nhuot joeui yah taiq kyoh zis ma nghuot.

¹⁸Khasoeh ge lyis Khristu tapzains mas shei dah loeus gas, dyoqbis loh bang xiklyis vjyuk ma bos; nghuot laus eq khyuot yoeus xauh bang, yah xiklyis gas hauh zis Mangso dah yomsoq nghuot.

¹⁹Khasoeh ge lyis lhaihtoh dang mas taiq zis gas, Joeui bos bang dah joeui lhyi ngos lhoq thyoq das, Dolhain bang dah seqgyo cho lhyi ngos peq tyamp das, ge.

²⁰Housoeh las joeui bos bang khalhye nyeis lah? Maussauh lhaih soeu khalhye nyeis lah? Haih mungkvn mas dah dangdat khalhye nyeis lah? Mangso ka haih mungkvn mas dah joeui lhyi vkoh vpaq kuot tyamp dyei ma nghuot lhyeh?

²¹Khasoeh ge lyis dius gas vsainnyang joeui yah Mangso lhyi ma yoh seq bas jungh ge, Mangso ka nyah joeui da zis yah dvyhangteh kuot toh goeus. Hauh gungsthaiq ngamoq taiq kyoh dah dang koh paq, lyis lomsjingh bang lyis khyuot yoeus das xiklyis Mangso nghamh thyet goeus.

²²Hauh yvlyis kyink das nyhenshang Yuda jens gas vlho tsain sang lha, Heleni jens gas joeui tsain xo.

²³Nghuot laus eq ngamoq gas, taplhangh toh zis xauh soeu Khristu dah cho tsain taiq kyoh. Hauh zis gas Yuda jens dah xiklyis lainszo gus nghuot, Gohnyau bang xiklyis koh paq bweh nyeis.

²⁴Nghuot laus eq Mangso khi yoeus zis xauh dah Yuda jens yahge gohnyau bang xiklyis Khristu gas Mangso dah yomsoq yahge Mangso dah joeui nghuot.

²⁵Khasoeh ge lyis Mangso dah vkoh vpaq cho ka dius dah joeui bos thoq lyis joeui zes bos. Mangso dah yomnhuk zis gas dius dah yombos thoq lyis yom zes bos.

²⁶Gvshih boekyis eh, namoq lyis khi yoeus cho nghamh wu yoeuh geh. Gungsshoh khyvlyis joeui bos bang nyoshoq bos zis ma nghuot. Toeuh bos bang yahge zau nyau mas bang eq nyoshoq bos zis ma nghuot.

²⁷Mangso ka joeui bos bang lyis xoq lhoeu phuh das xiklyis mungkvn mas koh bang ge nghamh toh bang lyis khyen yoeus. Yombos bang lyis xoq lhoeu phuh das xiklyis mungkvn mas yomnhuk bang ge suon toh bang lyis khyen yoeus.

²⁸Mungkvn mas yhaugyen ge nghamh yoeus bang lyis mhont das xiklyis Mangso ka dius ngis gyoh bang, gohyuk yah choqh bang, cha ma nghuot ge nghamh yoeus zis xauh bang lyis khyen yoeus.

²⁹Hauh vjyuk gas, Mangso xikkhonh mas hank eq ma yoh khwank das xiklyis nghuot.

³⁰Mangso ka namoq lyis Khristu yah dvdain dvlom bweh nhang goeus las, Mangso ka Khristu lyis, yah dah joeui duot los nhang goeus. Yang nyah gvng mas Mangso xikkhonh mas yoh dan los goeus. Mangso dah gyingshang bang yoh bweh los goeus zis yahge yaunos masyah khyuot kat zis xauh goeus.

³¹Housoeh las lhaihtoh dang mas taiq zis yah dvyhangteh, Khwank dais bos soeu hank laus eq Yhensain mha khwank nyeis bas jungh, ge.