Read Achang 1 KORINTHU 11 Bible Online

1 KORINTHU 11 - Achang bible

1 KORINTHU 11

¹Ngos gas Khristu dah yikhyoh yoeus teh namoq eq ngah yikhyoh yoeus geh.

²Namoq gas cho khat khanghmuh mas ngos lyis soh las, ngos namoq lyis hau tyingtoh dang jyauh toh zis yah dvyhangteh tsain chank kuot nyeis yvmvyah ngos namoq lyis chungh.

³Nghuot laus eq ngos namoq lyis seq nhang mes zis gas, Khristu gas vbusbih khanghmuh dah uhloms nghuot; yhensain phoq gas nyah yhensain nyhiq dah uhloms nghuot; Mangso ka Khristu dah uhloms nghuot cho lhyi ngos namoq lyis seqgyo nhang mes.

⁴Vbusbih hank laus eq shvmanh dung, nghuot ya moq phung mha gausyis dang taiq lyis uhloms nghop toh lyis gas, vsainnyang uhloms dah nyoqnho ngelang gyoh nhang nyeis.

⁵Vmesbih hank laus eq shvmanh dung, nghuot ya moq phung mha Mangso dah dang taiq uhlyis uhloms ma nghop lyis gas, nyah yhensain phoq dah nyoqnho ngelang gyoh nhang nyeis. Nyang gas uhyuk tyamp dah vmesbih yah cha ma shaih.

⁶Vmesbih gas uhloms ma nghop das nghuot lyis gas, cam eq yuk tyamp bas jungh. Nghuot laus eq cam gom tyamp, nghuot ya uhyuk tyamp das zis gas, vmesbih xiklyis xoqphuh cho nghuot lyis gas, nyang uhloms nghop bas jungh.

⁷Vbusbih gas Mangso dah gungsdoeus lho yahge phunk nyoqnho dyei soeu nghuot yvmvyah uhloms nghop toh das zis ma doeus. Vmesbih gas vbusbih dah phunk nyoqnho nghuot.

⁸Khasoeh ge lyis vbusbih gas vmesbih masyah gvnkhanh toh zis ma nghuot, vmesbih yuk vbusbih masyah dvnghuot.

⁹Hauh vbusbih eq vmesbih xiklyis gvnkhanh toh zis ma nghuot, vmesbih lyis gas hauh vbusbih xiklyis gvnkhanh toh.

¹⁰Housoeh yvmvyah loeuswons bang lyis phauh nyang khyvlyis vmesbih gas nyah yhensain phoq dah vmingh o mha nghuot dah vlho chixoeuq das xiklyis uhloms nghop chah.

¹¹Nghuot laus eq yang Yhensain yah zomh las kang dwis cho mha, vbusbih gas vmesbih ma bos lyis ma gis teh vmesbih eq vbusbih ma bos ma gis.

¹²Khasoeh ge lyis, vmesbih gas vbusbih masyah gvnkhanh toh zis yah dvyhangteh, vbusbih gas vmesbih masyah khoeu los. Hauh thoq lyis dvnganh yvlyis bweh los nhang dah Yhensain ka Mangso nyang nghuot.

¹³Vmesbih gas uhloms ma nghop Mangso dah moqphung mha shvmanh dung lyis doeus lah, zis vsainnyang nghamh suon yoeuh nyeis geh.

¹⁴Vbusbih gas cam mui lyis nyah xiklyis ngelang gyoh cho nghuot zis gas soenghchoenk lyi mas namoq lyis chixoeuq nyeis ma nghuot lhyeh?

¹⁵Nghuot laus eq vmesbih cam mui zis gas nyah xiklyis yungh cho nghuot: Nyah cam xing ka nyah uhloms lyis nghop zis bweh das nyhenshang dyei toh.

¹⁶Nghuot laus eq dvyuk yuk hauh cho yah sen lha taiq phyen-goh nghuot lyis gas, ngamoq mas eq, Mangso dah phung mha eq, paiq dah huom mha housoeh uhloms nghop dah thungh mas lai las gohtoeu ma bos, oen ngos hauh soeu lhyi taiq das.

¹⁷Namoq paiq das xiklyis zain los dah huom ka vkyuh bos los das xiklyis tsain huom zis ma nghuot. Vkyuh yomh das khyvlyis dvhuom lha o mha taiq toh cho mha ngos namoq lyis ma chungh.

¹⁸Cangxeih vcho ka, namoq dah phung huom mha namoq mas xam ma xonh tyixo goh bang bos cho ngos xauhgyo; hauh zis dvkhamh jus oen ngos jingh.

¹⁹Namoq mas gang lvn loh cho bweh lo das; Hauh uhlyis hank gas jus yvpheh bos ge dah jyoeng cho dede thuq los das.

²⁰Housoeh las namoq dvgeh huom uhlyis, Yhensain dah nyenhcon zo das xiklyis huom zis ma nghuot.

²¹Khasoeh ge lyis namoq zo dah uhlyis, nyang yuk nyang toeu wom nyang yuk nyang toeu zo nyeis. Dvyhamh gas yuot nyeis, dvyhamh gas zvbiq shuk yet nyeis.

²²Zo shuk das xiklyis vsainnyang yhen ma tsain bos goh lhyeh? Nghuot ya Mangso dah tsainhtoh phung lhyi ma phauh ma nyang jwangh las, ma yoh bang lyis xoq lhoq phuh zis nghuot lhyeh? Ngos namoq lyis haih cho yah sen lha khasoeh taiq los das oen nghamhloms nyeis goh lah? Ngos namoq lyis chungh das lah? Jyoengh ma chungh.

²³Khasoeh ge lyis gvshih ngos namoq lyis cheh kyauh toh dah jyauh cho ka Yhensain Mangso mhayah lhom yoeus. Houka Yhensain Yesu gas jeswus loq mas kyauh tyamp zis xauh nyens lyis Yhensain Yesu gas ohlhyoq yoeus las,

²⁴jyehjuh chungh thang lhyi khyiq las, Haih zis gas namoq xiklyis dyei tyamp dah ngah gungs nghuot, ngos lyis soh nyeis das xiklyis haih zis yoeus zo geh, ge.

²⁵Houyah dvyhangteh nyenhcon dye zo thang lhyi, nyang kom lhyi eq yoeus las, Haih kom ka ngah suih yah kyihau tap las kuot toh dah thanghchvp vsaiq nghuot. Hauh yvlyis shuk khanghmuh ngos lyis soh das xiklyis haih zis kuot geh, ge.

²⁶Namoq gas khanhamp laus eq haih ohlhyoq zo las haih kom mha zis shuk khanghmuh hauh Yhensain dah shei kham cho lhyi, nyang doms jweh lyih shoq, kanghjyoeng kat taiq kyoh dyei dah vjyuk nghuot.

²⁷Housoeh las hank laus eq ma mon ma yih zis yah Yhensain dah ohlhyoq zo las, kom mha zis shuk lyis gas, Yhensain dah gungs yahge suih lyis shuot nyeis.

²⁸Housoeh yvmvyah hank laus eq vsainnyang gungs lyis nyei wu yoeuh las, hauh ohlhyoq lyis zo las hauh kom mha zis eq shuk bas jungh.

²⁹Khasoeh ge lyis hau ohlhyoq zo las hau kom mha zis shuk uhlyis hauh Yhensain gungs dah vjyuk lyis ma seqgyo soeu ka vsainnyang dang thang thyet zo khyvlyis zo shuk nyeis.

³⁰Housoeh yvmvyah namoq mas yomnhuk las ma yanghzan bang nyoshoq nyeis, shei loh bang eq nyoshoq nghuot goeus.

³¹Yang yvnyang gungs lyis shih kyink yoeuh lyis gas Mangso dah soetuon zis ma xauh das.

³²Nghuot laus eq yang lyis heisoeh Mangso soetuon lha joeng cho ka yang lyis mungkvn dius jens yah dvgeh dang thang thyet zis ma xauh nhang das xiklyis jyauh cho nghuot.

³³Housoeh las ngah boekyis eh, Yhensain dah nyenhcon zo pwe zo das xiklyis namoq zop huom nyeis lyis gas nyang changh nyang langh goh geh.

³⁴Housoeh namoq Yhensain dah nyenhcon zo pwe zo das xiklyis zop huom zis gas, Mangso dah soetuon zis xauh das xiklyis ma nghuot goeus jungh, dius dvyuk yuk yuot nyeis lyis gas, yhen mha zo bas jungh. Gohtoeu chah shih cho yah sen lha ngos jweh los lyis tyeh taiq kyoh das.