Read Achang 1 KORINTHU 12 Bible Online

1 KORINTHU 12 - Achang bible

1 KORINTHU 12

¹Boekyis eh, namoq maussauh yah nyei los dah Dyos jyungshuk dah cho yah sen lha, hauh dah jyoeng cho ngos namoq lyis seq nhang mes.

²Namoq gohnyau tsain nghuot shih uhlyis cho vja ja pheh chowhang whang zis yah kang ma bos dah silho jens lyis paiq los zis gas namoq nyang seq.

³Hank laus eq Mangso Dyos yah shwih zis kham yoeus soeu nghuot lyis gas, Yhensain Yesu lyis ma nhoengh Gyingshang Dyos yah shwih zis ma xauh kham yoeus lyis gas, Yhensain Yesu gas Yhensain nghuot ge hank eq ma yoh rhen cho, ngos namoq lyis seq nhang mes.

⁴Gvshih Dyos jyungshuk vja ja bos laus eq, hau jyehjuh jyungshuk lyis Dyos dvkoeuq masyah dyei nyeis.

⁵Wons wuq das phuqsoe muhzoh vja ja bos, nghuot laus eq phuqsoe das Yhensain ka dvyuk kyingh dvnghuot.

⁶Wons wuq muhzoh xiklyis kank bos cho vja ja nghuot. Nghuot laus eq dvnganhmoq lyis vsainnyang wons wuq phuqsoe dah lhyenwhei muhzoh xiklyis kank bos cho dyei soeu ka Mangso dvso kyingh dvnghuot.

⁷Dvnganhmoq xiklyis vkyuh bos bas jungh, dvyuk yah dvyuk mas hau Dyos bos joq cho vja ja khyvlyis chixoeuq nyeis.

⁸Khasoeh ge lyis dvyuk yuk lyis hau Dyos gas joeui dang seq taiq das kank bos nhang; gohtoeu dvyuk lyis hau Dyos gas seq cho dah dang yoh taiq das kank bos nhang.

⁹Gohtoeu dvyuk lyis hau Dyos gas Mangso lhyi lomsjingh cho kank bos nhang; gohtoeu dvyuk lyis hau Dyos gas nos lhoq gis das jyungshuk yoh nhang.

¹⁰Hau Dyos nyang gohtoeu dvyuk lyis yomsoq muh yoh kuot das kank bos cho dyei; gohtoeu dvyuk lyis lvpe pe nhang, gohtoeu dvyuk lyis Dyos yah dyei dah kank bos cho nghuot ma nghuot seq nghamh gvn yoeuh das jyungshuk, gohtoeu dvyuk lyis nyingh vja ja seq kat nhang, gohtoeu dvyuk lyis taiq dang dah vjyuk seq phant thuq das kank bos cho tsain dyei toh.

¹¹Nghuot laus eq hauh kank bos cho jyehjuh jyungshuk dvnganh gas, Dyos dvkoeuq kyingh yah bweh nhang lha, nyah ehnyet tap khyvlyis nyang yuk nyang toeu lhyi lhyenwhei kank bos cho gvm dyei toh.

¹²Khristu gas gungsdoeus nyoshoq bos dah gungs yah doeusgoh. Hauh gungs dah gungsdoeus nyoshoq nghuot laus eq gungs dvkoeuq kyingh dvnghuot.

¹³Houyah dvyhangteh yang dvnganh gas Yuda jens laus eq, gohnyau bang laus eq, jons jens laus eq, luiq bang laus eq Dyos dvkoeuq kyingh mas jeisnyhop tsain kham lha gungsdom dvkoeuq kyingh bweh los. Dvnganhmoq dah ehnyet mas hau Dyos dvkoeuq kyingh lyis kham yoeus.

¹⁴Khasoeh ge lyis gungs mas gungsdoeus dvkoeuq kyingh bos zis ma nghuot, nyoshoq bos.

¹⁵Khyei ka, Ngos loq ma nghuot yvmvyah gungs yah ma sen, ge sang lhyi ka, housoeh taiq gvng mas nyang gungs yah jyoengh ma sen zis ma nghuot.

¹⁶Tsai, no gas, Ngos nyoqjeih ma nghuot yvmvyah gungs yah ma sen, ge sang lhyi ka, housoeh ge gvng mas nyang gungs yah jyoengh ma sen zis ma nghuot.

¹⁷Dvgungs gonh nyoqjeih dvkoeuq dvnghuot lyis gas, xauhgyo das cho khalhye bos lah? Xauhgyo das cho kyingh nghuot lyis eq, xauh nam das cho khalhye bos lah?

¹⁸Gvshih gas Mangso nyang o zis yah dvyhangteh gungsdoeus nyang doeus nyang lyis nyah joqyos yah nyang gungs mas tap toh.

¹⁹Tsai, dvnganh gas gungsdoeus kyingh dvnghuot lyis gas, gungsdom bweh los das zis ma nghuot.

²⁰Gvshih gas gungsdoeus nyoshoq bos nghuot laus eq, gungs dvkoeuq kyingh dvnghuot.

²¹Housoeh las nyoqjeih gas loq lyis, Ngos nvng lyis ma chah, ge ma yoh sang. Uhloms eq khyei aiq khyungh lyis, Ngos namoq lyis ma chah, ge ma yoh sang.

²²Hauh thoq lyis gungs mas yom zes nhuk dah gungsdoeus jens eq ma bos ma gis nghuot.

²³Gungs mas hou iq phauh ma dap teh dah gungsdoeus jens lyis yang zes yhaugyen teh gomh nyeis. Yah dah ma yungh gungsdoeus jens lyis zes las nyoqnho ngelang bos shoq shunk toh.

²⁴Yungh joq goeus dah gungsdoeus jens lyis gas ma shunk dyei chah lo. Nyoqnho ma yoh dah gungsdoeus jens lyis nyoqnho ngelang zes yoh nhang das xiklyis Mangso nyang hauh gungsdoeus jens lyis dvgeh xonh tap toh.

²⁵Housoeh las gungs mas gungsdoeus jens nyang changh shaih loh dyos loh zis ma bos, nyang changh nyang chiq goh nyeis.

²⁶Housoeh gungsdoeus dvkoeuq shohjyen zis xauh lyis, gohtoeu gungsdoeus dvnganh eq houyah dvgeh kham zo nyeis. Gungsdoeus dvkoeuq chungh zis xauh lyis, gohtoeu gungsdoeus dvnganh eq dvgeh gauslaus nyeis.

²⁷Gvshih namoq dvnganh gas Khristu dah gungs nghuot las, dvyuk yah dvyuk gas hauh gungsdoeus jens nghuot.

²⁸Mangso ka hauh phung mha, cangxeih joqyos mas lvgyo jens, aiq vjoq mas lvpe jens, somh vjoq mas svra moq, hauh thang lhyi yomsoq muh kuot bang, nos lhoq gis das kank bos jyungshuk yoh bang, gohyuk lyis pangh thuk bang, cho tuonh shet das kank bos bang yahge gohtseq nyingh vja ja seq kat bang lyis nyah joqyos yah nyang toeuq kat toh.

²⁹Nyamoq dvnganh gas lvgyo nghuot lhyeh? Dvnganhmoq lvpe tsain nghuot lhyeh? Dvnganhmoq svra tsain nghuot lhyeh? Dvnganhmoq yomsoq muh yoh kuot lhyeh?

³⁰Dvnganhmoq nos lhoq gis dah jyehjuh yoh lhyeh? Dvnganhmoq gohtseq nyingh vja ja kat lhyeh? Dvnganhmoq kat dah nyingh vjyuk phui lhyeh?

³¹Housoeh las namoq gas zes thank dah jyehjuh jyungshuk lyis tungh o mes nyeis geh. Tsai, ngos namoq lyis zes thank dah cho dvkoeuq chixoeuq shih das.