Read Achang 1 KORINTHU 13 Bible Online

1 KORINTHU 13 - Achang bible

1 KORINTHU 13

¹Ngos gas dius nyingh yahge loeuswons bang nyingh vja ja seq taiq laus eq jyetdap ehnyet ma bos lyis gas, thwe bos dah mangh yahge nyings huomh toh dah janghau teh ngos bweh nyeis.

²Ngos lvpe seq pe zis yahge, nghop shung toh cho dvnganh, seq cho vja ja yoh joq zis yahge, boms lyis yoh xwih dah lomsjingh ehnyet bos laus eq, jyetdap ehnyet ma bos lyis gas ngos cha eq ma nghuot.

³Ngos yoh zis dvnganh dyei gvm tyamp las, ngah gungs lyis yangh ngheq phudyei das zis kyauh tyamp laus eq, jyetdap ehnyet ma bos lyis gas ngah xiklyis chah vkyuh ma bos.

⁴Jyetdap ehnyet gas ehnyet xing, nhaiqnyen, noh cho ma bos, ma moengs ma khwank.

⁵Jyetdap ehnyet gas ma doeus khyvlyis ma kuot, vsainnyang vkyuh ma xo, lvnyap ma nyho, yobos ma xo.

⁶Jyetdap ehnyet gas ma dan cho mha ma gauslaus, jyoeng cho mha gauslaus nyeis.

⁷Jyetdap ehnyet gas khanhamp eq vsomh ma kham, vjangh lomsjingh nyeis, vjangh nghamhloms nyeis, vjangh jhen nyeis.

⁸Jyetdap ehnyet gas khanhamp eq nungsdoms loh zis ma nghuot; lvpe seq pe cho nghuot lyis gas wui loh das; nyingh vja ja seq taiq cho nghuot lyis eq doms tyamp das; seq cho nghuot lyis gas bi tyamp das.

⁹Khasoeh ge lyis yah dah seq cho jyehjuh jyungshuk eq, Dyos yah jyuonh dah lvpe dang taiq dah kank bos cho eq dyinghjet zis ma nghuot, vdoeus kyingh dvnghuot.

¹⁰Nghuot laus eq hau dyinghjet zis jweh los goeus ya, vdoeus gas dyuk loh das.

¹¹Ngos loshang yoq lyis ngos taiq cho, ehnyet mas kham zo cho, nghamh cho dvnganh gas loshang teh nghuot. Nghuot laus eq ngos svyenh nghuot goeus ya, loshang dah wotwu lyis ngos tyamp goeus.

¹²Gvshih yang nyvng zis gas bvngtoenk masyah thuq los dah silho lhyi nyvng teh yet yet dvnyvng; hauh thang lyis yang nyoqnho changh nyvng goh das: gvshih ngos seq zis gas dvdoeus dvnghuot; hauh uhlyis Yhensain ngos lyis seq teh ngos eq vlhomuh seq das.

¹³Gvshih gas lomsjingh zis, nghamhloms zis yahge jyetdap zis ge somh ja bos: nghuot laus eq hauh goeu mas zes kuh thank zis gas jyetdap ehnyet nghuot.