Read Achang 1 KORINTHU 15 Bible Online

1 KORINTHU 15 - Achang bible

1 KORINTHU 15

¹Boekyis eh, ngos namoq lyis taiq kyoh las namoq eq lhom yoeus zis yah hauh yvmas namoq dah lomsjingh cho goeng toenk joq goeus dah hau Gausyis dang cho ngos namoq lyis doms taiq kyingh mes.

²Hauh gausyis dang gas ngos namoq lyis taiq kyoh ku goeus dang nghuot. Namoq gas hau gausyis dang lyis goeng goeng lomsjingh zwi zains toh lyis namoq khyuot yoeus zis xauh das. Housoeh ma nghuot lyis namoq dah lomsjingh cho ka vkom lomsjingh zis dvnghuot das.

³Khasoeh ge lyis ngos lhom yoeus goeus dah yhaugyen thank cho lyis ngos namoq lyis kyauh toh goeus. Houka lhaihtoh dang mas lhaih toh zis yah dvyhangteh Khristu gas yah yaunos xiklyis shei kham goeus cho.

⁴Nyang nyhop zis xauh las lhaihtoh dang mas taiq zis yah dvyhangteh, somh vnyeih lyis dwis toq loh goeus cho,

⁵Petru lyis nyvng xoeuq, hauh thang lhyi nyah changlo jens dvci aiq yuk lyis nyvng xoeuq.

⁶Hauh thang lhyi nyah thang mha chank bang boekyis oengxo nyet lyis dvlhain dvm lyis nyvng xoeuq. Nyamoq mas nyothyang ka gvshih jweh shoq kang dwis nyeis shih, dvyhamh gas yhet pyo tyamp goeus.

⁷Hauh thang lhyi Yaku lyis, hauh thang lhyi lvgyo jens dvnganhmoq lyis nyvng xoeuq.

⁸Thang thank lyis ngos buisnyeis ma dyingh khoeu los dah loshang teh dah soeu jyank mas eq thuq xoeuq.

⁹Khasoeh ge lyis ngos gas lvgyo jens mas ngis thank soeu ngos nghuot. Ngos Mangso dah tsainhtoh phung lhyi shoeuhshih yvmvyah lvgyo oen das zis yangh ma mon.

¹⁰Nghuot laus eq Mangso dah jyehjuh gvng mas ngos gas gvshih dah ngos nghuot joq. Mangso ngos lyis dyei dah jyehjuh eq vkom ma nghuot, gohtoeu lvgyo jens dvnganhmoq thoq lyis ngos muh zes wons wuq nyeis. Housoeh yoh kuot zis gas ngos kank bos gvng mas ma nghuot, ngos yah dvgeh nghuot dah Mangso jyehjuh dvnghuot.

¹¹Housoeh las ngos laus eq, gohtoeu lvgyo jens laus eq hai gausyis dang lyis taiq kyoh las namoq eq lomsjingh goeus.

¹²Khristu gas shei masyah dwis toq loh goeus cho ngamoq taiq kyoh nyeis lyis, namoq mas dvyhamh gas, shei yvmas dwis toq cho ma bos oen khasoeh yoh sang lah?

¹³Shei masyah dwis toq los zis ma bos lyis gas Khristu eq dwis toq loh das zis ma nghuot.

¹⁴Khristu ma dwis toq loh lyis gas, ngamoq dah taiq kyoh dang gas vkom nghuot las, namoq dah lomsjingh zis eq vkom dvnghuot.

¹⁵Hauh thoq lyis ngamoq gas Mangso cho mha ma ying kanghjyoeng nghuot loh das. Khasoeh ge lyis Mangso ka Khristu lyis dwis toq loh nhang goeus oen lha ngamoq nyah cho kanghjyoeng kat goeus. Nghuot laus eq shei goeus bang jyoengh ma dwis toq lyis gas, Mangso nyang lyis dwis toq kat das zis ma nghuot.

¹⁶Shei goeus bang ma dwis toq lyis gas, Khristu eq dwis toq kat zis ma xauh lo.

¹⁷Khristu ma dwis toq loh lyis gas, namoq dah lomsjingh zis gas loms shuot cho dvkoeuq nghuot zis yah namoq gas namoq dah yaunos mas dvnyop joq shih.

¹⁸Hauh thoq lyis, Khristu lyis lomsjingh las shei loh bang eq somh loh goeus ge dah vjyuk nghuot.

¹⁹Yang haq caiq lyis kyingh Khristu mas nghamhloms chank dvbos lyis gas, yang gas cangsoeu dius dvnganhmoq thoq lyis zes shohjyen xauh bang nghuot.

²⁰Nghuot laus eq, jyoengh bweh cho ka, Khristu gas shei masyah dwis toq loh goeus las, yhet pyo goeus bang dwis toq das zis pauh toh cho tsain xauh yoeus.

²¹Khasoeh ge lyis, dius dvyuk gvng mas shei cho bweh los zis yah dvyhangteh dius dvyuk gvng mas eq shei bang xiklyis dwis toq das cho bweh los goeus.

²²Dius dvnganh gas Adam yah dvdain dvlom nghuot las shei loh. Houyah dvyhangteh, Khristu yah dvdain dvlom tsain nghuot yvmvyah dvnganh gas shei masyah Khristu mas dwis toq los das.

²³Nghuot laus eq yuk khanghmuh nyang yuk nyang toeu vvng khyvlyis dwis toq los das. Khristu gas cangxeih dwis toq loh. Hauh thang lhyi Khristu doms jweh lyih uhlyis, nyang yah sen bang dwis toq los das.

²⁴Hauh thang lhyi thang thank shishenh jweh los das, hauh uhlyis Khristu gas zau nyeis dah dyos sidyos, toeuh yoh bang, yomsoq dvnganh lyis ung tyamp las hau munghdan lyis Uwus Mangso dah loq mas kyauh das.

²⁵Khasoeh ge lyis Khristu gas Mangso yah gomloeus jens dvnganh lyis ung tyamp las Khristu dah khyei o mha toh das shishenh jweh shoq guon nyeis das.

²⁶Thang thank dah jeswus ge dah shei cho ka mhont zis xauh das.

²⁷Lhaihtoh dang mas, Mangso ka vyhang dvnganh yvlyis nyah khyei o mha toh, ge. Vyhang dvnganh ge yvmas Mangso nyang houmha ma bos zis gas bvng bvng nghuot. Khasoeh ge lyis vyhang dvnganh Khristu dah khyei o mha toh dah Yhensain ka Mangso nyang nghuot.

²⁸Nghuot laus eq dvnganh yvlyis Khristu guon dah o mha dye toh lyis, hauh Lo nyang vyhang dvnganh yvlyis Uwus Mangso dah o mha toh das las, Mangso ka joq zis dvnganh thoq mas nyang guon nyeis das.

²⁹Shei goeus bang dah nyhenshang nyamoq dah gungsthaiq khyvlyis jeisnyhop kham bang dah cho ka khasoeh gah? Chah vkyuh bweh nhang mes dah nghamhloms zis yah kuot lah? Dvyhamh bang nghamh zis yah dvyhangteh, shei goeus bang dwis toq das cho ma bos cho jyoeng nghuot lyis gas, shei goeus bang xiklyis ge chamus dius jens jeisnyhop tsain kham lah?

³⁰Ngamoq eq chamus shishenh khanghmuh gyuk chiqh cho mha shei ma soh chank kuot nyeis lah?

³¹Boekyis eh, ngos gas nyeih yau nyeih shei cho yah thungh phuh nyeis. Ngos heisoeh yoh taiq zis gas Yhensain mha namoq gvng mas ngos khwank chank bos yvmvyah nghuot.

³²Ngos dius dah ehnyet khyvlyis mungkvn vkyuh lyis nghamhloms zis yah, Ephesu wus mas dah yewus yah sat goh lyis gas ngah xiklyis chah vkyuh bos lah? Shei goeus bang ma dwis toq los das lyis gas dius jens gyangh taiq dang: Yang zo goh, shuk goh, pyo pyo nyeis goh: khasoeh ge lyis yang phvnaq nyeihyo shei das, ge teh dvnghuot das.

³³Namoq chowhang vwhang goh: ma gis dah dyenschangh jens gas gis dah wotwu lyis lhoeu thyoq.

³⁴Dan cho chank das zis soh geh, yaunos vtsoq kuot goh: namoq dvyhamh Mangso lhyi ma seq: namoq xoq bas jungh oen ngos heisoeh taiq.

³⁵Shei goeus bang khasoeh yoh dwis toq das lah? Khasoeh teh gungs nghuot das lah, ge dvyuk yuk nyei das.

³⁶Houka koh soeu dah nyeidang nghuot, nvng nyeisjvng mas jyo nyau dvchvp xoh lyis, hauh jyo nyau shih ma shei tyamp lyis gas yoh yuk los zis ma nghuot.

³⁷Nvng tsoh mas xoh dah jyo nyau gas gukchvp, nghuot ya gohtoeu vnyau dvja ja dvnghuot. Yuk los dah gungs gas nvng xoh dah vjeih ma nghuot lo.

³⁸Mangso ka nyang o zis yah dvyhangteh, hauh jyo nyau lyis gungs vsaiq dyei toh. Yhensain ka jyo nyau khanghmuh lyis vsainnyang yah phi dah gungs tsain dyei toh.

³⁹Kang dwis nyeis dah gungs shoh bos ya bos zis gas dvja kyingh ma nghuot: dius dah gungs shoh dvja, gaunyhauq dah gungs shoh dvja, nghoq dah gungs shoh dvja, oengdoq dah gungs shoh dvja dvnghuot.

⁴⁰Maukhung yah sen dah gungs, nyeisjvng mas zis yah sen dah gungs ge gohtoeu toeu bos. maukhung gungs yah sen dah phunk gas, nyeisjvng yah sen dah gungs dah phunk yah shaih joq.

⁴¹Buis eq nyah phunk yoh, lhamhmuh eq nyah phunk, kyi eq nyang gohphunk yoh, kyi mha yangh dvlom yah dvlom bvng zis gohtoeu toeu dvnghuot.

⁴²Shei goeus bang dwis toq das cho eq housoeh nghuot. Hauh gungs gas tsoh mas nyhop lyis seq dyoqbis loh. Dwis toq los lyis ma seq dyoqbis zis nghuot das.

⁴³Nyhop zis xauh uhlyis ma yungh, yom ma bos. Dwis toq los uhlyis houka yungh las yomsoq bos das.

⁴⁴Nyhop uhlyis nyeisjvng gungs dvnghuot, dwis toq los uhlyis gas dyos gungs nghuot das. Nyeisjvng gungs bos lyis gas dyos gungs eq bos das.

⁴⁵Lhaihtoh dang mas taiq zis yah dvyhangteh, cangxeih dius Adam gas kang dwis dah cangsoeu dius khyvlyis gvnkhanh toh zis xauh goeus. Nghuot laus eq thang thank Adam gas kang bos dah dyos nghuot.

⁴⁶Dyos gungs shih bos zis ma nghuot, nyeisjvng gungs bos thang lhyi dyos yah sen dah gungs doms bos.

⁴⁷Cangxeih Adam gas tsoh yah gvnkhanh toh las nyeisjvng mas zis nghuot. Thang lhyi dah Adam gas maukhung mhayah jweh los soeu nghuot.

⁴⁸Nyeisjvng thoq yah sen dah dius jens gas tsohmop yah gvnkhanh zis xauh soeu yah tsain doeusgoh. Maukhung yah sen bang gas maukhung mhayah jweh los dah dius yuk yah tsain doeusgoh.

⁴⁹Tsohmop yah kuot toh dah dius yuk yah doeusgoh dah gungsdoeus lho lhyi yang chi toh zis yah dvyhangteh, maukhung mhayah jweh los dah dius yah doeusgoh dah gungs doeus lho lhyi eq yang tsain chi toh das.

⁵⁰Boekyis eh, ngos namoq lyis taiq mes zis gas, suih yah shoh yah nghuot dah dius gas Mangso munghdan dah vso vlho ma yoh zom das zis yahge seq dyoqbis zis gas ma seq dyoqbis dah vso vlho lhyi xauh zom das zis ma nghuot.

⁵¹Gyo geh, nghop toh dah jyoeng cho dvkoeuq ngos namoq lyis taiq kyoh bah: yang dvnganh gas shei loh das zis ma nghuot. Nghuot laus eq thang thank dah lvbuh nyings lyis, yang dvnganh gas nyet los nyet tant nyoq dvnyik gyo lyis thaiq loh das. Khasoeh ge lyis hauh lvbuh muot kat uhlyis shei goeus bang gas ma dyoq ma bis dwis toq los das zis yahge khanhamp eq doms shei das zis ma nghuot lo. Yang dvnganh thaiq loh das.

⁵²

⁵³Khasoeh ge lyis hau seq dyoqbis zis gas ma seq dyoqbis yvpheh thaiq loh das; hai seq shei zis eq ma seq shei yvpheh thaiq loh das.

⁵⁴Housoeh las hai seq dyoqbis zis gas ma seq dyoqbis zis lyis eq seq shei zis gas ma seq shei yvlyis eq thaiq wuot goeus ya, Shei zis gas Ung zis yah nyhau tyamp zis xauh goeus, Shei zis lyis Ung zis yah nhiq zaiq cho dye goeus, ge lhaihtoh dang nyuk los.

⁵⁵Shei zis eh, nah nyen khalhye gah? Shei zis eh, nah ung zis khalhye gah?

⁵⁶Shei cho ka nyah nyen yaunos masyah xauh yoeus. Yaunos gas nyah yomsoq lyis Lyi masyah xauh yoeus.

⁵⁷Nghuot laus eq Yhensain Yesu gvng mas yang lyis ung cho dyei dah Mangso jyehjuh gas kuh joq.

⁵⁸Housoeh yvmvyah, ngos jyetdap boekyis eh, namoq goeng goeng yap geh. Yhensain Mangso dah muh wons wuq nyeis cho ka khanhamp eq vkom ma nghuot yvlyis soh zis yah hau Yhensain dah muhzoh mas vjangh tungh yomkat wons wuq nyeis geh.