Read Achang 1 KORINTHU 2 Bible Online

1 KORINTHU 2 - Achang bible

1 KORINTHU 2

¹Boekyis eh, Mangso dah nghop toh jyoeng cho loeus ngos namoq lyis los taiq kyoh uhlyis, dang soenk yah, joeui bos zis yah jweh los zis ma nghuot.

²Khasoeh ge lyis ngos namoq yah nyeis gyo lyis Yesu Khristu cho, zes las nyang taplhangh zis xauh cho, shei cho mha lai las gohtoeu cho dvnganh tohnyhik toh das oen nghamh thyet toh.

³Housoeh las ngos namoq jyank mas jweh nyeis uhlyis ngos gas yomnhuk zis yah gyuk nvn zis yah nyeis.

⁴Ngos jyauh cho yahge loeus dang lyis dius dah joeui cho lyes dah dang ma yhung, Yoh loms, Mangso Dyos dah muhzoh yahge yomsoq lyis yhung lha dvtaiq kyoh.

⁵Housoeh las namoq dah lomsjingh cho ka, dius dah joeui mha ma nges, Mangso dah yomsoq mas nges las goeng joq.

⁶Nghuot laus eq ngos gas Dyos lomsjingh cho mha nhaiqbos doengs goeus bang lyis joeui yah taiq kyoh. Nghuot laus eq houka haih mungkvn yah sen dah joeui ma nghuot; mungkvn mas dah dyoqbis tyamp das zau jens dah joeui eq ma nghuot.

⁷Nghuot laus eq ngos taiq kyoh dah joeui ka cangsoeu dius ma seq shoq nghop shung toh, Mangso dah noq thank joeui nghuot. Houka mungkvn ma joq shih lyis yah, yang nyoqnho ngelang xauh yoeus das nyhenshang Mangso toh dah nghamh toeuq cho nghuot.

⁸Haih mungkvn lyis guon bang hank eq haih joeui lhyi ma seq; Seq ya, phunk bos dah Yhensain lhyi nyamoq ma tsain taplhangh das.

⁹Nghuot laus eq lhaihtoh dang mas taiq zis gas, Hank ma nyvng, ma xauhgyo ku cho bweh das ge, hank ma nghamh soh cho lhyi Mangso ka nyang lyis jyetdap bang dah xiklyis sont toh, ge.

¹⁰Mangso ka nyah Dyos cho yah yang lyis nyah dah nghop toh cho lhyi chixoeuq goeus. Hauh Dyos gas vyhang dvnganh lyis kyingh ma nghuot, Mangso dah noq thank nghamh toeuq cho lhyi yangh lap yoeuh nyeis.

¹¹Dius dvyuk mas bos dah dyos ma nghuot lyis gas, dius yah sen yvlyis hank yoh seq lah? Houyah dvyhangteh Mangso dah Dyos yah ma nghuot lyis gas Mangso nyang yah sen dah cho lhyi hank eq ma yoh seq.

¹²Yang gas mungkvn yah sen dah dyos lyis kham yoeus zis ma nghuot. Mangso yang lyis dyei toh dah jyehjuh dvnganh lyis seq bas jungh, Mangso nhang kat dah Dyos lyis tsain kham yoeus.

¹³Housoeh yvmvyah Dyos lyis kham yoeus goeus bang lyis Dyos yah sen dah jyoeng cho lhyi taiq kyoh uhlyis ngamoq gas dius dah joeui khyvlyis ma taiq; Dyos yah jyauh dah dang yah dvtaiq.

¹⁴Soenghchoenk dius gas Mangso dah Dyos yah dyei dah jyehjuh jyungshuk lyis ma yoh lhom yoeus. Hauh zis gas nyah xiklyis vkoh vpaq cho nghuot joq; dyos ehnyet yah kyingh hauh cho dah phauhdap zis lyis dvyoh thyet dyei yvmvyah, nyang gas hounyhoq lyis seqgyo zis ma nghuot.

¹⁵Dyos bos soeu ka vyhang dvnganh dah phauhdap cho lhyi soe yoh tuon. Nghuot laus eq nyang lyis gas hank eq soe ma yoh tuon.

¹⁶Lhaihtoh dang mas, Yhensain dah ehnyet lyis hank seq las nyang lyis joeui hank yoh dyei lah, ge taiq toh zis yah dvyhangteh nghuot. Nghuot laus eq yang mas gas Khristu dah ehnyet yoh toh.