Read Achang 1 KORINTHU 3 Bible Online

1 KORINTHU 3 - Achang bible

1 KORINTHU 3

¹Boekyis eh, ngos namoq lyis dyos ehnyet bos bang lyis teh ma yoh taiq kyoh. Gungsshoh dius gyingh dvnghuot shih bang yahge Khristu mas lonoeuh jens lyis teh taiq kyoh.

²Gvshih jweh shoq namoq cicont ma nghuot shih yvmvyah, zos ma tsoh, nauh dvgvmshuk, gvshih yangh namoq cicont ma nghuot shih.

³Housoeh las namoq gungsshoh gyingh dvtsain nghuot shih khyvlyis tsain nyeis; namoq mas noh cho, dyoqgoh cho bos yvmvyah, houka namoq haih mungkvn yah sen khyvlyis kang dwis nyeis zis nghuot cho kanghjyoeng chixoeuq nyeis ma nghuot lhyeh?

⁴Namoq mas dvyuk yuk gas, Ngos gas Paulo thang chank, tsai gohyhamh gas, Ngos gas Apolo thang chank, ge tsain taiq goh lyis, namoq mungkvn dius jens teh kyingh kang dwis nyeis ma nghuot lhyeh?

⁵Apolo gas hank nghuot lah? Paulo eq hank nghuot lah? Ngah aiq yuk gas Mangso dah jyeidwis jens tsain nghuot las, ngamoq gvng mas namoq Mangso lhyi yoh lomsjingh los bas jungh oen shwih uhshe dyei bang dvtsain nghuot. Housoeh las yang yuk khanghmuh gas Mangso gvn chixoeuq toh dah muh yoh zwi nyeis.

⁶Ngos gas nyau khyoq, Apolo gas jeis sanh las, yuk kuh los nhang soeu ka Mangso nghuot.

⁷Housoeh tsungh soeu ka cha ma nghuot, jeis sanh soeu eq cha ma nghuot; yuk kuh los nhang dah Mangso kyingh vgungs dvnghuot.

⁸Tsungh soeu yahge jeis sanh soeu dah nghamh toeuq cho dvkoeuq dvnghuot; Mangso ka vsainnyang kuot dah muhzoh lyis tank las phauh shangh das.

⁹Khasoeh ge lyis ngamoq gas Mangso dah muh chomp zwi bang nghuot. Namoq gas Mangso dah yos yahge yhenzains yoszains tsain nghuot.

¹⁰Mangso ngos lyis dyei toh dah jyehjuh jyungshuk lyis yhung lha, joeui bos dah soehfuh teh, ngos vpom xi toh goeus. Gohyhamh gas houmha tsoq tsuk nyeis: nghuot laus eq yuk khanghmuh vsainnyang khasoeh tsoq kuot yvlyis zaih nyeis bas jungh.

¹¹Khasoeh ge lyis Mangso dvlhain xi toh goeus, Yesu Khristu ge dvkoeuq kyingh dah yhen-yos mas gohtoeu vpom yoh xi zis ma nghuot.

¹²Hauh yhen-yos mas dvyhamh ngwis, xing, phauhdap luk yhung lha tsoq ci loh. Dvyhamh gas saiq, huhyau, lhyeih yah tsoq kuot.

¹³Dvyuk dvyuk dah kank bos muhzoh gas Yhensain Yesu jweh los nyeih lyis thuq los das. Khasoeh ge lyis hauh buisnyeis lyis nyi gas dvyuk yah dvyuk kuot dah muh lyis shi yoeuh las gis cho, ma gis cho lhyi chixoeuq das:

¹⁴Hauh tsoq tsuk yvmas yhung dah vyhang hauh nyi mas yoh luiq nghuot lyis gas hau tsuk soeu ka phauh shangh zis xauh das.

¹⁵Dvyuk yuk dah muhzoh ngeh tyamp nghuot lyis gas, nyang somh tyamp das. Nghuot laus eq nyang gas nyi masyah luiq teh nyah gungs kyingh khyuot yoeus zis xauh das.

¹⁶Namoq gas Mangso dah yhenmuh nghuot las Mangso dah Dyos namoq mas bos yvlyis namoq ma seq goh lhyeh?

¹⁷Dius dvyuk yuk Mangso dah yhenmuh lyis lhoeu thyoq lyis gas, Mangso ka hauh soeu lhyi mhont tyamp das: khasoeh ge lyis Mangso dah yhenmuh gas gyingshang joq: nvng gas hauh yhenmuh nghuot.

¹⁸Hank eq vsainnyang gungs lyis ma mhuih jyomh bas jungh. Namoq dvyuk yuk haih mungkvn vsoenk mas joeui bos ge nghamh soeu ka jyoengh joeui bos soeu bweh das nyhenshang koh soeu bweh bas jungh.

¹⁹Khasoeh ge lyis, haih mungkvn mas dah joeui ka Mangso xikkhonh mas koh zis nghuot. Hau lhaihtoh dang mas taiq zis yah dvyhangteh, Mangso ka hau joeui bos bang lyis nyamoq nyang dah yik cho lhyik mas nyih nhang.

²⁰Gohtoeu lhaihtoh dang dvkoeuq mas eq, Joeui bos bang dah nghamh yoeuh cho ka vkyuh ma bos yvlyis Yhensain seq, ge bos.

²¹Housoeh yvmvyah hank eq dius dah uhshe bang gvng mas khwank ehnyet ma bos bas jungh. Khasoeh ge lyis dvnganh zis gas namoq zis nghuot.

²²Paulo eq Apolo eq, Petru eq, haih mungkvn eq, dwis zis yah shei zis eq, gvshih nyeis zis yahge thang pheh nyeis dyos das zis eq, dvnganh namoq zis nghuot.

²³Namoq gas Khristu dah zis nghuot las Khristu gas Mangso zis nghuot.