Read Achang 1 KORINTHU 4 Bible Online

1 KORINTHU 4 - Achang bible

1 KORINTHU 4

¹Ngamoq gas Mangso nghop shung toh dah jyoeng cho lhyi zom bang ge Khristu dah jyeidwis jens nghuot oen namoq suon yoeus gis.

²Housoeh hauh jyeidwis mas bos chah dah kank bos cho dvja gas, nyang nyah Yhensain lhyi lomluk chah.

³Gvshih namoq, nghuot ya soetuon jang mas ngos lyis soetuon lhyi, ngos hauh yvlyis chaxwe ma nhang; ngos ngvnyang gungs lyis yangh soe ma tuon.

⁴Khasoeh ge lyis ngos sohseq dah ngah ehnyet gas lhoqshang, nghuot laus eq ngos yobos ma bos oen taiq zis ma nghuot: ngos lyis soetuon soeu ka Mangso dvnghuot.

⁵Shishenh top ma jweh shih lyis hank lyis eq soe vtuon goh. Thang thank soetuon cho lhyi Yhensain jweh los shoq langh nyeis chah. Nyang gas chuot yvmas nghop shung toh dah vyhang dvnganh lyis eq, dius dah ungkhau mha gauh nghamh toeuq toh cho lhyi chi thuq xoeuq das. Hauh uhlyis hank eq hank mon yih zis yah dvyhangteh Mangso jyank masyah chungh cho xauh das.

⁶Boekyis eh, namoq vkyuh xiklyis haih cho mha ngos yahge Apolo dah cho lhyi yikhyoh toh las taiq toh. Heisoeh taiq toh cho ka, Chank chah lyi vpom masyah lai las vkuot, ge dah sangkhyangh dah noq thank vjyuk lyis seqgyo das nyhenshang nghuot. Namoq gas dius dvyuk lyis nghamh kuh las khwank, gohtoeu dvyuk lyis gas ma phauh gis vkuot.

⁷Nvng lyis gohyuk thoq mas hank zau nhang lah? Nvng yoh goeu dvnganh nvng lyis Mangso dyei toh ma nghuot lhyeh? Housoeh lyis namoq xauh kham yoeus dah vyhang ka Mangso jyank masyah yoh dah jyehjuh jyungshuk ma nghuot teh namoq khasoeh yoh moengs lah?

⁸Gvshih namoq chah ya chah zis dvnganh yoh joq goeus ma nghuot lhyeh? Namoq dis goeus lhyeh? Ngamoq yangh hwankti ma bweh shih lyis namoq hwankti jens bweh joq goeus lhyeh? Gis, namoq hwankti jens bweh lyis ngamoq eq namoq yah dvgeh xauh guon das yvmvyah, ngos namoq hwankti bweh das zis o.

⁹Khasoeh ge lyis moeng zan ung lha suh jens xoeuq uhlyis sat zis xauh das bang lyis thang thank mas suh nhang teh, Mangso ka cangsoeu yahge loeuswons bang dah xikkhonh mas chomp yoeuh bas jungh ge, ngamoq lvgyo jens lyis thang thank mas toh, oen ngos nghamh.

¹⁰Khasoeh ge lyis ngamoq gas Khristu gvng mas koh nyeis, namoq gas Khristu mas dvdain dvlom joeui bos bang nghuot. Ngamoq gas yomnhuk, namoq gas yom bos; ngamoq gas dius ngis gyoh las namoq gas nyoqnho ngelang bos bang nghuot.

¹¹Ngamoq gas gvshih jweh shoq yuot, shet, shohchen, shohthungh shohnyhoq shoeuhshih zis xauh las nyeis gus ma bos dvjoqyos masyah dvjoqyos suh nyeis.

¹²Ngamoq nyang dah loq yah tsoeng lha muh tsain zwi zo; ngamoq nhoengh zis xauh lyis shvmanh dyei; shoeuhshih zis xauh lyis ngamoq tsain jhen.

¹³Ngamoq ma phauh gis kuot zis xauh lyis dang chau jis; ngamoq gvshih jweh shoq mungkvn gonh dah mhotkhyot yahge dvkhauyah dah mhotkhyot ngamoq bweh nyeis.

¹⁴Ngos namoq lyis xoqphuh nhang das oen haih cho lhaih zis ma nghuot; ngos jyetdap lo jens lyis teh ngos namoq lyis taiq kyingh.

¹⁵Khasoeh ge lyis, namoq dah Khristan kang dwis cho mha namoq lyis jyauh bang dvmons ko bos laus eq, namoq lyis yaus kat uwus dvyuk dvyoh. Ngos gas hau gausyis dang taiq kyoh khyvlyis namoq Khristu yah dvdain dvlom kang dwis cho mha jweh loh nhang, namoq dah uwus bweh los.

¹⁶Housoeh las, ngah yikhyoh chank nyeis geh oen ngos namoq lyis dung kat.

¹⁷Hauh cho gvng mas, Khristan kang dwis cho mha, ngos jyetdap lomluk dah ngah lo Timothi lyis ngos namoq jyank mas nhang kat. Nyang gas joqyos khanghmuh mas dah phung lhyi ngos jyauh teh, Khristu yah dvdain dvlom kang dwis cho vsaiq dah cho lhyi namoq doms soh shoq taiq kyingh das.

¹⁸Ngos namoq jyank mas ma yoh jweh los das teh mus las, namoq dvyhamh khwank nyeis.

¹⁹Yhensain gyo lyis gas ngos namoq jyank mas lvnyap jweh los das. Housoeh khwank bang dah dang lyis kyingh ma nghuot, nyamoq dah yomsoq lyis eq ngos yoh seq das.

²⁰Khasoeh ge lyis Mangso munghdan gas dang mas bos zis ma nghuot, yomsoq mas dvbos.

²¹Ngos namoq jyank mas lvxuk yah los das lah? Nghuot ya jyetdap las noeuh nhamp dyos yah los das lah? Namoq khah zis zes o goh lah?