Read Achang 1 KORINTHU 6 Bible Online

1 KORINTHU 6 - Achang bible

1 KORINTHU 6

¹Namoq mas dvyuk yuk soe bos yvlyis Mangso dah dius jens thyet dyei zis kham yoeus das gungsthaiq chamus gohnyau bang soetuon soeu jyank mas womh e lah?

²Mangso dah dius jens gas mungkvn lyis soetuon das yvlyis namoq ma seq goh lhyeh? Mungkvn lyis soetuon das bang namoq gas soelo dvtsiq dvthang lhyi khvlangh ma yoh tuon goh lhyeh?

³Ngamoq gas loeuswons bang lyis soetuon das zis namoq ma seq nyeis goh lhyeh? Housoeh las hai nyeisjvng thoq dah cho lhyi soe zes yoh gis tuon ma nghuot lhyeh?

⁴Housoeh soe thuq los lyis phung yah cha ma sen, phung mha toeuh ma bos bang lyis soetuon nhang das lhyeh?

⁵Namoq xoq bas jungh oen ngos haih cho dvtaiq. Khristan vmang vnoeuh nyang changh soe bos lyis namoq mas soe seq tuon dah joeui bos soeu dvyuk eq ma bos lo lhyeh?

⁶Ma lomsjingh bang dah xikkhonh mas yangh Khristan boekyis nyang changh zau kauq goh nyeis nyvng!

⁷Gvshih namoq mas dvyuk yah dvyuk kauq goh cho ka Khristan dah somh cho nghuot goeus. Cu cho lhyi jhen tyamp zis gas zes ma gis lhyeh?

⁸Hauh gungsthaiq namoq Khristan vmang vnoeuh nyang changh tsain mop zo goh.

⁹Lhung bang gas Mangso munghdan dah vso vlho ma xauh kham yoeus das yvlyis namoq ma seq goh lhyeh? Chowhang vwhang goh: yauxi bang eq, silho paiq bang eq, nyi shuot lvng shuot bang eq, yukgis nyang changh zomh bang eq,

¹⁰Khauh bang eq, nyoqnoq obos bang eq, yhei pauhzoe eq, loeusmus bang eq, kyuk tant lhuot zo bang eq, Mangso munghdan vso vlho ma xauh kham yoeus das.

¹¹Namoq dvyhamh gas hou yhangteh bang nghuot khoq; nghuot laus eq namoq gas yah Yhensain Yesu Khristu dah nyings yah eq, yah Mangso dah Dyos yah eq namoq lyis cheihshang lha Mangso mha kyauh toh bang, Mangso xikkhonh mas dan bang ge zis kham yoeus goeus bang bweh goeus.

¹²Namoq mas dvyuk yuk, Ngos gas cha lhyi laus eq kuot das toeuh yoh, ge das. Nghuot laus eq dvnganh gas nah xiklyis gis zis ma nghuot. Ngos dvnganh zis kuot das toeuh yoh oen yoh taiq laus eq, chah cho gvng mas eq ngos lyis hauh jons duot das zis ngos toeuh dyei das zis ma nghuot.

¹³Zonoms gas womdau xiklyis, womdau gas zonoms xiklyis nghuot ge namoq taiq das. Houka jus, laus eq Mangso ka hau aiq ja lyis yah dvyih lhoq thyoq das. Gungs gas yauxi das xiklyis ma nghuot, Yhensain lhyi phuqsoe das xiklyis dvnghuot. Yhensain eq gungs xiklyis chah zis dyei nyeis.

¹⁴Mangso ka nyah yomsoq yah Yhensain lhyi dwis toq nhang goeus las, yang lyis eq nyah yomsoq yah dwis toq nhang das.

¹⁵Namoq dah gungs gas Khristu dah gungsdoeus nghuot yvlyis namoq ma seq goh lhyeh? Housoeh nghuot lyis gas Khristu dah gungsdoeus lyis ngos kangh tyamp las nghe nyhiq dah gungsdoeus kuot das lhyeh? Housoeh ma gis bweh.

¹⁶Nghe nyhiq yah tsoq toh soeu ka nyang yah gungs dvgungs kyingh dvnghuot nyeis yvlyis namoq ma seq goh lhyeh? Lhaihtoh dang mas, Nyah aiq yuk gas gungs shoh dvkoeuq kyingh bweh das ge taiq toh.

¹⁷Nghuot laus eq Yhensain mha tsoq soeu ka Dyos khyvlyis gungs dvkoeuq kyingh dvnghuot.

¹⁸Yauxi cho lhyi jhank geh. Dius yah kuot dah yaunos dvnganh gas vsainnyang gungs dah gis cho lhyi ma los yoh zangh. Nghuot laus eq yauxi cho mha yaunos yoh soeu ka nyah gungs lyis nyang shuot nyeis.

¹⁹Namoq dah gungs gas Mangso namoq lyis dyei toh las namoq mas bos Gyingshang Dyos dah yhenmuh nghuot yvlyis namoq ma seq goh lhyeh? Namoq gas namoq nyang gungs lyis yoh sain zis ma nghuot, Yhensain yah dvsain toh.

²⁰Mangso ka namoq lyis phauh lang yah wis toh goeus yvmvyah namoq dah gungs lyis Mangso dah phunk nyhenshang yhung geh.