Read Achang 1 KORINTHU 7 Bible Online

1 KORINTHU 7 - Achang bible

1 KORINTHU 7

¹Gvshih namoq lyis lhaih kat cho yah sen lha taiq das. Vbusbih gas nyi ma yoeus yoh nyeis lyis zes gis.

²Nghuot laus eq yauxi cho nyo los yvlyis jhank das xiklyis vbusbih khanghmuh nyang yuk nyang toeu yhensain nyhiq yoh gis, vmesbih eq nyang yuk nyang toeu yhensain phoq yoh gis.

³Yhensain phoq gas lyi yah dvyhangteh yhensain nyhiq yah zomhgoh bas jungh. Yhensain nyhiq eq houyah dvyhangteh yhensain phoq yah zomhgoh las dvyuk yah dvyuk dah chah cho lhyi tyink goh bas jungh.

⁴Yhensain nyhiq gas vsainnyang gungs lyis ma yoh sain, yhensain phoq dvsain toh. Yhensain phoq eq vsainnyang gungs lyis ma yoh sain, yhensain nyhiq dvsain toh.

⁵Namoq ma yoh zain las Satan yah shiwu zis ma xauh bas jungh, namoq xamxonh zis yah shvmanh dung shishenh masyah lai las namoq zomhgoh cho mha ma jhank noh: hauh shishenh lai goeus ya dvgeh doms nyeis geh.

⁶Ngos heisoeh taiq zis gas vmingh dyei khyvlyis ma nghuot, namoq khyamhsa das khyvlyis cho shet zis dvnghuot.

⁷Jyoengh oen lyis dius dvnganhmoq ngos teh kuot nhang mes: nghuot laus eq yuk khanghmuh gas Mangso jyank masyah vsainnyang dah jyehjuh jyungshuk tsain xauh yoeus: dius dvyuk gas dvja, gohtoeu dvyuk eq gohtoeu dvja tsain xauh yoeus.

⁸Nyiyoeus yhen ma loh shih bang yahge chauhmuh jens lyis ngos taiq zis gas, ngos teh nyeis loh lyis namoq xiklyis gis das.

⁹Nghuot laus eq namoq ehnyet lyis ma yoh zain lyis gas nyiyoeus yhenloh bas jungh: khasoeh ge lyis ngeh gywes nyeis das thoq lyis gas nyiyoeus yhenloh zis zes gis.

¹⁰Nyiyoeus yhenloh goeus bang lyis ngos taiq toh bah, houka ngos taiq zis ma nghuot, yhensain taiq zis gas, yhensain nyhiq gas yhensain phoq yah ma gang bas jungh.

¹¹Gang goh lyis gas, nyang yhen ma doms loh goeus jungh, nghuot ya vkhang dah yhensain phoq yah mehoq tamp las doms dap goh bas jungh. Yhensain phoq eq yhensain nyhiq lyis ma tyamp bas jungh.

¹²Yhensain taiq toh dang ma nghuot laus eq, gohyhamh bang lyis ngos taiq zis gas, Khristan yukgis dvyuk gas ma lomsjingh dah yhensain nyhiq yoh laus eq, hauh vmesbih nyang yah nyeis mes lyis gas nyang lyis ma kangh tyamp bas jungh.

¹³Houyah dvyhangteh Khristan vmesbih dvyuk ma lomsjingh dah yhensain phoq yoh laus eq hauh vbusbih nyang yah dvgeh nyeis mes lyis gas, hauh vbusbih lyis ma kangh tyamp bas jungh.

¹⁴Khasoeh ge lyis, ma lomsjingh dah yhensain phoq gas lomsjingh dah yhensain nyhiq gvng mas, ma lomsjingh dah yhensain nyhiq eq lomsjingh dah yhensain phoq gvng mas cheihshang dyei zis xauh las Mangso lhom yoeus mon bang yoh bweh los. Housoeh ma nghuot lyis gas namoq dah lo jens ma shang das. Gvshih gas nyamoq Mangso lhom yoeus mon bang bweh los.

¹⁵Nghuot laus eq hau ma lomsjingh dah yhensain phoq, nghuot ya yhensain nyhiq gas gang loh mes lyis gang loh goeus jungh. Housoeh teh cho mha Khristan nghuot dah yhensain phoq, nghuot ya yhensain nyhiq gas khyot khyang yoh kuot las, Mangso ka namoq lyis nyenstap zis yah nyeis das xiklyis khi toh.

¹⁶Khristan vmesbih eh, nvng nah yhensain phoq lyis yoh khyuot yoeus das ma nghuot oen khasoeh yoh taiq lah? Houyah dvyhangteh Khristan vbusbih eh, nvng nah yhensain nyhiq lyis yoh khyuot yoeus das zis ma nghuot oen khasoeh yoh taiq lah?

¹⁷Yuk khanghmuh gas Yhensain nyang lyis gvm dyei toh dah jyehjuh jyungshuk yah dvyhangteh, nyang lyis lui yoeus uhlyis nghuot joq zis yah dvyhangteh kang dwis nyeis bas jungh. Haih zis gas ngos phung khanghmuh lyis jyauh cho nghuot.

¹⁸Vthyoh tyomh soeu ka Mangso khi zis xauh lyis, nyang vthyoh tyomh cho ma tyamp goeus jungh. Vthyoh ma tyomh soeu khi zis xauh lyis nyang vthyoh ma tyomh goeus jungh.

¹⁹Dius dvyuk vthyoh tyomh ma tyomh zis gas cha ma nghuot, Mangso tyingtoh dang lyis chank das zis kyingh vgungs nghuot.

²⁰Yuk khanghmuh gas Mangso khi zis xauh uhlyis nghuot joq zis yah dvyhangteh housoeh vgus nghuot joq bas jungh.

²¹Khi zis xauh uhlyis jons nghuot soeu ka vchiq, nghuot laus eq jons duot mhayah yoh luiq das toeuh yoh das nghuot lyis gas hauh toeuh lyis yoeus aq.

²²Khasoeh ge lyis jons nghuot nyeis uhlyis, Yhensain yah khi zis xauh soeu ka Yhensain lhuiq zis xauh soeu nghuot. Houyah dvyhangteh, luiq soeu nghuot las Khristu yah khi zis xauh soeu ka nyah jons nghuot.

²³Namoq lyis Mangso ka phauh lang gyoh las wis toh goeus yvmvyah dius dah jons vduot goh.

²⁴Boekyis eh, dvyuk dvyuk gas khi zis xauh yoq lyis yah dvyhangteh, Mangso yah zomh las kang tsoq dwis nyeis goh.

²⁵Gvshih namoq maussauh yah nyei los, phoengh ma wvng bang cho yah sen lha, Yhensain tyingtoh dang ngos ma yoh, nghuot laus eq Yhensain dah nhaiqnyen jyehjuh gvng mas lomluk soeu dvyuk khyvlyis ngos yoh nghamh suon yoeuh cho lhyi taiq kat.

²⁶Gvshih yang xauh nyeis dah yaukyenh cho yah dyingh dah zaih gvng mas vbusbih dvyuk gas nyang housoeh nghuot joq zis yah dvyhangteh nyeis lyis zes gis oen ngos nghamh.

²⁷Nvng yhensain nyhiq yoh goeus lah? Gang goh das cho vxo lo; nyi ma yoeus shih soeu nghuot lyis gas yhensain nyhiq vxo lo.

²⁸Nghuot laus eq nvng nyihwank lyis, hauh zis yaunos kuot zis ma nghuot; lonyi eq phoengh wvng lyis, nyang yaunos kuot zis ma nghuot; nghuot laus eq nyi yoeus yhen loh bang nyeih yau nyeih thungh phuh xauh kham nyeis dah shanghsenh cho lhyi jhank nhang mes yvmvyah ngos heisoeh taiq zis nghuot.

²⁹Boekyis eh, ngos taiq mes zis gas heisoeh nghuot. Shishenh nyoshoq ma bos lo: gvshih masyah nyiyoeus goeus bang nyi ma yoeus bang teh nyeis das.

³⁰Ngaus bang gas ma kuk bang teh, yis bang gas ma pyo bang teh, hu wis bang gas nyamoq dah hu lhyi ma sain bang teh;

³¹Mungkvn zisyos yhung nyeis bang gas zisyos sain toh las ma yhung bang teh nghuot los bas jungh: khasoeh ge lyis hai gvshih nyvng nyeis dah mungkvn gas nyangh nyangh joq lo das zis ma nghuot.

³²Ngos gas namoq mas chiqjyen cho ma bos das xiklyis omes nyeis. Yhensain nyhiq ma yoeus soeu ka, hau Yhensain dah muh mas nhaiq wvng zis yah chiq nyeis las Yhensain o khyvlyis kuot mes nyeis.

³³Nghuot laus eq nyiyoeus soeu ka, nyah yhensain nyhiq lyis lhoq pyo dyei mes las mungkvn vyhang lhyi chiq nyeis.

³⁴Housoeh las nyang gas ehnyet aiq shot lang goh nyeis. Yhen ma loh soeu, nghuot ya lonyi gyingh gas nyah gungs yahge dyos gyingshang bas jungh Yhensain lhyi kyauh mes yvmvyah, Yhensain dah muh mas nhaiq wvng chiq nyeis. Nghuot laus eq yhenloh goeus dah vmesbih gas nyah yhensain phoq lyis lhoq pyo mes las mungkvn vyhang lhyi chiq nyeis.

³⁵Ngos heisoeh taiq zis gas namoq lyis pangh mes yvmvyah nghuot. Namoq lyis lyi yah zwi zains toh das xiklyis ma nghuot. Namoq lyis jyoeng cho, phi cho jus khyvlyis chank kuot nhang mes thoq lyis magoh Yhensain dah muh mas nyhet toh cho ma bos vlhomuh yoh phuqsoe nhang mes las taiq zis nghuot.

³⁶Kwank toh thang lhyi nyihwank cho ma kuot das ge nghamh thyet dah vzomh yah sen lha: vbusbih gas Vmesbih thoq mas nyang kuot cho ma doeus ge nghamh nghuot nghuot, nyah ehnyet ma nyens, ma yoh zain las nyihwank chah ge nghamh lyis, nyang nghamh o zis yah dvyhangteh nyah aiq yuk nyihwank cho kuot bas jungh. Nyang yaunos kuot zis ma nghuot.

³⁷Nghuot laus eq vbusbih gas nyi ma yoeus das ge nghamh thyet zis yah, nyah ehnyet lyis eq vlhomuh yoh joeu las, hauh vmesbih lyis nyi ma hwank nyeis lyis nyang gis khyvlyis kuot goeus.

³⁸Housoeh vmesbih lyis nyihwank soeu ka gis khyvlyis kuot nyeis. Nghuot laus eq hauh vmesbih lyis ma yoeus yoeus nyeis soeu ka zes gis zis kuot goeus.

³⁹Yhenloh goeus dah vmesbih gas nyah yhensain phoq dwis nyeis dvchank nyang yah twih goh toh. Nghuot laus eq yhensain phoq shei goeus ya luiq goeus las nyang hank jyank mas loh mes lyis eq yoh loh goeus. Nghuot laus eq Khristan yukgis yah phoengh wvng chah.

⁴⁰Nghuot laus eq hauh vmesbih gas yhen ma doms loh lo yoh nyeis lyis gas nyang zes pyo zis yah ngelhoq cho nghuot das. Heika ngos nghamh cho nghuot. Ngos mas eq Mangso dah Dyos bos zis nghuot oen nghamh.