Read Achang 2 KORINTHU 10 Bible Online

2 KORINTHU 10 - Achang bible

2 KORINTHU 10

¹Namoq xikkhonh mas ehnyet noeuh nhamp zis yah ehnyet nyhen mha khyoq cho chixoeuq las namoq yah we loh lyis womh ehnyet chixoeuq nyeis soeu nghuot, ge loeusmus zis xauh soeu ngos Paulo nyang Khristu dah nhaiqnyen ehnyet yahge noeuh nhamp ehnyet yah namoq lyis dung kat.

²Khristu dah noeuh nhamp, ehnyet nyhen mha gyoh yvlyis byi las ngos namoq jyank jweh los uhlyis dang than jis shoq ma bweh das xiklyis khyoeuq kat. Khasoeh ge lyis ngamoq lyis mungkvn dah obos khyvlyis kuot las kang dwis bang nghuot, ge taiq bang lyis ngos than than yoh taiq.

³Ngamoq gas mungkvn mas nyeis zis jyoeng laus eq mungkvn ehnyet khyvlyis jes tsain zan nyeis zis ma nghuot.

⁴Ngamoq jeszan yvmas yhung dah kyonhkhyi ka mungkvn dius jens chi dah kyonhkhyi ma nghuot. Mangso dah yomsoq yah dyingh dah kyonhkhyi chi lha goeng dah thoenkgus jesdvp jens lyis thyoqpi tyamp. Ngamoq gas ma jus dah phyen-goh dang lyis thyoq tyamp.

⁵Ngamoq gas Mangso lhyi seq cho joeui lhyi khwank zis yah pahkai dah muh dvnganh yvlyis thyoqpi tyamp. Ngamoq gas dius dah nghamh cho dvnganh lyis nyhik lhunk tyamp las Khristu dah domsyos gyo nhang.

⁶Namoq gas ngamoq dah domsyos top gyo las dang jings cho yoh seq goeus ya, ngamoq gas dang ma jings dah muh cha lhyi laus eq yobos dyei das zis cicont nghuot.

⁷Namoq gas chah cho mha eq thoqlosbaus lyis dvtsain yoeuh nyeis. Ngos gas Khristu yah sen, ge vsainnyang gungs lyis nghamh soeu dvyuk yuk bos lah? Bos lyis gas nyah gungs lyis dvlhain doms nghamh suon yoeuh bas jungh. Khasoeh ge lyis nyang gas Khristu shot pheh dah dius nghuot zis yah dvyhangteh, ngamoq eq Khristu shot pheh dah dius nghuot.

⁸Khasoeh ge lyis ngos gas Mangso dyei dah toeuh yah sen lha dvmsunk zangh khwank laus eq ma xoq, haih toeuh gas namoq lyis thyoqpi das xiklyis ma nghuot, toeutoq das xiklyis dvnghuot.

⁹Housoeh las ngos huon maussauh yah namoq lyis kyuk mes khyvlyis vjyuk ma mes phui nhang.

¹⁰Khasoeh ge lyis dius dvyhamh gas, Paulo dah huon maussauh gas dvmsunk zis yahge kank bos nghuot laus eq nyah gungs ngamoq yah nyeis lyis nyang gas yomnhuk, nyah dang eq cha vkyuh ma bos, tsain ge.

¹¹Housoeh ge soeu seq toh das cho ka, ngamoq gas we yvmas nyeis uhlyis maussauh lhaih kat zis yah dvyhangteh dius gungs nyang namoq jyank mas jweh los uhlyis eq houyah dvyhangteh ngamoq kuot das.

¹²Jyoengh oen lhyi vsainnyang gungs lyis chunghzo bang mas bos suon tap las, ngamoq gungs lyis nyamoq yah ma womh byi. Nyamoq gas nyamoq kha iq nyhang zis seq das xiklyis nyamoq nyang vkeq thyet toh zo. Housoeh teh bang gas kha iq koh lah!

¹³Ngamoq gas khwank vvng thoq lyis lai las khwank das zis ma nghuot. Namoq mas ngamoq zwi khank dah muh yah dvgeh, ngamoq zwi khank das xiklyis Mangso nyang toeuq toh dyei dah muhzoh vkhau mha ngamoq dvyoh khwank.

¹⁴Namoq gas Mangso ngamoq xiklyis toeuq toh dyei muhzoh khau mha bos joq yvmvyah ngamoq gas Khristu dah gausyis loeus namoq jyank mas chi los uhlyis muhzoh wons wuq das gvm toh dah vkyo lhyweq khyvlyis ma kuot.

¹⁵Housoeh yvmvyah ngamoq gas Mangso ngamoq lyis toeuq toh dyei dah muhzoh mas lai las, gohyuk dah muhzoh yah sen yvmas ngamoq moengs zis ma nghuot. Housoeh kuot das gungsthaiq khanhamp eq toeuq toh dyei dah muhzoh khau mha namoq dah lomsjingh cho je los das zis yahge namoq mas muhzoh zes yoh kuot das yvlyis ngamoq nghamhloms.

¹⁶Hauh thang lhyi ngamoq gas namoq dah mau nghe pheh lai las gohtoeu munghdan mas Yhensain Yesu dah cho gausyis dang loh yoh taiq kyoh das. Tsai gohyuk dah joqyos, cicont kuot toh dah muhzoh cho mha moengs khwank chah das zis ma nghuot.

¹⁷Nghuot laus eq lhaihtoh dang mas, Khwank mes soeu ka, Yhensain kuot dah muhzoh mas khwank nyeis bas jungh, ge taiq toh.

¹⁸Khasoeh ge lyis, Jyoeng dah nyoqnho ngelang dyei zis xauh soeu ka vsainnyang gungs lyis vsainnyang chunghzo soeu ma nghuot. Mangso chungh zis xauh soeu dvnghuot.