Read Achang 2 KORINTHU 11 Bible Online

2 KORINTHU 11 - Achang bible

2 KORINTHU 11

¹Namoq ngos dvtsiq koh dah yobos lhyi jhen dyei shih das yvlyis ngos o. Jyoengh jenh jhen dyei shih geh.

²Mangso ka namoq lyis noh ehnyet bos zis yah dvyhangteh ngos eq namoq lyis noh ehnyet bos. Namoq gas Khristu nyang yah kyingh phoengh wvng das xiklyis ngos dangthoengh dyei toh goeus lonyi gyingh yah doeusgoh.

³Ewa gas lhangnyis dah joeui bos dah yik cho yah mhuih khwangh zis xauh teh namoq eq namoq dah nghamh cho thyoq tyamp zis xauh las namoq dah dyinghjet dah lhoqshang ehnyet yah Khristu lyis loms las chank suh dah ehnyet dyoq das yvlyis ngos chiqh.

⁴Khasoeh ge lyis namoq jyank mas dius dvyuk yuk jweh los las, ngamoq ma taiq kyoh ku dah gohtoeu Yesu dvyuk dah cho taiq kyoh lyis namoq gaus gaus yis yis tsain lhom yoeus. Tsai ngamoq jyank masyah xauh lhom yoeus toh dah Dyos yahge gausyis dang yah kyoq kyoq shaih dah dyos yahge Gausyis Dang lyis tsain lhom yoeus nyeis nyvng!

⁵Ngos gas hau namoq kuh thank lvgyo jens ge lui bang mas dvtsiq eq ngis soeu ma nghuot oen ngos nghamh.

⁶Ngos gas taiq kyoh yvmas ma duot soeu nghuot laus eq, jyoengh seq cho mha ka housoeh ma nghuot. Ngamoq gas shishenh khanghmuh lyis bweh dah cho jeis dvnganh mas haih cho namoq lyis dede seq nhang goeus.

⁷Namoq chunghtoq zis xauh bas jungh oen, ngos ngah gungs o mha gyoh las, Mangso dah gausyis dang namoq lyis phauh ma sang taiq kyoh goeus. Housoeh kuot zis gas ngos mas shuot cho nghuot lhyeh?

⁸Ngos namoq mas muh wons nyeis dah shishenh gyo lyis, gohtoeu phung jens ngos lyis thuk goeus. Houka namoq lyis pangh thuk das xiklyis gohphung mhayah ngos khyanktau kuot zis nghuot oen lo goh.

⁹Hauh thoq lyis ngos namoq yah dvgeh nyeis shishenh lyis ngwis xing chah los lyis pangh das zis ngos namoq lyis ma thauqkhyi. Makedoni mau masyah jweh los dah boekyis gas ngos chah ya chah zis chi los dyei. Lai loh goeus shishenh lyis ngos namoq lyis yvwons ma lyei nhang teh jweh los das shishenh lyis eq yvwons ma lyei nhang das.

¹⁰Khristu dah jyoeng dang ngos mas bos zis yah dvyhangteh, hai ngos khwank cho lhyi Akhaia mauxom mha hank eq yoh tomp das zis ma nghuot, oen dangthoengh dyei.

¹¹Ngos heisoeh taiq zis gas ngos namoq lyis ma jyetdap las nghuot lhyeh? Ngos namoq lyis jyetdap zis gas Mangso seq.

¹²Ngamoq kuot zis yah dvyhangteh nyamoq eq kuot, ge gohtoeu lvgyo jens taiq khwank das toeuh ma yoh bas jungh, gvshih ngos kuot vgus tsoq kuot nyeis shih das.

¹³Hauh bang gas jyoeng dah lvgyo jens ma nghuot. Nyamoq gas Khristu dah lvgyo gyingh jens teh doeus shoq, yeis khuk las mhuih dah muh zwi bang nghuot.

¹⁴Heisoeh kuot zis gas mauh chank ma bos: Satan yangh bvng dah loeuswons soeu teh dah yeis yoh khuk nyeis.

¹⁵Housoeh las nyah jyeidwis jens nyang eq dan cho lhyi taiq kyoh kanghjyoeng kat dah jyeidwis jens yah doeus shoq yeis khuk nyeis zis gas mau phoh zis ma nghuot. Thang thank lyis nyamoq chank kuot zis yah dvyhangteh xauh kham das.

¹⁶Ngos puk taiq mes zis gas, ngos lyis koh soeu nghuot oen lha hank eq ma gis nghamh. Namoq housoeh nghamh lyis eq ngos lyis koh soeu lhyi teh khvlangh lhom yoeus geh, housoeh ngos eq khwank dang dvtsiq taiq das.

¹⁷Jyoengh oen lhyi, gvshih ngos taiq hwank cho ka Mangso taiq nhang mes cho ma nghuot. Hai taiq khwank cho mha ngos gas jyoengh nyang koh soeu teh taiq nyeis.

¹⁸Nghuot laus eq dius nyoshoq dius dah kank bos cho mha khwank nyeis yvmvyah, ngos eq khwank das.

¹⁹Namoq nyang joeui nyo bos las koh bang lyis gausyis zis yah tsain jhen nyeis nyvng!

²⁰Namoq gas namoq lyis vmingh dyei bang, namoq thoq mas toeuh yoeus bang, twih khyoq las nyhik yoeus bang, dius ngis yoeuh khyoq bang, bvlot tyuk dyei bang hank lyis laus eq jhen nyeis.

²¹Ngamoq gas housoeh teh cho kuot das xiklyis yomnhuk cho rhen das xiklyis yangh xoq. Nghuot laus eq dius dvyuk yuk dvcho cho mha khwank lyis gas, ngos eq koh soeu teh womh taiq.

²²Israel jens Hebre dius nghuot lhyeh? Ngos eq nghuot. Nyamoq Abraham dah vnyau vshih nghuot lhyeh? Ngos eq nghuot.

²³Nyamoq Khristu dah jyeidwis jens nghuot lhyeh? Koh soeu dah dang teh gas nghuot laus eq ngos gas nyamoq thoq lyis zes gis dah jyeidwis nghuot. Ngos nyamoq thoq lyis muh zes zwi khank. Nyamoq thoq lyis zes las nyoshoq lhain thung gyoh. Nyamoq thoq lyis zes las wuseh xuk zis xauh. Ngos shei nos cho nyoshoq lhain zes xauh.

²⁴Yuda jens ngos lyis dvlhain lhyi somhci gau dvm dvm mulas oeng lhain lyuk zis xauh.

²⁵Roma jens bat zis somh lhain xauh. Lukzains yah doeuh zis dvlhain, jeis sangpho dyoq yvmas somh lhain bos. Dvlhain ka nvmukdra mas 24 nayi dang yenh.

²⁶Gyung nyoshoq lhain suh yvmas jeis je los las xauh dah gudwvng zis, khyanktau xauh dah gudwvng zis, ngah Yuda dius jens gvng mas gudwvng zis, gohnyau bang gvng mas gudwvng zis, wukhau mha xauh dah gudwvng zis, mhanhdyvp mas xauh dah gudwvng zis, thomh mas xauh dah gudwvng zis, hwah dah boekyis gvng mas gudwvng zis xauh lai loh goeus.

²⁷Muhzwi khank chah cho, ma xauh yhet zis nyoshoq lhain, zos yuot jeis shet, zonoms thank zis nyoshoq lhain, khau gus ma yoh zis yahge shohchen bweh zis vjangh xauh nyeis.

²⁸Hau thoq lyis phung dvnganh dah cho chiq zis gas nyeih yau nyeih ngos lyis nhiq zaiq toh.

²⁹Yomnhuk soeu dvyuk yuk bos lyis ngos yomnhuk yvlyis khamzo nyeis. Dvyuk yuk yaunos mas lains loh lyis ngos ehnyet nyo nyeis.

³⁰Ngos khwank chank bos lyis gas, ngos kha iq yomnhuk oen cho mha dvkhwank das.

³¹Ngos ma hwah zis gas Yhensain Yesu dah Uwus, Mangso seq. Hau Yhensain Mangso dah nyings gas vcaiq vto ngelhoq bas jungh.

³²Damasku wus mas ngos nyeis uhlyis hwankti Areta o mha dah mungh zau gas ngos lyis nyhik das nyhenshang wus khomh jens mas zungh bang tsain toh.

³³Nghuot laus eq phung dius jens ngos lyis mhanghkhoq mas kat las wusciank masyah xuot khyoq dyei yvmvyah nyah loq masyah yoh luiq loh.