Read Achang 2 KORINTHU 12 Bible Online

2 KORINTHU 12 - Achang bible

2 KORINTHU 12

¹Khwank cho vkyuh ma bos laus eq hau Yhensain jyank masyah nyoqnyvng yah chixoeuq cho yah sen lha ngos khwank dang taiq shih das.

²Khristan phoq dvyuk gas lai loh goeus dvci nyei zvn yoq lyis nyhang thank maukhung somh tsank pheh shwih dang doq loh zis xauh cho ngos seq. Housoeh shwih dang loh zis gas gungs bos lah, ma bos lah, zis gas ngos ma seq, Mangso dvseq.

³Ngos doms taiq shih bah, hauh dius yuk lyis Paradisu pheh shwih dang loh zis ngos seq. Housoeh hauh zis gas jyoengh bweh lah? Yhetmoq nyoqnyvng nghuot lah, zis Mangso dvseq.

⁴Nyang gas houmha dius dah dangkhonh yah ma gis taiq, dius dah nhuot yah taiq das toeuh ma bos dah dang yah xauhgyo yoeus.

⁵Housoeh las ngos hauh soeu dah cho khwank das. Nghuot laus eq ngvnyang kha iq yomnhuk nyeis cho jens mas lai las ngah cho ngos ma khwank das.

⁶Ngos khwank mes laus eq ngos koh das zis ma nghuot. Khasoeh ge lyis ngos gas jyoeng zis dvtaiq das. Nghuot laus eq ngos ma khwank das: khasoeh ge lyis namoq hank eq ngos kuot cho xauh nyvng, ngos taiq dang lyis xauhgyo yvmvyah ngos lyis seq masyah jes las ngos lyis nghamh kuh cho ma mes bweh nhang.

⁷Ngos nyvng dah mauhphoh nyoqnyvng gvng mas ngos mas nghamh kuh las khwank cho ma bos bas jungh ge, ngah gungsdom mas zoeu zoeu cho dvkoeuq ngos kham zo nyeis. Hau nos cho ka Satan yah nhang kat dah lvgyo teh ngos lyis bat las ngos khwank dah zwis lyis khyauh tyamp dyei nyeis.

⁸Hau nos yvlyis yoeus tyamp das xiklyis ngos gas hauh Yhensain lhyi shvmanh somh lhain dung.

⁹Nghuot laus eq Mangso ka, Ngah jyehjuh gas nah xiklyis geh joq: khasoeh ge lyis nvng yomnhuk uhlyis ngah yomsoq gas kuh thank nghuot joq, ge nyang ngos lyis taiq. Housoeh yvmvyah Khristu dah yomsoq gas ngos lyis khomp gos las khau nges nhang nyeis cho ehnyet mas xauh kham zo bas jungh, ngah yomnhuk cho gvng mas ngos svsoh pyo nyeis.

¹⁰Housoeh las ngos gas Khristu gvng mas kham dah yomnhuk cho, jwangh cho, shanghsenh cho, shoeuhshih zis xauh cho yahge yaukyenh cho jens gvng mas gausyis nhaiqtap nyeis. Khasoeh ge lyis ngos yomnhuk uhlyis yombos nyeis.

¹¹Ngos gas koh soeu teh kuot nyeis. Namoq ngos lyis housoeh kuot nhang goeus. Namoq gas ngos lyis taiq toenk cho shet vvng bang nghuot. Khasoeh ge lyis ngos gas cha eq ma nghuot soeu bweh nyeis lyis yangh, namoq lhyenwhei toh dah lvgyo jens o mha dvtsiq eq ma gyoh.

¹²Ngos gas lvgyo dvyuk bweh nyeis cho kanghjyoeng chixoeuq das xiklyis yomsoq muh yahge mauh loqmuh nyoshoq lyis namoq mas kuhxing ehnyet yah kuot xoeuq goeus.

¹³Namoq masyah pangh thuk ngwis ma yoeus cho mhayah lai las ngos namoq lyis goh phung jens yah vkant nyhen khyvlyis kuot ku lah? Housoeh Lyi ma chi cho zangh kuot yobos lyis jenh khyuot dyei geh.

¹⁴Gvshih ngos namoq jyank mas somh vlhain kwang los das zis cicont nghuot goeus las, ngos namoq lyis cha ma sang das: khasoeh ge lyis, ngos namoq dah ngwis lyis o zis ma nghuot, namoq lyis dv o. Jyoengh oen lhyi lo jens gas ungwes uwus xiklyis zisyos yung toh dyei ma vvng, ungwes uwus moq nyang nyamoq dah lo jens xiklyis dvyung toh vvng.

¹⁵Ngos namoq lyis pangh das nyhenshang oen lhyi ngos yoh ya yoh zis dvnganh yahge ngah gungs lyis yangh gausyis zis yah yhung das zis ngwis. Ngos namoq lyis svsoh jyetdap yvmvyah namoq ngos lyis dvtsiq dvjyetdap das lhyeh?

¹⁶Housoeh las ngos namoq lyis yvwons lyei nhang zis ma nghuot cho namoq xamxonh das. Nghuot laus eq ngos gas namoq lyis joeui yah mhuih khyvlyis twih khyoq yoeus ge dvyuk yuk taiq das.

¹⁷Ngos khasoeh mhuih zo lai loh goeus lah? Ngos namoq jyank mas nhang dah lvgyo jens mas dvyuk yuk masyah toeuh yoeus las namoq dah vyhang lhyi thyet zo nyeis lah?

¹⁸Ngos gas Titu lyis namoq jyank mas los das xiklyis dung las nhang kat. Gohtoeu Khristan vmang vnoeuh dvyuk eq nyang yah dvgeh chank los. Titu gas namoq mas toeuh yoeus las vyhang thyet zo nyeis oen das lah? Nyang yahge ngos gas nghamh zis yahge kuot zis dvcho dvnghuot.

¹⁹Ngamoq gas namoq xikkhonh mas vjangh yah vsainnyang yobos ma bos oen gungs gos dang tungh taiq bang nghuot ge nghamh mvbeh? Housoeh ma nghuot! Khristu taiq nhang mes zis yah dvyhangteh Mangso xikkhonh mas ngamoq taiq. Hauh thoq lyis jyetdap bang eh, ngamoq kuot ya kuot zis gas namoq lyis pangh das xiklyis dvkuot.

²⁰Ngos namoq jyank mas jweh lyis, namoq gas ngos o khyvlyis, ngos nyvng mes khyvlyis ma nghuot langh, ngos mas eq namoq o khyvlyis namoq nyvng mes khyvlyis ma nghuot mus das yvlyis chiqh. Tsai ngos gas namoq mas dyoqgoh cho, noh cho, nhaiqlom dyis cho, tyam cho, jwangh goh cho, goes sang goh, khwank, hoeu cho bweh nyeis yvlyis nyvng das zis chiqh.

²¹Ngos namoq jyank mas doms jweh lyis, Mangso ka ngos lyis namoq xikkhonh mas khyoq tyamp zis xauh nhang das yvlyis chiqh. Gvshih jweh shoq nhaiqlom ma thaiq wotwu yoq, nyetnau las yauxi cho chank nyeis bang nyoshoq gvng mas ngos ngausdyeis gyoh das yvlyis chiqh.