Read Achang 2 KORINTHU 13 Bible Online

2 KORINTHU 13 - Achang bible

2 KORINTHU 13

¹Ngos namoq jyank mas somh vlhain jweh los das. Lhaihtoh dang mas taiq vgus, zau kauq cho dvja ja bos lyis kanghjyoeng aiq yuk somh yuk dah dang yah doengs nhang chah.

²Xikpheh yaunos kuot lai loh goeus bang yahge gohtoeu dvnganhmoq lyis ngos taiq mes. Hauh yvlyis xikpheh ngos namoq jyank mas aiq vlhain jweh los uhlyis taiq toh zis yah dvyhangteh, gvshih namoq yah we nyeis shishenh lyis eq dvlhain doms taiq das. Houka thang lhain ngos doms jweh los uhlyis namoq hank eq soetuon yobos dyei masyah ma yoh luiq das.

³Khristu gas ngos mas dang taiq nyeis cho kanghjyoeng lhyi namoq o nyhoq nyvng das. Khristu gas namoq yah tsoq goh las muh zwi uhlyis nyang yomnhuk zis ma nghuot. Hauh gungsthaiq nyah yomsoq lyis namoq mas chixoeuq das.

⁴Khasoeh ge lyis nyang gas yomnhuk dah vkant mas tapzains mas taplhangh sat zis xauh laus eq Mangso dah yomsoq yah dwis nyeis. Yang eq Khristu yah dvdain dvlom duot gvng mas yomnhuk nyeis. Nghuot laus eq namoq yah tsoq goh cho mha yang gas Khristu yah dvgeh dwis nyeis yvmvyah Mangso dah yomsoq lyis xauh gvm yoeus das.

⁵Namoq gas lomsjingh yvmas kang dwis bang nghuot zis yoh seq das nyhenshang namoq nyang gungs nyang suon yoeuh soetuon zo geh. Namoq shank shoq somh loh bang ma nghuot lyis gas, Khristu Yesu namoq mas nyeis cho lhyi jyoengh yoh seq das.

⁶Ngamoq gas somh loh bang ma nghuot yvlyis namoq seq das oen loms.

⁷Namoq shuot cho lhyi ma kuot bas jungh oen ngamoq Mangso jyank mas shvmanh dung. Houka ngamoq shiwu yvlyis ung cho chixoeuq das nyhenshang ma nghuot; ngamoq gas somh loh bang teh nghuot laus eq namoq jyoeng yvlyis yoh kuot das xiklyis dvdung dyei nyeis.

⁸Khasoeh ge lyis ngamoq gas jyoeng cho lhyi tyixo zis cha eq ma yoh kuot, jyoeng cho mha dvtsain yoh yap.

⁹Housoeh las ngamoq yomnhuk las namoq yombos nyeis lyis ngamoq gauslaus. Housoeh namoq dyinghjet bang bweh los bas jungh eq shvmanh dung nyeis.

¹⁰Namoq yah we joq lyis ngos haih maussauh lhaih zis gas, ngos namoq jyank mas jweh lyis Yhensain ngos lyis dyei toh dah toeuh lyis mvgon ma yhung tyamp das xiklyis nghuot. Hauh toeuh gas namoq lyis thyoqpi das xiklyis ma nghuot, jebais los nhang das xiklyis dvnghuot.

¹¹Ngah boekyis eh, gvshih ngamoq jeshuh kat. Namoq dvnganhmoq yoh dyinghjet shoq tsoq las yomkat nyeis geh. Ngos dung dang lyis gyo yoeus las nyang changh nyang xamxonh zis yah nyenstap khyvlyis nyeis geh. Jyetdap zis yahge nyenstap vsain Mangso ka namoq yah dvgeh nyeis das.

¹²Namoq nyang changh vmang vnoeuh dah bvlot tanh zis yah jeshuh goh geh. Mangso dah dius jens dvnganh namoq lyis jeshuh kat.

¹³Yhensain Yesu Khristu dah jyehjuh, Mangso dah jyetdap zis yahge Gyingshang Dyos dah zomh cho ka namoq dvnganhmoq yah dvgeh nghuot bas jungh.