Read Achang 2 KORINTHU 4 Bible Online

2 KORINTHU 4 - Achang bible

2 KORINTHU 4

¹Mangso ka nyah nhaiqnyen zis yah ngamoq lyis haih muh kyauh toh goeus. Housoeh las ngamoq yom ma gyau.

²Ngamoq gas zauh toh dah xoq phoh dah muh dvnganh lyis tyamp goeus. Ngamoq gas mhuih khyvlyis ma kuot; Mangso dang lyis ma hwah, ma phanh taiq. Ngamoq gas Mangso dah xikkhonh mas jyoeng cho dah bvng yvmas kang dwis las yuk khanghmuh dah sohseq ehnyet yah doeus khyvlyis tsain nyeis.

³Ngamoq taiq kyoh dah gausyis dang lyis ma seqgyo bang bos lyis gas, hauh bang gas somh loh zis xauh bang dvnghuot.

⁴Hai mungkvn dah ma gis mangso ge Satan gas nyamoq dah ehnyet lyis mauchuotdwang yah nghop tyamp dyei yvmvyah nyamoq ma lomsjingh. Satan ka Mangso dah gungsdoeus nyang nghuot dah Khristu dah phunk cho hau Gausyis Dang masyah thuq dah bvng yvlyis gos tyamp dyei.

⁵Khasoeh ge lyis ngamoq gas ngamoq nyang cho lhyi taiq kyoh zis ma nghuot, Yesu Khristu gas Yhensain nghuot cho, ngamoq gas Yesu gvng mas namoq dah jyeidwis tsain nghuot yvlyis eq taiq kyoh.

⁶Yesu Khristu dah nyoqnho mha bvng dah phunk cho namoq seq bas jungh, ngamoq dah ehnyet lyis pank dyei dah Mangso ka, Mauchuotdwang masyah bvng zis thuq los das, ge taiq dah Mangso nyang nghuot.

⁷Nghuot laus eq mathank magons yomsoq gas yah jyank masyah ma nghuot, Mangso jyank masyah nghuot cho yoh chixoeuq bas jungh, hai Dyos zisyos yoh toh bang yang gas tsoh yam yah dv doeusgoh.

⁸Ngamoq gas dvsoq soq lyis yaukyenh laus eq thungh thyi zis ma xauh; dvlhain lhain khamkhvv laus eq ehnyet ma dyet.

⁹Jeswus nyoshoq bos laus eq dyenschangh ma yoh lo zis khanhamp eq ma bos. Dvlhain lhain svsoh nos loh laus eq ma dyoq ma bis.

¹⁰Yesu gas ngamoq gungs mas kang dwis nyeis zis dede nghuot das nyhenshang, ngamoq dah seq shei gungs gas Yesu kham khoq, shanghsenh dah shei cho lhyi vjangh kham nyeis.

¹¹Yesu dah kang dwis cho ka ngamoq dah seq shei gungsshoh mas yoh nyvng bas jungh, ngamoq gas ngamoq dah kang dwis cho gonh mas shishenh khanghmuh Yesu nyhenshang shei kham das cho mha suh e nyeis.

¹²Haih vjyuk gas, Shei cho ka ngamoq mas muh khanh nyeis laus eq, kang dwis cho ka namoq mas muh khanh nyeis.

¹³Lhaihtoh dang mas, Lomsjingh yvmvyah ngos taiq, ge zis yah dvyhangteh ngamoq eq lomsjingh yvmvyah tsain taiq.

¹⁴Yhensain Yesu lyis shei masyah dwis toq nhang dah Mangso ka ngamoq lyis eq Yesu yah dvgeh dwis toq nhang das las, namoq yah dvgeh nyah xikkhonh mas shwih loh das zis ngamoq seq.

¹⁵Haih cho dvnganh gas namoq mas vkyuh bweh los das nyhenshang nghuot. Mangso dah jyehjuh lyis kham yoeus bang eq zes nyo los zis yah dvyhangteh, Yhensain dah phunk lyis nhaiqshoqlang shvmanh dung cho eq zes nyo los das.

¹⁶Haih cho gvng mas ngamoq khanhamp eq ehnyet ma dyet yom ma gyau. Ngamoq dah gungs nghe pheh nyoq yah nyvng dah gungs vzwvng gas zoh zoh yah dyoqbis loh nyeis. Nghuot laus eq gungs vkhau pheh dyos vzwvng gas dvnyeih dvnyeih vsaiq soq thaiq yvlyis xauh kham yoeus.

¹⁷Ngamoq dvdvm dvsoq xauh nyeis dah shanghsenh dvtsiq dvthang ka ngamoq lyis yaukyenh thoq lyis zes kuh zis yahge vcaiq vto nghuot dah phunk lyis xauh kham yoeus nhang nyeis.

¹⁸Ngamoq gas nyoq yah nyvng dah vyhang lhyi yoeuh tsuk toh zis ma nghuot. Nyoq yah ma nyvng dah vyhang lhyi dvyoeuh tsuk toh. Khasoeh ge lyis nyoq yah nyvng dah vyhang ka dvsoq dvjoq, nyoq yah ma nyvng dah vyhang ka vcaiq vto goeng joq.