Read Achang 2 KORINTHU 5 Bible Online

2 KORINTHU 5 - Achang bible

2 KORINTHU 5

¹Nyeisjvng thoq mas yang nyeis dah zvng ge dah gungsdom dyoqbis loh lyis Mangso ka maukhung mha yang nyeis das xiklyis nyang kuot dah vcaiq vto goeng joq dah yhen yang yoh toh yvlyis yang seq.

²Gvshih yang hau zvng mas lungh joq lyis maukhung mha dah yhen lyis yoh wuot toh das zis svsoh bweh nhang mes yvmvyah yang nos tsain kyingh nyeis.

³Housoeh xauh wuot toh goeus ya yang gas gungs ma yoh bang duot das zis ma nghuot.

⁴Haih nyeisjvng zvng mas nyeis shih uhlyis wons wuq dah yvwons yah nhiq yvlyis xauh kham dah ehnyet yah nos tsain kyingh nyeis. Housoeh noskyingh zis gas yah nyeisjvng gungsdom lyis yoeus tyamp mes las ma nghuot, seq shei yvlyis vcaiq vto kang dwis cho pheh thaiq loh das nyhenshang maukhung mha dah gungs lyis wuot toh mes las nghuot.

⁵Hau thaiq loh das cho, yah nyhenshang sont dyei soeu ka Mangso nghuot. Nyang gas yang kham yoeus dah jyehjuh dvnganh xiklyis pauh toh dyei khyvlyis Dyos dyei toh.

⁶Housoeh yvmvyah ngamoq gas womh ehnyet vjangh dyingh joq. Haih nyeisjvng gungsdom mas nyeis shih dvchank gas yang Yhensain dah yhen yah we joq zis yang seq.

⁷Khasoeh ge lyis yah kang dwis cho ka nyoq yah nyvng yvmas ma nghuot, lomsjingh yvmas kang dvdwis nyeis.

⁸Ngamoq gas womh ehnyet yah dyingh joq las, gungs dah zvng lyis tyamp zis yah Yhensain yah dvgeh nyeis das yvlyis zes o nyeis.

⁹Housoeh las yang gas heimha gungsdom yhen mha nyeis laus eq, thyimha nyeis laus eq gohtoeu dvnganh mas nyang lyis nhaiqdoeus nhang mes.

¹⁰Khasoeh ge lyis yang dvnganh gas soetuon zis xauh das nyhenshang Khristu xikkhonh mas thuq xoeuq chah. Hauh uhlyis yang yuk khanghmuh gas hau gungsdom mas nyeis nyeis shih lyis kuot dah muh gis laus gang laus vvng khyvlyis kham yoeus chah das.

¹¹Ngamoq gas Yhensain dah gyukwoms cho cha ge yvlyis seq yvmvyah, gohyuk lyis yoh jyoeuq yoeus das xiklyis yomkat. Mangso ka yah cho jyuk jyuk seq. Namoq eq namoq dah ehnyet mas ngah cho vlhomuh seq oen nghamhloms.

¹²Heisoeh taiq yvmas ngamoq gas vsainnyang dah gis cho lhyi namoq xikkhonh mas chungh yoeus zis ma nghuot, ngamoq gvng mas namoq yoh khwank das xiklyis dvnghuot. Hauh uhlyis dius dah wotwu lyis ma yoeuh, nghe pheh vwot lyis kyingh yoeuh las seq khwank bang lyis yoh phuk taiq das.

¹³Ngamoq jyoengh ma gying zis nghuot lhyeh? Ma gying nghuot lyis gas Mangso dah xiklyis ma gying zis nghuot. Nghuot ya ngamoq gying lhyeh? Gying nghuot lyis gas namoq xiklyis nghuot.

¹⁴Ngamoq lyis Khristu dah jyetdap ehnyet yah guon nyeis. Khasoeh ge lyis dius dvyuk nyoshoqmoq xiklyis shei kham goeus yvlyis ngamoq soh, nhaiq tap. Housoeh las houka nyah dah shei kham yvmas dvnganhmoq shei kham goeus ge dah vjyuk nghuot.

¹⁵Kang dwis nyeis bang eq nyamoq vkyuh xiklyis kang ma dwis, nyamoq xiklyis shei kham dyei thang lhyi dwis toq loh soeu xiklyis kyingh kang dwis nyeis bas jungh, dvnganhmoq dah xiklyis nyang shei kham goeus.

¹⁶Housoeh las ngamoq gas gvshih masyah hank lyis eq, dius dah vkant lyis yoeuh las soetuon cho ma kuot. Xikpheh Khristu lyis dius dah vkant khyvlyis chank las dang thang thyet cho kuot lai loh goeus. Nghuot laus eq gvshih housoeh ma kuot lo.

¹⁷Hank laus eq Khristu yah dvdain dvlom nghuot loh lyis nyang gas dius saiq bweh los goeus. Vcauh gas lai loh goeus, yoeuh aq dvnganh gas vsaiq bweh los.

¹⁸Hauh cho dvnganh lyis Mangso yah kuot toh. Mangso ka yang nyah jeswus duot nyeis masyah nyah buisnoms bweh los das nyhenshang Khristu Yesu gvng mas thaiq loh nhang. Gohtoeu dius jens lyis eq nyah buisnoms duot nhang das nyhenshang ngamoq lyis muh kyauh toh.

¹⁹Ngamoq taiq kyoh dah gausyis dang gas, Mangso ka Khristu mas dius dvnganh lyis nyah buisnoms duot nhang cho yah sen dah Dang nghuot. Mangso ka nyamoq dah yobos lyis ma comh dyei lo thoq lyis magoh nyamoq lyis nyah buisnoms bweh los shoq khasoeh kuot cho taiq kyoh dah dang ngamoq lyis dyei toh.

²⁰Housoeh las ngamoq gas Khristu dah cho dih dyei dah lvgyo jens nghuot las Mangso ka nyang ngamoq dah nhuot mas dang khyvlyis namoq lyis shangphu nyeis; namoq gas Mangso dah jeswus nghuot nyeis masyah nyah buisnoms jens duot los geh oen Khristu gungsthaiq khyoeuq nyeis.

²¹Khristu gas yaunos ma dap soeu nghuot. Nghuot laus eq yang gas Khristu yah dvdain dvlom duot los las Mangso dah dan cho lhyi xauh kham yoeus das nyhenshang Mangso ka Khristu lyis, yah nyhenshang yang teh yaunos yoh soeu bweh nhang.