Read Achang 2 KORINTHU 6 Bible Online

2 KORINTHU 6 - Achang bible

2 KORINTHU 6

¹Namoq gas Mangso dah jyehjuh xauh kham yoeus bang nghuot zis yah dvyhangteh hauh jyehjuh lyis vyu vgeh ma kuot tyamp bas jungh, ngamoq Mangso yah dvgeh muh zwi bang khyvlyis yah namoq lyis shangphu kat.

²Mangso taiq zis gyo geh, Ngos namoq lyis jyehjuh dyei das shishenh jweh lyis ngos namoq dung dang gyo yoeus dyei, Ngos namoq lyis Khyuot yoeus buisnyeis jweh lyis ngos namoq lyis pangh, ge. Mangso dah jyehjuh kham yoeus das zis gvshih yangh gis dah shishenh nghuot; yoeuh aq, gvshih yangh khyuot yoeus buisnyeis nghuot.

³Ngamoq wons wuq muh yah sen lha hank eq yobos ma xo bas jungh ngamoq hank cho eq thungh lains gus ma bos shoq yomkat.

⁴Ngamoq gas yaukyenh, shanghsenh, yau cho lhyi ehnyet xing xing jhen zis yah kuot. Cho khvt khanghmuh mas ngamoq gas Mangso dah jyeidwis jens nghuot yvlyis dvchixoeuq.

⁵Ngamoq gas bat khyop, thung lhunk, dius hoeu toq cho xauh, muh zwi shangh, ma xauh yhet, zosyuot jeisshet cho tsain xauh.

⁶Ehnyet lhoqshang cho, seq cho, jhen cho, nhaiqnyen cho yah eq, Gyingshang Dyos dah jyehjuh cho yahge, gyingh dah jyetdap ehnyet yah eq;

⁷ngamoq taiq kyoh dah jyoeng dang yahge Mangso dah yomsoq yah, ngamoq gas Mangso dah jyeidwis jens nghuot cho Chixoeuq goeus. Ngamoq gas dan cho lhyi dyvm zan das xiklyis eq, vsainnyang lyis gos das xiklyis eq yhung das kyonhkhyi tsain kuot.

⁸Ngamoq gas nyoqnho ngelang dyei zis, goes sang zis, chungh zis tsain xauh. Ngamoq lyis mhuih jyomh bang nghuot ge tsain tsuk. Nghuot laus eq ngamoq gas jyoeng dang tsain taiq.

⁹Ngamoq gas hank ma soh ma seq bang teh nghuot laus eq nyings hoeuh bang nghuot. Shei loh teh nghuot laus eq yoeuh aq, ngamoq dwis nyeis. Joeng zis xauh laus eq sat zis ma xauh.

¹⁰Nhaiqkuk zis xauh laus eq, ngamoq vjangh gauslaus nyeis; shohjyen teh nghuot laus eq nyoshoq moq lyis dis nhang; cha eq ma yoh teh nghuot laus eq jyoengh ngamoq dvnganh yvlyis sain toh bang nghuot.

¹¹Jyetdap dah Korinthu bang eh, ngamoq gas namoq lyis khyangh khyangh taiq goeus. Ngamoq dah ehnyet khomh lyis namoq xiklyis khonhchauh phank toh.

¹²Namoq yuk ngamoq dah jyetdap ehnyet lyis namoq jyank mas ma jweh shoq nyheih toh.

¹³Namoq dah ehnyet khomh phank toh geh. Gvshih ngos namoq lyis ngah lo jens lyis teh taiq nyeis. Namoq eq ngamoq lyis housoeh teh nghamh cho tauh Chixoeuq geh.

¹⁴Ma lomsjingh bang yah xonh las muh vwons wuq nyeis goh. Khasoeh ge lyis dvgeh xonh las wons wuq das zis ma gis bweh. Jus zis yahge shuot zis gas dvgeh khasoeh yoh xonh nyeis das lah? Bvng zis gas chuot zis yah dvgeh khasoeh yoh zomh das lah?

¹⁵Khristu yahge Satan gas khasoeh xam yoh xonh? Lomsjingh soeu ka ma lomsjingh soeu yah khasoeh toeuq las nyeis das lah?

¹⁶Mangso dah yhenmuh gas phvra yah khasoeh xam yoh xonh das lah? Khasoeh ge lyis, Yang gas dwis nyeis Mangso dah yhenmuh tsain nghuot. Mangso nyang, Ngos gas ngah dius nyau jens mas ngah yhen duot nhang lha nyamoq mas nyeis das. Ngos nyamoq dah Mangso duot las, nyamoq gas ngah vnyau duot das, ge.

¹⁷Housoeh las Yhensain taiq zis gas, Namoq gas nyamoq lyis toh khoq chah, nyamoq jyank masyah gohtoeu kangh yoeus geh. Vwot v-oeu lhyi vzangh thungh goh, housoeh lyis ngos namoq lyis lhom yoeus das.

¹⁸Ngos gas namoq uwus duot las, namoq gas ngah loloeu lonyi jens duot das, ge Maukhung Jesphung Yhensain taiq.